Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Ni Tauvimate e Dua o Dau Lomana

Ni Tauvimate e Dua o Dau Lomana

“Ni vakarau suka mai valenibula o Ta, keitou kerei vuniwai me keitou veivosakitaka tale na macala ni nona dra. E kaya ni vinaka tu, ia ena raica tale. E kidroa sara ga ni qai raica ni rua na ka se leqa tiko ena nona dra! E kere veivosoti, qai lai raica e dua tale na vuniwai e kenadau kina. Ia sa bulabula vinaka tiko o Ta ena gauna qo. Keitou marau ga ni keitou a taro.”—O Maribel.

Ni bera ni drau lako i valenibula, vakavola na ivakatakilakila ni kena mate kei na wainimate e gunuva tiko

Eda dau lomaleqataka noda lai raici vuniwai kei na noda lai wawa toka e valenibula. Me vaka ga e raici ena ka e yaco vei Maribel, e yaga vakalevu na nodra veivuke na weka se itokani—rawa sara mada ga ni veivakabulai. O na rawa vakacava ni vukea e dua o dau lomana?

Ni bera na veisiko. Mo vukei tauvimate me vola na ivakatakilakila ni kena mate, na wainimate se isosomi ni wainimate e vakayagataka tiko. Vakavola na taro me tarogi vei vuniwai. Mo tarogi tauvimate me baleta na itukutuku ni kena mate se bau dua na wekana a tauva. Kua ni nanuma ni kila na ka kece o vuniwai, se na taroga na veika va qori.

Vakarorogo vinaka, taro ena veidokai, dau vakavola na ka e tukuni mai

Gauna ni veisiko. Mo vakadeitaka kei koya e tauvimate ni sa matata na ka e vakamacalataka o vuniwai. Dau taro, kua ga ni tukuna na ka o nanuma ni donu. Ena vinaka me dau taro ga vakalevu o tauvimate, me vakamacalataka na kena ituvaki. Mo vakarorogo vinaka, vakavola na veika e tukuni tiko. Taroga ke rawa ni so tale na ka e caka. Ena so na gauna e dau vinaka me tukuni vei tauvimate me raica e dua tale na vuniwai.

Raica lesu na idusidusi nei vuniwai, vaka kina na ivola ni wainimate

Ni sa oti na veisiko. Drau raica lesu kei tauvimate na ka e yaco ena nomudrau lai raici vuniwai. Raica me donu na wainimate e soli vua. Uqeti koya me tukuna vakatotolo vei vuniwai ke sega ni vinaka vua na wainimate qori. Vukei koya me donu tiko ga nona rai, me muria tale ga na veika e dusimaki kina, me vaka nona lesu tale vei vuniwai. Vukei koya me kila eso tale na ka me baleta na kena ituvaki.

 E Valenibula

Vakadeitaka nira sa vakaleweni vinaka na fomu kece

Kua ni tavaiyaya se wele. Ena rairai lomaleqa se yalani nona kaukaua e dua e tauvimate ni lako i valenibula. Ni o sega ni tavaiyaya, o qai kauai era na vakacegu kina na kena vo, ena sega tale ga ni levu na cala e yaco. Mo vakadeitaka ni sa vakaleweni vakavinaka na fomu ni bera ni curu o tauvimate. Doka na nona dodonu me baleta na nona vakatulewa ena veiqaravi vakavuniwai me caka vua. Ke sa malumalumu sara vakalevu, doka na veika sa vola oti me vakayacori, kei na lewa e soli vua na wekana voleka se na isoqosoqo e qarava tiko na nona bula. *

Tukuna ena veidokai vei ira na veiqaravi tiko e valenibula na veika o raica vei tauvimate

Vakaliuliu. Kua ni rere na vosa. Era na rawa ni uqeti na veiqaravi tiko vakavuniwai mera kauaitaki koya e tauvimate nira raica na maqosa ni kemu irairai kei na nomu itovo vinaka. Ena rawa tale ga ni uqeti ira mera vakavinakataka na nodra veiqaravi. Ena levu na valenibula e vica vata na vuniwai era qarava e dua ga na tauvimate. O rawa ni veivuke ni o tukuna na veika era dui vakamacala kina. Ni o kilai tauvimate, o na rawa ni tukuna na veisau o raica i yagona se nona ivakarau ni vakasama.

Cakava ga na ka o rawa ni cakava, ia mo kua ga ni siova eso tale na ka

Dau veidokai, vakavinavinaka tale ga. Era dau oca tale ga na veiqaravi e valenibula ni levu nodra cakacaka. Na ivakarau gona o vinakata mera cakava vei iko, mo cakava tale ga vei ira. (Maciu 7:12) Doka na nodra cakacaka kei na ka era rawata, nuitaki ira, qai vakavinavinakataka nodra veiqaravi. Ena uqeti ira mera cakacaka vagumatua.

Eda dau tauvimate ga. Ia ke o tuvatuvanaki rawa tu, qai saga na veivuke e yaga, o na rawa ni vukea na nomu itokani se wekamu ena ituvaki dredre e sotava.Vosa Vakaibalebale 17:17.

^ para. 8 E duidui ena veivanua na lawa kei na ivakaro me baleta na nona dodonu e dua na tauvimate kei na ka me cakava. Mo raica me vakaleweni kece vakavinaka na ivola me baleti tauvimate kei na veiqaravi vakavuniwai e vinakata, me biu tale ga kina na itukutuku vovou baleti koya.