Woo ni Sa Adesai Hegbɛ Ko Ni Bei Pii Lɛ Akuɔ Hiɛ Ashwieɔ Nɔ

“Nibii fɛɛ ni afee yɛ nsara lɛ mli lɛ ji nifeemɔi ni akɛshwieɔ mɔ hiɛaŋ shi ni woɔ mɔ hiɛgbele.”—MAGDALENA KUSSEROW REUTER, NI YI NÁ WALA YƐ NAZI YIWALƐ NSARA LƐ MLI LƐ.

YƐ BƆ ni awuiyeli nifeemɔi ni tee nɔ yɛ Nazi yiwalɛ nsara lɛ mli yɛ Jeŋ Ta II lɛ mli lɛ yɔɔ gbeyei ha lɛ fɛɛ sɛɛ lɛ, jeee no ji klɛŋklɛŋ be ni akɛ woo ni sa adesai lɛ haaa amɛ, ni asaŋ jeee no ji nɔ ni kɛ enɛ ba naagbee. Kɛ́ wɔpɛi nibii ni tee nɔ yɛ blema loo nibii ni yaa nɔ amrɔ nɛɛ lɛ amli lɛ, wɔbaanyɛ wɔmu sane naa faŋŋ akɛ: “Nifeemɔi ni akɛshwieɔ mɔ hiɛaŋ shi ni woɔ mɔ hiɛgbele” lɛ etee nɔ ehao mɛi babaoo kɛjɛ blema tɔ̃ɔ.

Shi kɛlɛ, woo ni sa adesai ni akuɔ hiɛ ashwieɔ nɔ lɛ kɔɔɔ yiwalɛ nifeemɔi ni etee nɔ yɛ adesai ayinɔsane mli lɛ pɛ he. Bei pii lɛ, atsɔɔ gbɛ̀i ni yɔɔ nigii anɔ afeɔ enɛ. Bo lɛ susumɔ gbekɛ ni ayeɔ ehe fɛo yɛ kpajee ko hewɔ lɛ he okwɛ. Aloo mɔ ko ni efã gbɛ kɛyahi maŋ kroko nɔ ní ayeɔ ehe fɛo yɛ emaŋ kusum nifeemɔi komɛi ahewɔ. Aloo aŋkro ko ni akɛ lɛ yeɔ yɛ gbɛ ni esaaa nɔ akɛni esoro ehewolonɔ su loo esoro maŋ nɔ ni ejɛ lɛ hewɔ. Ekolɛ mɛi ni feɔ nibii nɛɛ baasusu akɛ amɛkɛmiiye fɛo kɛkɛ, shi piŋmɔ kɛ hiɛshishwiemɔ ni mɛi ni abaa amɛ shi nɛɛ nuɔ he lɛ jeee sane ni akɛshwɛɔ.—Abɛi 26:18, 19.

Mɛni Ji Woo ni Sa Adesa?

Wiemɔ komekomei ashishitsɔɔmɔ wolo ko tsɔɔ woo shishi akɛ ‘eji su loo shihilɛ ni tsɔɔ akɛ mɔ he yɛ sɛɛnamɔ, esa hiɛnyamwoo, loo esa bulɛ.’ No hewɔ lɛ, woo ni sa adesa lɛ kɔɔ bɔ ni wɔnaa wɔhe wɔhaa kɛ bɔ ni mɛi krokomɛi hu kɛ wɔ yeɔ haa lɛ he. Eyɛ mli akɛ nibii srɔtoi babaoo baanyɛ  aná bɔ ni wɔnaa wɔ diɛŋtsɛ wɔhe wɔhaa lɛ nɔ hewalɛ moŋ, shi bɔ ni mɛi krokomɛi buɔ wɔ amɛhaa loo amɛkɛ wɔ yeɔ haa lɛ náa sɛɛnamɔ ni yɔɔ wɔhe yɛ daa gbi shihilɛ mli lɛ nɔ hewalɛ waa.

Yɛ je lɛŋ he fɛɛ he lɛ, ayɛ ohiafoi kɛ mɛi ni bɛ hebuu kɛ hefãmɔ. Ni kɛlɛ, jeee shihilɛi ni tamɔ enɛɛmɛi ni mɔ yajeɔ mli lɛ ji nɔ ni haa woo ni eyɔɔ lɛ baa shi. Mɛi krokomɛi anifeemɔ kɛ su ni amɛjieɔ lɛ kpo amɛtsɔɔ lɛ ji nibii ni baanyɛ afite woo ni sa mɔ ko. Dɔlɛ sane ji akɛ, abuuu mɛi ni shihilɛ yɔɔ mɔbɔ lɛ akɛ amɛji adesai ni sa woo, ni aŋmɔɔ amɛ ni ayeɔ amɛhe fɛo. Kɛ́ aafee mɛi ni egbɔlɔ, ohiafoi, loo mɛi ni yitsoŋ bɛ jogbaŋŋ loo kpajelɔi lɛ aniseniianii lɛ, kwɛ shii abɔ ni wɔnuɔ wiemɔi tamɔ “ohe bɛ sɛɛnamɔ,” “osaaa bulɛ,” kɛ “ohiɛ eshwie shi”!

Mɛni hewɔ mɛi komɛi shwieɔ mɛi krokomɛi ahiɛaŋ shi lɛ? Ani be ko baashɛ ni akɛ woo ni esa akɛ akɛha adesai lɛ baaha amɛ? Sane ni nyiɛ sɛɛ lɛ kɛ hetoo ni haa mɔ tsui nyɔɔ emli ni jɛ Nyɔŋmɔ Wiemɔ ni ji Biblia lɛ mli lɛ baaha.