1 Samuel 22:1-23
22 Mamaʉba Davira Adulaʉ̃ puru caita eya uriaɗe mĩrũ ɓaɗe wãsia. Davi djabarãba, dji zezaba, jũma dji zeza ẽberãrã biɗa idjira mama ɓʉda ũrĩsiɗaɗe idji ume panane wãsiɗaa.
2 Maʉ̃ awara jũma ẽberãrã bia mĩga ɓeada, ne diai bara ɓeada, soɗe biẽ́ ɓea siɗa idjimaa wãsiɗaa. Maʉ̃ne Davira ãdjirã boroda ɓesia. Jũma ãbaa cuatrociento panasiɗaca ɓʉa.
3 Mamaʉba Davira Mizpa puruɗaa wãsia Moab druaɗe. Idjia Moab druaɗebema boroa nãwã jarasia:
–Mʉ̃ djuburia, mʉ̃ zezada mʉ̃ papa siɗa nama idu ɓebidua aɓa Ãcõrẽba sãwã oida mʉ̃́a cawabibʉrʉɗaa.–
4 Maʉ̃be Daviba djibarirãra Moab druaɗebema boromaa edepeɗa amesia. Ãdjirãra mama panesiɗaa Davi eyaɗe mĩrũ ɓʉmisa.
5 Maʉ̃ne Ãcõrẽneba beɗeabari Ga abadaba Davia nãwã jarasia:
–Waa naʉ̃ eyaɗe mĩrũrãdua. Jẽda Juda druaɗaa wãdua.–
Ara maʉ̃da Davira Haret oiɗaa wãsia.
Saulba sacerdoterã quenana
6 Ewari aɓa Saulora Guibea puruɗe eya zaqueɗe chũmasia tamarisco bacuru edre. Idji jʉwaɗe mĩãsuda eroɓasia. Jũma idjiare ɓeara idji ume panasiɗaa. Maʉ̃ne ʉ̃cʉrʉ idjimaa zeɗapeɗa jarasiɗaa Davida, idji ume panʉrã siɗa unusiɗada.
7 Saulba idjiare ɓeaa nãwã jarasia:
–Ũrĩnadua, bãrãra mʉ̃ quĩrãca Benjamiʉ̃neba yõpeɗaɗarãa. Baribʉrʉ Judaɗeba yõna Jesé warra Davira dadji israelerã boroda ɓeibʉrʉ, ¿idjia bãrãa ẽjũãda, uva ẽjũã siɗa diaica? ¿Idjia bãrãra idji sordaorã bororãda ɓʉica?*
8 Mãwãmĩna bãrãra beɗea ausiɗaca ɓʉa mʉ̃ ãyã ɓʉɗi carea. Ni aɓaʉba mʉ̃́a jaraɗaẽ́ basía mʉ̃ warra Jonataʉ̃ra Jesé warra Davi ume beɗea ɓʉsiɗada. Ni aɓaʉba mʉ̃da crĩchaɗacaa. Iɗira mʉ̃are ɓaɗa Daviba mʉ̃ra beai carea ɓʉa mʉ̃ warra Jonataʉ̃ba mãwã crĩchabiɗa bẽrã. Baribʉrʉ bãrãba maʉ̃nebemada mʉ̃́a jaraɗaẽ́ basía.–
9 Maʉ̃ne Edoʉ̃nebema Doé ãdji tãẽna ɓʉba nãwã jarasia:
–Mʉ̃a Jesé warra Davira Nobo puruɗe unusia. Idjira Ahitob warra Ahimele ume beɗea ɓasia.
10 Ahimeleba Ãcõrẽa iwiɗisia Daviba sãwã oida ɓʉ cawaya. Maʉ̃ awara djõbada neco pilisteo Goliáɗe baɗada, coi careabema siɗa diasia.–
11 22:11-12 Ara maʉ̃da Saulba Ahitob warra Ahimelera, idji zeza ẽberãrã siɗa jũma trʉ̃bisia. Ãdjirãra Nobo puruɗe Ãcõrẽ sacerdoterã basía. Ãdjirã Saulma jũẽsiɗaɗe Saulba Ahimelea jarasia:
–Ahitob warra, mʉ̃a jarabʉrʉra ũrĩdua.–
Ahimeleba panusia:
–Jaradua, mʉ̃ boro.–
13 Maʉ̃ne Saulba iwiɗisia:
–¿Cãrẽ cãrẽã bʉra Jesé warra Davi ume mʉ̃ beaɗi carea beɗea ausiɗa? Mʉ̃a cawa ɓʉa bʉa paʉ̃da, djõbada neco siɗa idjía diasida. Maʉ̃ awara bʉa Ãcõrẽa iwiɗisia Daviba sãwã oida ɓʉ cawaya. Maʉ̃ bẽrã iɗira idjia mʉ̃ra beai carea ɓʉa.–
14 Ahimeleba panusia:
–Mãwãẽ́a. Mʉ̃ boro, jũma bʉare ɓea cãyãbara Davira bʉ ume jipaara ɓʉa. ¿Idjira bʉ wiguẽ́ca? ¿Bʉ wagabada sordaorã boroẽ́ca?* ¿Jũma bʉ diguiɗabemarãba idjira waya panʉẽ́ca?
15 Iɗibebʉrʉ mʉ̃a Ãcõrẽa iwiɗi ɓʉẽ́a idjia sãwã oida ɓʉ cawaya. Maʉ̃ bẽrã mʉ̃ boro, jararãdua mʉ̃ra mʉ̃ ẽberãrã siɗa beɗeaɗe panʉda. Wãrãda mʉ̃, bʉ nezocaba cãrẽ siɗa adua ɓʉa naʉ̃ nẽbʉraɗebemada.–
16 Baribʉrʉ Saulba ĩjãnaẽ́ bẽrã nãwã jarasia:
–Ahimele, bʉra, bʉ zeza ẽberãrã siɗa mʉ̃a jũma beabiya.–
17 Ara maʉ̃da Saulba idji wagabada sordaorãa nãwã jarasia:
–¡Ãcõrẽ sacerdoterãra jũma quenanadua! Ãdjirã siɗa Daviare duanʉa. Ãdjia cawasiɗaa Davira mĩrũ nĩda baribʉrʉ mʉ̃́a jaraɗaẽ́ basía.–
Baribʉrʉ idji wagabada sordaorãba Ãcõrẽ sacerdoterãra bea quĩrĩãnaẽ́ basía.
18 Maʉ̃ carea Saulba Edoʉ̃nebema Doéa jarasia:
–¡Bʉabʉrʉ Ãcõrẽ sacerdoterãra quenadua!–
Ara maʉ̃da Doéba ãdjirãra quenasia. Maʉ̃ ewariɗe 85 sacerdoterãda ãdji djio jʉ̃ ɓeada quenasia.
19 Maʉ̃ awara sacerdoterã puru Noboɗaa wãpeɗa umaquĩrãrãda, wẽrãrãda, warrarãda, djiwiɗi toɗa queɗea siɗa necoba jũma quenasia. Pacada, burroda, oveja siɗa quenasia.
20 Baribʉrʉ Doéba quenabʉrʉɗe Ahimele warra Abiatada Davi ɓʉmaa mĩrũ wãsia.*
21 Maʉ̃ne idjia Davia nẽbʉrʉsia sãwã Saulba Ãcõrẽ sacerdoterãra quenabisida.
22 Daviba idjía jarasia:
–Mʉ̃ Nobo puruɗe ɓasiɗe Edoʉ̃nebema Doé siɗa mama ɓasia. Mʉ̃a cawa ɓasia idjira Saulmaa wãpeɗa mʉ̃ jãma ɓaɗara jaraida. Maʉ̃ bẽrã mʉ̃drʉ beɗeaɗe ɓʉa bʉ zeza ẽberãrã jũma quenana carea.
23 Mʉ̃ ume ɓedua. Ne wayarãdua. Aɓari ẽberãba mʉ̃da, bʉ siɗa bea quĩrĩã ɓʉa. Mʉ̃ ume ɓesira idjia bʉra beaẽ́a.–
