Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 NA RAI NI IVOLATABU

Dravudravua

Dravudravua

E levu na sasaga e vakayacori me wali kina na leqa qori, ia era se dravudravua tiko ga e vica vata na milioni e vuravura.

Era na marau vakacava na dravudravua?

KA ERA TUKUNA ESO

Era vakabauta e levu ni na rawati ga na marau kei na vakacegu ena bula vutuniyau, nona rawaka tale ga e dua ena vakatau tiko ena levu ni nona ilavo. Ni lailai se sega sara ga na vuli, veiqaravi vakavuniwai vinaka, se so tale na veivuke va qori, ena dredre mera marau se bula vakacegu na dravudravua.

KA E TUKUNA NA IVOLATABU

E kaya na iVolatabu ni marau dina e sega ni vakatau ena bula vakailavo, ia ena nona bulabula ga vakayalo e dua kei na nona veiwekani kei na Dauveibuli. E tukuna na iVolatabu: “Era marau o ira na kauaitaka nodra bula vakayalo.” (Maciu 5:3) Se mani vakacava tu na nodra veika vakailavo, o ira na kauaitaka na nodra bula vakayalo era na uqeti mera kauaitaka na rai ni Kalou ena ka era cakava, era rawa ni vulica kina na ka dina vakaivolatabu e veivakacegui, dei tale ga nodra vakasama. Qori e vu ni marau dina.

O ira na kila ra qai muria na ivakasala vakaivolatabu era kila na ka mera cakava ke ra dravudravua. Kena ivakaraitaki, e veivakasalataki na iVolatabu mera kua ni vakatavako se ra gunu vakasivia ni rawa ni veivakaleqai. E vakalusi ilavo, rawa tale ga ni dua na iwase levu ni ilavo e vakayagataki ena veiqaravi vakavuniwai.Vosa Vakaibalebale 20:1; 2 Korinica 7:1.

E veivakaroti na iVolatabu ena ca ni kocokoco kei na domodomoiyau. (Marika 4:19; Efeso 5:3) Na ivakasala va qori e rawa ni vukei kina e dua me kua ni vakalusi ilavo ena veimauilavo kei na nona ‘lomana na ilavo,’ ni kaya na iVolatabu “ni levu sara na ka ca e vu mai” kina. (1 Timoci 6:10) E veivakasalataki na iVolatabu: “Ke levu mada ga na ka e tu vua e dua, ena sega ni vakatau na nona bula ena veika e taukena.” (Luke 12:15) E sega gona ni vakatau tiko na nomu bula ena levu ni nomu ilavo. Ena yasana adua, ni muri na ivakasala vuku ena iVolatabu ena vakainaki kina na bula, e vakilai tale ga na marau dina.

Era na sasaga na dravudravua mera rawata na kedra, nodra isulu kei na vanua mera vakaruru kina, ia era rawa ni vakila na marau ke ra lomavakacegu ena ka sa tu vei ira, ra guta ga mera vakamarautaka na Dauveibuli, ra qai cakava na lomana. Era kila ni dina na yalayala ni iVolatabu ni “veivakalougatataki i Jiova e veivakavutuniyautaki, e sega ni kuria o koya ena ka rarawa.”Vosa Vakaibalebale 10:22.

TIKINIVOLATABU BIBI: “Era marau o ira na kauaitaka nodra bula vakayalo.”Maciu 5:3.

 Ena oti na dravudravua?

KA E KAYA NA IVOLATABU

Ni guce na sasaga vakatamata me tarovi na leqa ni dravudravua, ena yavala na Kalou ena nona gauna lokuci me cavuraka na veika sara ga e vakavuna tiko na leqa—qo o ira na dau tawaveinanumi kei na veimatanitu era saga mera vakacegui ira ga. (Dauvunau 8:9) Na Dauveibuli ena kauta laivi na veimatanitu vakatamata era dau vakaceguya ga na nodra gagadre. Ena qai vakacegui ira kece e vuravura na nona Matanitu se matanitu vakalomalagi e sega ni veivakaduiduitaki. E vakamatatataka na iVolatabu na yalayala ni na vakacegui ira na dravudravua na Tui ni Matanitu ni Kalou. “Ni na vakabula o koya na dravudravua e tagi ni kere veivuke . . . Ena lomani ira na vakaloloma kei na dravudravua, ena vakabula tale ga na dravudravua.”Same 72:12-14.

Ena veisau na vuravura me parataisi, ena tiko kina na vale kei na kakana meda vakayagataka kece, sa na sega tale na bula dravudravua. E tukuni ena Aisea ni yalataka na Kalou vei ira na nona dauveiqaravi nira “na tara vale era na tiko kina, era na tea na loganivaini era na kania na vuana. . . . Era na marautaka vakalevu na cakacaka ni ligadra o ira au digitaka.” (Aisea 65: 21, 22) Era na sega tale ni vaqara kedra tiko, ena na marautaka “e dua na kanavata ena kakana uro” kei na veika vinaka tale eso e vakarautaka o Jiova.—Aisea 25:6.

VUNA MO KAUAI KINA

E veivakadeitaki vei ira na bula vakaloloma ni kauaitaki ira na Kalou, sa vakarau oti tale ga na nodra bula rarawa nira vakasamataka tiko nona yalayala me baleta na vuravura sa na sega tale kina vakadua na dravudravua. Ni vakabibitaki na inuinui qori ena rawa ni vakayaloqaqataka e dua me vosota na ituvaki dredre kece e vakila tiko nikua.

TIKINIVOLATABU BIBI: “Ni na vakabula o koya na dravudravua e tagi ni kere veivuke . . . Ena lomani ira na vakaloloma kei na dravudravua, ena vakabula tale ga na dravudravua.”Same 72:12, 13.