1 Samuel 9:1-27
9 Benjamiʉ̃neba yõna Quis abadada ɓasia. Idjira Abiel warra basía. Abielera Zero warra basía. Zerora Becorá warra basía. Becorára Apía warra basía. Apíara Benjamiʉ̃neba yõna basía. Maʉ̃ ẽberã Quis abadara dji droma basía.
2 Idjia warra cũdrada eroɓasia Saul abadada. Saulora jũma israelerã cãyãbara quĩrãwãrẽãra ɓasia idjaɓa drasoara ɓasia.
3 Ewari aɓa Saul zeza Quis burroda ʉ̃cʉrʉ nẽbasiɗaa. Maʉ̃ carea idji warra Sauloa nãwã jarasia:
–Dadji burrora jʉrʉɗe wãdua. Nezocada aɓa ededua.–
4 Ara maʉ̃da Saulba Epraiʉ̃ eyaiɗa ɓʉ ẽjũãne, Salisaɗe, Saaliʉ̃ne, Benjamiʉ̃ ẽjũãne biɗa jʉrʉ nĩbasia. Mãwãmĩna unuẽ́ basía.
5 Zup ẽjũãne jũẽsiɗaɗe Saulba idji nezocaa jarasia:
–Jẽda wãna. Naʉ̃bara mʉ̃ zezara idji burro carea sopua ɓʉẽ́a ãtebʉrʉ dadji carea sopua ɓʉa.–
6 Dji nezocaba panusia:
–Naʉ̃ puruɗe Ãcõrẽneba beɗeabarida ɓʉa. Jũmarãba idjira waya panʉa. Jũma idjia jarabʉrʉra wãrãda mãwãbaria. Idjimaa wãna. Idjia poya jaraisicada sãma burrora jʉrʉɗe wãnida panʉda.–
7 Saulba panusia:
–Mãẽteara wãna. Baribʉrʉ ¿cãrẽda idji itea edeɗi? Dadjia enepeɗaɗa paʉ̃ra jõsia. Ni cãrẽ siɗa neẽ́ panʉa idjía diaɗi carea.–
8 Dji nezocaba panusia:
–Mʉ̃a nama parata torroda aɓa eroɓʉa.* Maʉ̃gʉra idjía diaɗia jaramãrẽã sãma burrora jʉrʉɗe wãnida panʉda.–
9 9:9-10 Saulba jarasia:
–Bia ɓʉa. Wãna.–
Ara maʉ̃da Saulora idji nezoca ume puruɗaa Ãcõrẽneba beɗeabarimaa wãsiɗaa. (Maʉ̃ ewariɗe israelerãba Ãcõrẽneba beɗeabarira dau ẽsã unubarida jarabadjiɗaa. Maʉ̃ bẽrã aɓaʉba Ãcõrẽa iwiɗi quĩrĩã ɓʉɗe jarabadjia: “Dau ẽsã unubarida acʉɗe wãna.”)
11 Jũẽboɗoɗaɗe eyaɗe ʉ̃taa nĩbasiɗaa. Maʉ̃ne awẽrãrã baido jueɗe wãbʉdada unusiɗaa. Ãdjia maʉ̃ awẽrãrãa nãwã iwiɗisiɗaa:
–Dji dau ẽsã unubarira ¿naʉ̃ puruɗe ɓʉca?–
12 Awẽrãrãba nãwã panusiɗaa:
–Mãẽ, nocoare ɓʉa. Isabe wãnadua. Iɗi puruba eya boroɗe animarãda Ãcõrẽa babue diaɗi bẽrã idjira zesia.
13 Puruɗe jũẽsiɗara idjira isabe jʉrʉɗadua. Mãwãẽ́bʉrʉ idjira eya boroɗaa ne coɗe wãya. Idjiabʉrʉ animarã Ãcõrẽa babue diapeɗaɗada bia jara ɓʉida ɓʉa ẽberãrãba coɗi naẽna. Isabe wãnibʉrʉ idjira ununia.–
14 Ara maʉ̃da ãdjira puruɗaa ʉ̃taa wãsiɗaa. Jũẽbʉdaɗe Samuelera eya boroɗaa wãbʉrʉda ãdji ume quĩrãdjusia.
15 Nurẽmaena Saul jũẽi naẽna Ãcõrẽba Samuelea naʉ̃gʉda cawabisia:
16 –Nu ara naʉ̃ horaca mʉ̃a Benjamiʉ̃ ẽjũãnebemada aɓa bʉmaa diabueya. Idjidrʉ ɓʉdua mʉ̃ puru Israel boro bamãrẽã. Idjiabʉrʉ bãrãra pilisteorã jʉwaeɗabemada ẽdrʉ ɓʉya. Mʉ̃a unu ɓʉa mʉ̃ purura bio bia mĩga ɓʉda. Idjaɓa mʉ̃a ũrĩ ɓʉa ãdjirãba quĩrã djuburiada iwiɗi panʉda.–
17 Samuelba Saul unusiɗe Ãcõrẽba idjía jarasia:
–Jãʉ̃ ẽberãdrʉ mʉ̃a bʉ́a nuena jara ɓasia. Idjiabʉrʉ mʉ̃ purura pe eroɓaya.–
18 Puruɗe eɗa wãbadama Saulora Samuel caita wãpeɗa jarasia:
–Mʉ̃ djuburia mʉ̃́a jaradua dji dau ẽsã unubari dera sãma ɓʉda.–
19 Samuelba jarasia:
–Dau ẽsã unubarira mʉ̃́a. Eya boroɗaa mʉ̃ na wãdua. Mʉ̃a quĩrĩã ɓʉa iɗi bʉra mʉ̃ ume ne coida. Nu diapeɗa bʉa iwiɗibʉrʉda mʉ̃a jaraya. Mãwãnacarea mʉ̃a bʉra idu wãbiya.
20 Burro ewari ũbea adua panʉ carea sopuarãdua. Bʉ ẽberãrãba unusiɗaa. Maʉ̃ awara jũma israelerãba quĩrĩã panʉa bʉda, bʉ zezaɗeba yõbʉdarã siɗa ãdjirã boroda ɓeaɗida.–*
21 Saulba panusia:
–Baribʉrʉ mʉ̃ra Benjamiʉ̃neba yõnada jãwã ɓʉa. Dai purura Israelɗeba yõpeɗaɗa doce puruɗebemada dji caibeara ɓʉa. Maʉ̃ awara Benjamiʉ̃neba yõpeɗaɗaɗebemada mʉ̃ ẽberãrãra dji eɗaara ɓeaa. Maʉ̃da ¿cãrẽ cãrẽã bʉa mʉ̃́a mãwã jara ɓʉ?–
22 Maʉ̃be Samuelba Saulora, idji nezoca siɗa eya boroɗe ɓʉ deɗaa edepeɗa ẽberãrã treinta panʉ tãẽna chũmebisia dji dromaara ɓea chũmebadama.
23 Maʉ̃be Samuelba ne djubaría nãwã jarasia:
–Ne djara mʉ̃a bʉ́a awara ɓʉbiɗara enedua.–
24 Ara maʉ̃da ne djubariba chĩdeɗebema djarada enesia Saulba comãrẽã. Maʉ̃ne Samuelba jarasia:
–Codua. Mʉ̃a purua ãbaa ne coɗi jarasiɗe naʉ̃gʉra bʉ itea awara ɓʉbisia.–
Ara maʉ̃da Saulora Samuel ume ne cosia.
25 Mãwãnacarea ãdjira eya boroɗeba puruɗaa eɗaa zeɗapeɗa Samuel deɗe dji ʉ̃taarebema dejãne Saul itea cʉɗada osiɗaa.
26 Mama Saulora cãĩsia.*
Nurẽma Samuelba Saul maʉ̃ ʉ̃taarebema dejãne ɓʉda trʉ̃peɗa jarasia:
–Piraɓaridua, wãida ɓʉa.–
Ara maʉ̃da Saulora piradrʉpeɗa Samuel ume dajadaa wãsiɗaa.
27 Puruɗeba wãbʉdaɗe Samuelba Sauloa jarasia:
–Bʉ nezocaa jaradua na wãmãrẽã baribʉrʉ bʉra waɗi wãrãdua. Ãcõrẽba jarabi ɓʉra mʉ̃a bʉ́a jaraida ɓʉa.–
Ara maʉ̃da Saul nezocara na wãsia.
Beɗea eɗaare
^ 9:8 Parata torroda aɓa. Hebreo beɗeaɗe nãwã ɓʉ́ ɓʉa “un cuarto de siclo.”
^ 9:20 Jũma israelerãba quĩrĩã panʉa bʉda, bʉ zezaɗeba yõbʉdarã siɗa ãdjirã boroda ɓeaɗida. Hebreo beɗeaɗe nãwã ɓʉ́ ɓʉa: “Jũma israelerã ne biada ¿bʉa, bʉ zezaɗeba yõbʉdarã biɗa edaɗaẽ́ca?”
^ 9:25-26 Dji ʉ̃taarebema dejãne Saul itea cʉɗada osiɗaa. Mama Saulora cãĩsia. Griego beɗeaɗe mãwã ɓʉ́ ɓʉa. Hebreo beɗeaɗe nãwã ɓʉa: “Samuelera Saul ume beɗeasia dji ʉ̃taarebema dejãne. Nurẽma ãsaboɗoɗe ʉ̃rʉ̃masiɗaa.”
