Raica sara na lewena

Raica na lewenivola

 VEIYASA I VURAVURA

Dikevi na Tokalau e Loma

Dikevi na Tokalau e Loma

Dau kilai na Tokalau e Loma me vanua e tekivu kina na veivakatorocaketaki, kune tale ga vakalevu na iyaya makawa ena vakekeli e vakayacori kina.

DAUCAKA WAINI NI KENANI

Era kunea ena 2013 na dauvakekeli e dua na vanua levu era dau maroroi tu kina na waini ni Kenani rauta na 3,700 na yabaki sa oti. E kune e 40 na saqa lelevu e rawa ni vakatawani kina e 3,000 na tavaya ni waini ena noda gauna. E raica e dua na dauvakekeli e vakadikeva na ivovo ni saqa, nira qaqarauni vinaka na dau caka waini ni Kenani. E kaya: “Ena muri sara vakamatau na ituvatuva ni caka waini ena saqa kece.”

O BAU KILA? E tukuni ena iVolatabu na caka ni “waini vinaka duadua” e Isireli makawa, qai maroroi tu ena kedra saqa lelevu.—Sere i Solomoni 7:9; Jeremaia 13:12.

TUBU NI LEWENIVANUA

E ripotetaki ena niusiveva na Guardian ni tubu ena 560 na udolu na gone era sucu e Ijipita ena 2012 ni vakatauvatani kei na 2010. E kaya o Magued Osman, mai na kabani ni dauvakadidike e Ijipita na Baseera: “E tubu sara ga vakalevu na iwiliwili qori ena ivolatukutuku kei Ijipita.” Ke tubu tiko ga va qori, ena lailai na wai, kakana kei na veika tale eso e dau vakayagataki e veisiga.

O BAU KILA? E kaya na iVolatabu ni inaki ni Kalou meda “vakasinaiti vuravura,” me veiganiti, me veirauti qai marautaki tale ga vei keda kece na ka e vakarautaki.—Vakatekivu 1:28; Same 72:16.

ILAVO VARASA E VUNITAKI

E kune volekata na gaunisala levu e Isireli e sivia e 100 na ilavo varasa e toci tu kina “Yabaki Va.” Na yabaki qori e dusia tiko na ikava ni yabaki ni nodra vakaduduile na Jiu vei ira na kai Roma (69-70 G.V.)—na vakaduduile qori e tini sara ena rusa i Jerusalemi. E kaya o Pablo Betzer, e dua na dairekita ni vakekeli: “A rere e dua qai nanuma ni sa yaco na ivakataotioti, de raici ira sara ga na sotia ni Roma nira toso tiko yani. E vunitaka kina nona iyau me qai mai kauta vakamalua.”

O BAU KILA? E parofisaitaka o Jisu ena 33 G.V., nira na keba wavoki e Jerusalemi na sotia ni Roma. E uqeti ira kina na lotu vaKarisito mera dro ina ulunivanua.Luke 21:20-24.