‘Yak Ikọ Mi Odu ye Mbufo’

“Edieke ikọ mi odude ye mbufo, mbufo ẹdi mbet mi ke akpanikọ, ndien mbufo ẹyefiọk akpanikọ, akpanikọ oyonyụn̄ anam mbufo ẹwọrọ ufụn.”—JOHN 8:31, 32.

Se Emi Ọwọrọde: “Ikọ” Jesus mi ọwọrọ se enye ekekpepde, emi Ete esie ọkọdọn̄de enye ete ekpep. Jesus ọkọdọhọ ete: “Ete emi ọkọdọn̄de mi ọnọ mi ewụhọ aban̄a se ndọhọde ye se ntịn̄de.” (John 12:49) Jesus ama ọbọn̄ akam ọnọ Ete esie eke heaven, Jehovah Abasi, ete: “Ikọ fo edi akpanikọ.” Enye ama esiwak ndikot se isịnede ke Ikọ Abasi ndida nsọn̄ọ se enye ekekpepde. (John 17:17; Matthew 4:4, 7, 10) Ke ntem, mme ata Christian ‘ẹyak ikọ esie odu ye mmọ,’ m̀mê ẹnyịme Ikọ Abasi kpa Bible nte “akpanikọ” ẹnyụn̄ ẹyak se mmọ ẹkpepde ye se mmọ ẹnamde ẹkekem ye Bible.

Nte Mme Akpa Christian Ẹkenamde Emi: Apostle Paul, emi ekewetde ata ediwak n̄wed ke Bible, ama owụt ke Bible edi ikọ Abasi ukem nte Jesus okowụtde. Enye ekewet ete: “Abasi ọkọnọ odudu spirit ẹda ẹwet ofụri N̄wed Abasi.” (2 Timothy 3:16) Mbiowo emi ẹkemekde ẹte ẹkpep mme ekemmọ Christian n̄kpọ ẹkenyene ‘ndisọn̄ọ mmụm ikọ akpanikọ n̄kama.’ (Titus 1:7, 9) Ẹma ẹdọhọ mme akpa Christian ẹte ẹkûyak “ukpepn̄kpọ akwaifiọk owo ye ikpîkpu abian̄a obụme [mmọ] nte asan̄ade ekekem ye item owo, nte asan̄ade ekekem ye mme akpa n̄kpọ ererimbot [mînyụn̄] isan̄ake ikekem ye Christ.”—Colossae 2:8.

Mmanie Ẹnam Emi Mfịn? N̄wed Catholic kiet [oro ẹkotde Dogmatic Constitution on Divine Revelation] emi ẹketọn̄ọde ndikama ke 1965, emi ẹkenyụn̄ ẹsiode ikọ do ẹsịn ke Catechism Ufọkabasi Catholic ọdọhọ ete: ‘Ufọkabasi Catholic idaha se mmọ ẹnịmde ke akpanikọ ito Edisana N̄wed Abasi kpọt. Ke ntre, inyene ndinam se mme ete ete nnyịn ẹkesinamde ye se Edisana N̄wed Abasi ọdọhọde.’ Ibuotikọ kiet ke magazine oro ẹkotde Maclean’s ama etịn̄ nte ọkwọrọikọ kiet ke Toronto ke Canada okobụpde ete: “Ntak emi ikposụk itienede Bible emi ẹkewetde ke se ibede isua tọsịn iba idahaemi? Nnyịn imenyenyene akpakịp ifiọk idem nnyịn emi ikọ Jesus ye N̄wed Abasi mîyakke itiene.”

New Catholic Encyclopedia etịn̄ ntem aban̄a Mme Ntiense Jehovah: “Mmọ ẹda Bible nte n̄kukụre ebiet edinịm ke akpanikọ mmọ ye ibet ido uwem.” Ndondo emi, ke ini n̄wan Ntiense kiet okoyomde nditịn̄ owo emi imọ idide nnọ ete kiet ke Canada, ete oro ama esịbe enye ikọ ke inua onyụn̄ anyan ubọk ke Bible esie ete: “Mmọfiọk ke afo edi kiet ke otu Mme Ntiense Jehovah. Bible emi akamade ke ubọk do anam mfiọk.”