Eso na gauna eda sega ni kila na ka meda cakava ni tauvi ira noda itokani na mate ni vakasama. Na sala cava eda rawa ni vakaraitaka kina nida kauaitaki ira dina?

“Totolo ni vakarorogo.”—JEMESA 1:19.

E dua na sala vinaka o rawa ni vukei koya kina, ya mo vakarogoci koya ke via talaucaka na lomana. Kua ni nanuma mo sauma na ka kece e tukuna. Vakavinavinakataka na ka e tukuna, qai vakaraitaka ni o kauaitaki koya dina. Saga mo kila na ka e tu e lomana qai kua ni vakalewai koya. Mo nanuma tiko eso na gauna ena rawa ni vosa tu vakalialia qai veivutunitaka.—Jope 6:2, 3.

“Vosa vakayalovinaka.”—1 CESALONAIKA 5:14.

Ena rawa ni lomaocaoca nomu itokani se nanuma ni tawayaga. Ke o sega mada ga ni kila na ka mo tukuna, o rawa ni veivakacegui qai vakayaloqaqataki koya ke o vakadeitaka vua ni o kauaitaki koya.

“Na itokani dina e loloma ena veigauna.”—VOSA VAKAIBALEBALE 17:17.

Cakava eso na ka mo veivuke kina. Kua ni nanuma ni o kila na sala mo vukei koya kina, tarogi koya na ka mo cakava mo veivuke  kina. De dua ena dredre vua me tukuna vei iko na ka e vinakata, ia e rawa ni drau cakava vata eso na ka me vaka na taubale, volivoli, sasamaki se so tale na ka.—Kalatia 6:2.

“Vosoti ira.”—1 CESALONAIKA 5:14.

Eso na gauna ena sega ni via vosa vei iko o nomu itokani. Vakadeitaka vua ni o na rogoci koya ke via talaucaka na lomana. Ena vuku ni kena ituvaki, ena rawa ni tukuna se cakava eso na ka e vakararawataki iko. Ena rawa ni vakadaroya na ka drau lalawataka tu, se cudrucudru. Mo vosota qai kauaitaki koya tiko ga. Tomana tiko ga nomu dau vukei koya.—Vosa Vakaibalebale 18:24.

“Au vinakata me kila o koya niu nona itokani nuitaki. E sega ni rawa niu walia na nona leqa, ia au dau saga meu rogoca na ka e tukuna. Eso na gauna e vakacegui koya sara ga niu vakarogoci koya tu.”—Farrah, a nona itokani e dau nuiqawaqawa, lomabibi vakabalavu, e kana tale ga vakaca.

“Dua noqu itokani e dau yalovinaka, qai dau veivakayaloqaqataki. E sureti au me keirau lai kanavata e nona vale. Nona vakaraitaka na loloma dina, e rawarawa kina noqu talaucaka na lomaqu. Qori e uqeti au sara ga!”—Ha-eun, dau lomabibi vakabalavu.

“E bibi meda dau vosovoso. Ke vakacudrui au na ka e cakava o watiqu, au dau vakasamataka ni ka e cakava ya e sega ni ivakarau dina ni lomana, ia e vu mai ena ituvaki e sotava tiko. Qori e vukei au meu kua ni cudru, qai kauaitaki koya vakalevu.”—Jacob, lomabibi vakabalavu o watina.

“E tokoni au qai dau vakacegui au o watiqu. Keu lomaleqa vakalevu ena sega ni saga meu cakava na ka au sega ni taleitaka. Eso mada ga na gauna ena vakuai koya ena so na ka e via cakava ena vuku ni kequ ituvaki. Au taleitaka vakalevu nona veinanumi kei na lomasavu.”—Enrico, dau nuiqawaqawa vakasivia.