Biblia lɛ Baanyɛ Aye Abua Ogbalashihilɛ Lɛ

GBALASHIHILƐ—kɛha mɛi komɛi lɛ, wiemɔ nɛɛ teeɔ susumɔi ni yɔɔ miishɛɛ shi. Kɛha mɛi krokomɛi lɛ, ekɛ tsuiŋdɔlɛ baa. Ŋa ko ye ŋkɔmɔ akɛ: “Yɛ henumɔŋ gbɛfaŋ lɛ, minuɔ he akɛ atse mi gbala. Minuɔ he be fɛɛ be akɛ akpoo mi ni mifee shoo.”

Mɛni haa mɛi enyɔ ni kã kitã be ko ni eho akɛ amɛbaasumɔ amɛhe ní amɛhiɛ amɛhe dɔdɔɔdɔ lɛ bafeɔ mɛi ni mli egbála kwraa lɛ? Oti kome ji nilee babaoo ni abɛ yɛ nɔ ni gbalashihilɛ ji diɛŋtsɛ lɛ he lɛ hewɔ. Tsofafeemɔ he adafitswalɔ ko kɛɛ akɛ: “Wɔboteɔ gbalashihilɛ mli be mli ni wɔnáko ehe tsɔsemɔ ko kwraa.”

Odaseyeli ni tsɔɔ akɛ mɛi fioo pɛ ji mɛi ni yɔɔ gbalashihilɛ he nilee lɛ je kpo yɛ niiamlipɛimɔ ko ni Maŋ Nitsumɔhe ni Kwɛɔ Gbalashihilɛ Saji Anɔ lɛ fee yɛ Rutgers University ni yɔɔ New Jersey, U.S.A lɛ. Niiamlipɛimɔ nɔkwɛlɔi lɛ ŋma akɛ: “Yɛ niiamlipɛimɔ nɛɛ mli lɛ, mɛi pii ji mɛi ni dara yɛ fɔlɔi ni miishɛɛ bɛ amɛgbalashihilɛ mli loo fɔlɔi ni etse gbala mli lɛ atsɔsemɔ shishi. Amɛle bɔ ni gbalashihilɛ ni miishɛɛ bɛ mli lɛ yɔɔ ha diɛŋtsɛ, shi amɛbɛ nɔmimaa yɛ nɔ ni gbalashihilɛ kpakpa ji lɛ he. Bɔ pɛ ni amɛteŋ mɛi komɛi nyɛɔ amɛtsɔɔ bɔ ni gbalashihilɛ kpakpa yɔɔ ha lɛ mli ji ‘nɔ ni tamɔɔɔ mifɔlɔi lɛ anɔ̃ lɛ.’”

Ani Kristofoi yeɔ amɛhe kɛjɛɔ gbalashihilɛ mli naagbai ahe? Dabi. Yɛ anɔkwale mli lɛ, ehe bahia ni akɛ ŋaawoo ni yɔɔ tɛ̃ɛ aha Kristofoi ni hi shi yɛ klɛŋklɛŋ afii 100 lɛ mli lɛ ateŋ mɛi komɛi bɔni afee ni ‘amɛkatao fɛnemɔ’ kɛmiijɛ amɛgbalashihilɛi lɛ amli. (1 Korintobii 7:27) Eka shi faŋŋ akɛ, gbalashihilɛ fɛɛ gbalashihilɛ ni mɛi enyɔ ni yeee emuu yɔɔ mli lɛ kɛ emli naagbai baakpe yɛ be kɛ bei amli, shi wɔyɛ yelikɛbuamɔ. Wumɛi kɛ ŋamɛi baanyɛ amɛha wekukpaa ni kã amɛteŋ lɛ aya hiɛ kɛtsɔ Biblia shishitoo mlai ni amɛkɛaatsu nii lɛ nɔ.

Eji anɔkwale akɛ, Biblia lɛ jeee gbalashihilɛ he gbɛtsɔɔmɔ wolo. Shi kɛlɛ, akɛni Mɔ ni to gbalashihilɛ he gbɛjianɔ lɛ mumɔ ji nɔ ni tsirɛ eŋmaa hewɔ lɛ, wɔbaanyɛ wɔkpa gbɛ akɛ eshishitoo mlai lɛ baafee nɔ ni yeɔ ebuaa. Yehowa Nyɔŋmɔ wie kɛtsɔ gbalɔ Yesaia nɔ akɛ: “Mi ji Yehowa, o-Nyɔŋmɔ lɛ, mɔ ni tsɔɔo nii ni hi hao, mɔ ni tsɔɔo gbɛ ní onyiɛ nɔ lɛ. Eji obo mikitai lɛ atoi kulɛ, ohejɔlɛ aaatamɔ faa, ni ojalɛ hu aaatamɔ ŋshɔkei.”—Yesaia 48:17, 18.

Ani suɔmɔ ni kã okɛ ohefatalɔ lɛ teŋ be ko ni eho lɛ he ebɔi jɔɔ? Ani onuɔ he akɛ oka yɛ gbalashihilɛ ko ni suɔmɔ bɛ mli lɛ mli? Ŋa ko ni ehi gbalashihilɛ mli afii 26 lɛ kɛɛ akɛ: “Ewa waa akɛ aaatsɔɔ dɔlɛ ni anuɔ he yɛ wekukpaa ni tamɔ nɛkɛ mli lɛ mli. Eji nɔ ni kãa he be fɛɛ be, ni eyɛ daa.” Yɛ nɔ najiaŋ ni oookpɛlɛ nɔ akɛ onyɛŋ otsĩ gbalashihilɛ ni nyɛɛɛ nibii ni okpaa gbɛ lɛ ahe nii atsu lɛ naa lɛ, mɛni hewɔ otswaaa ofai shi akɛ obaafee nɔ ko yɛ he? Sane ni nyiɛ sɛɛ lɛ baatsɔɔ wumɛi kɛ ŋamɛi bɔ ni Biblia mli shishitoo mlai baanyɛ aye abua amɛgbalashihilɛ lɛ yɛ gbɛ pɔtɛɛ ko nɔ—no ji hetuu-kɛhamɔ.