1 Samuel 12:1-25
12 Mãwãnacarea Samuelba jũma israelerãa nãwã jarasia:
–Bãrãba jarapeɗaɗara mʉ̃a jũma osia. Mʉ̃a aɓa ɓʉsia bãrã boroda ɓamãrẽã.
2 Iɗira idjiabʉrʉ bãrãra pe eroɓaya. Mʉ̃ra drõãda ɓʉ bẽrã boro torroa ɓʉa. Mʉ̃ warrarã drõã ɓea siɗa bãrã ume panʉa. Mʉ̃ cũdra eɗaʉba aɓa iɗi ewariɗaa bãrãra pe eroɓasia.
3 Mʉ̃ra bãrã quĩrãpita ɓʉa. Mʉ̃a djãrã pacada, burro siɗa jãrĩca basía idjaɓa sewaɗeba djãrãra biẽ́ jaraca basía ni biẽ́ oca basía. Mʉ̃ra paratabari ni aɓaʉare ɓaca basía. Baribʉrʉ mʉ̃a cadjiruada osibʉrʉ, bãrãba Ãcõrẽ quĩrãpita, dadjirã boro idjia edaɗa quĩrãpita biɗa jaraɗadua. Biẽ́ o ɓʉɗeba djãrãneda edasibʉrʉ mʉ̃a jũma jẽda diaya.–
4 Puruba panusia:
–Bʉa dairãra sewaɗeba biẽ́ jaraca basía ni biẽ́ oca basía. Djãrãneda jãrĩca basía.–
5 Samuelba jarasia:
–Ãcõrẽba, dadjirã boro idjia edaɗa biɗa ũrĩsiɗaa bãrãba mʉ̃ra beɗeaɗe ɓʉẽ́ana a panʉda.–
Puruba panusia:
–Mãẽ, mãwã ɓʉa.–
6 Maʉ̃be Samuelba jarasia:
–Ãcõrẽbʉrʉ Moiseda, Aaroʉ̃ siɗa edapeɗa dadji drõã naẽnabemarãra Egiptoɗeba ẽdrʉ enesia.
7 Maʉ̃ bẽrã quĩrãcuita ũrĩnadua. Bãrãba Ãcõrẽ awara aɓa bãrã boroda ɓamãrẽã ɓʉbisiɗaɗe biẽ́ osiɗaa. Maʉ̃gʉra Ãcõrẽ quĩrãpita mʉ̃a bãrãa ebuɗa cawabiya. Ãcõrẽba bãrãra, bãrã drõã naẽnabemarã siɗa bio carebasia.
8 Jacobo Egiptoɗe ɓaɗe wãnacarea egiptorãba idjiɗeba yõpeɗaɗarãda biẽ́ osiɗaa. Maʉ̃ bẽrã ãdjirãba Ãcõrẽa quĩrã djuburiada iwiɗiɗapeɗa idjia Moiseda Aaroʉ̃ siɗa ãdjirãmaa diabuesia. Maʉ̃be Moiseba Aaroʉ̃ ume bãrã drõã naẽnabemarãra Egiptoɗeba ẽdrʉ enesiɗaa naʉ̃ ẽjũãne pananamãrẽã.
9 Baribʉrʉ dãrãẽ́ne ãdjirãba Ãcõrẽra igarasiɗaa. Maʉ̃ carea idjia Hazorɗebema sordaorã boro Sisaráa ãdjirãra idu poyabisia. Maʉ̃ awara pilisteorãa, Moab druaɗebema boroa biɗa ãdjirãra idu poyabisia.*
10 Mãwã panʉne israelerãba Ãcõrẽa nãwã quĩrã djuburiada iwiɗisiɗaa: “Dairãba cadjiruada osiɗaa. Bʉra igaraɗapeɗa Baalda, Astarte siɗa ẽpẽsiɗaa. Baribʉrʉ bʉa dairãra dji quĩrũ jʉwaeɗabemada ẽdrʉ ɓʉibʉrʉ, bʉdrʉ ẽpẽ panania.”
11 Maʉ̃ carea Ãcõrẽba Gedeoʉ̃ Jerobaal abadada, Baracoda, Jepteda idjaɓa mʉ̃ siɗa diabuesia bãrã dji quĩrũnebemada ẽdrʉ ɓʉmãrẽã. Mãwã bãrãra necai panebadjiɗaa.
12 Baribʉrʉ amonitarã boro Nahasada bãrã ume djõne zebʉrʉda cawasiɗaɗe bãrãba mʉ̃́a nãwã jarasiɗaa: “Aɓa ɓʉdua dadjirã boroda ɓamãrẽã.” Ãcõrẽra dadjirã boromĩna bãrãba mãwã jarasiɗaa.
13 Iɗi bãrãba edapeɗaɗa borora nama ɓʉa. Bãrãba iwiɗipeɗaɗara Ãcõrẽba diasia.
14 Baribʉrʉ Ãcõrẽra waya pananadua. Idjia jara ɓʉra ĩjã oɗadua. Ni maãrĩ biɗa igararãnadua. Bãrãba, bãrã boro biɗa idjida wãrãda ẽpẽnibʉrʉ, bia duanania.
15 Baribʉrʉ idjia jara ɓʉda ĩjãnaẽ́bʉrʉ idjaɓa igaraɗibʉrʉ, idjia cawa oya bãrã drõã naẽnabemarã cawa oɗa quĩrãca.*
16 Acʉɗadua. Bãrãba ununia Ãcõrẽba bãrã quĩrãpita ne ununacada obʉrʉda.
17 Ara nawena trigo jara nũmʉ bẽrã cue zecaa. Baribʉrʉ mʉ̃a Ãcõrẽa iwiɗiya cue zebimãrẽã idjaɓa baa siɗa ɓaebimãrẽã. Maʉ̃neba bãrãba cawaɗia Ãcõrẽ quĩrãpita cadjiruada osiɗada idji awara aɓa bãrã boroda ɓamãrẽã iwiɗisiɗaɗe.–
18 Ara maʉ̃da Samuelba Ãcõrẽa iwiɗisia. Maʉ̃ne Ãcõrẽba cuera zebisia. Baa siɗa ɓae nũmebisia. Maʉ̃ unubʉdaɗe puruba Ãcõrẽda, Samuel siɗa bio wayasiɗaa.
19 Maʉ̃ carea jũmarãba Samuelea jarasiɗaa:
–Dairã, bʉ nezocarã beurãnamãrẽã Ãcõrẽa iwiɗidua. Dairãba naẽna cadjirua opeɗaɗa awara wayacusa cadjiruada osiɗaa Ãcõrẽ awara aɓa dairã boroda ɓamãrẽã iwiɗisiɗaɗe.–
20 Samuelba jarasia:
–Ne wayarãnadua. Wãrãda bãrãba bio cadjiruada osiɗaa. Jãʉ̃be Ãcõrẽra waa igararãnadua. Wãrãda soɗeba idjira ẽpẽnadua.
21 Jʉwaba oɗa ãcõrẽ ɓeada ẽpẽrãnadua. Maʉ̃gʉrãba bãrãra poya carebaɗaẽ́a ni poya ẽdrʉ ɓʉɗaẽ́a, wãrã ãcõrẽẽ́ bẽrã.
22 Baribʉrʉ Ãcõrẽba quĩrĩãna bẽrã bãrãra edasia idji puru bamãrẽã. Maʉ̃ bẽrã idjia bãrãra igaraẽ́a ni aɓaʉba idjida biẽ́ jararãnamãrẽã.
23 Mʉ̃a bãrã carea iwiɗi ɓaya. Mãwã oẽ́bʉrʉ Ãcõrẽ quĩrãpita cadjiruada o ɓaya. Maʉ̃ awara mʉ̃a waɗibiɗa jaradia ɓaya sãwã jipa nĩbaɗida panʉda.
24 Bãrãba unusiɗaa Ãcõrẽba bãrã itea ne waiɓʉada o ɓʉda. Maʉ̃ bẽrã aɓa idjidrʉ wayaɗadua. Soɗeba idjida ẽpẽnadua.
25 Baribʉrʉ cadjiruada o pananibʉrʉ, Ãcõrẽba bãrãra, bãrã boro siɗa ãyã ɓʉya.–
