Bible no kã Christianfo mbarimba ekuw ebien a wodzi asafo no mu asodzi ahorow ho dwuma ho asɛm, hɔn nye “ahwɛfo nye asomfo.” (Philippifo 1:1) Mpɛn pii no, yɛwɔ mbarimba dodow a wɔsom dɛ asafo mu mpanyimfo nye asomfo wɔ asafo biara mu. Ebɛn edwuma na asafo mu asomfo yɛ a yenya do mfaso?

Wɔboa mpanyimfokuw no. Asafo mu asomfo no yɛ mbarimba a wɔnye Jehovah wɔ ebusuabɔ a no mu yɛ dzen, wɔyɛ hɔn edwuma yie na afofor botum dze hɔnho ato hɔn do. Binom yɛ mberantsɛ, na binom so enyinyin. Wɔyɛ ndwuma afofor dze ma biribiara kɔ do esiado esiado wɔ Ahendzi Asa do nye asafo no mu. Iyi ma mpanyimfo no nya kwan dze hɔn adwen si ɔkyerɛkyerɛ nye ahwɛfo edwuma no do yie.

Wɔyɛ ndwuma a no ho hia dze boa asafo no. Asafo mu asomfo binom edwuma a wɔdze ahyɛ hɔn nsa nye dɛ wɔbɛgye hɔn a wɔba nhyiamu no nyinara fɛw do na wɔaaboa hɔn. Wɔma binom so hwɛ akasamu efir do, kyekyɛ nwoma ahorow, hwɛ asafo no mu sikasɛm do, na binom so kyekyɛ nsaasesin a wɔkɔ mu asɛnka ma asafo no mufo. Wɔsan so boa ma wosiesie Ahendzi Asa do. Mpanyimfo no tum ma asomfo yi boa hɔn a hɔn mfe akɔ enyim no. Ɔmmfa ho edwuma biara a wɔdze bɛhyɛ asomfo yi nsa no, woyi hɔn yamu dzi ho dwuma. Iyi ma asafo no mufo no bu hɔn, osian edwumadzen a wɔyɛ no ntsi.​—1 Timothy 3:13.

Wɔyɛ nhwɛdo pa dɛ Christianfo mbarimba. Dza wogyina do paw asafo mu asomfo nye suban pa a wɔda no edzi dɛ Christianfo no. Sɛ wɔyɛ dwumadzi biara wɔ nhyiamu no ase a, wɔdze hyɛ hɛn gyedzi dzen. Sɛ wɔyɛ nhwɛdo pa wɔ asɛnka edwuma no mu a, okenyan hɛn so ma yɛyer hɛnho. Osiandɛ wɔnye mpanyimfo no yɛ kor ntsi, ɔma enyigye na koryɛ tsena asafo no mu. (Ephesusfo 4:16) Ber rokɔ do no, hɔn so tum fata dɛ wɔsom dɛ asafo mu mpanyimfo.

• Asafo mu asomfo suban tse dɛn?

• Ebɛn kwan do na asafo mu asomfo no boa asafo no?