“Ini Eke Ẹmade ye Ini Eke Ẹsuade”

“ABASI edi ima.” Ediwak owo ẹsiwet ikọ emi ẹdian ke ufọk mmọ. Ata nnennen nnennen usụn̄ nditịn̄ nte Abasi etiede edi emi sia idụhe eke amade ima nte Abasi.

Ediwak owo idiọn̄ọke ke ikọ emi oto Bible. Apostle John eketịn̄ ikọ emi; enye ekewet ete: “Owo eke mîmaha ima ifiọkke Abasi, koro Abasi edi ima.” (1 John 4:8) John ama ewet n̄ko aban̄a nte Abasi amade ubonowo, ete: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.”—John 3:16.

Ndusụk owo ẹkeme ndikere ke Abasi idọn̄ke enyịn ke se ededi oro inamde sia enye edide ima. N̄ko nte ediwak owo ẹdude uwem owụt ke mmọ ẹkere ke Abasi idinamke mmimọ n̄kpọ ndomokiet ekpededi idu uwem didie. Edi, ndi mmọ ẹnen? Ndi Abasi amama kpukpru owo, edide eti m̀mê idiọk? Ndi enyene ini emi Abasi esisuade owo?

Se Abasi Amade ye Se Enye Asuade

Enyene-ọniọn̄ Edidem Solomon ọkọdọhọ ete: “Ẹmenịm ini ẹnọ kpukpru n̄kpọ, ẹmenịm ini ẹnọ kpukpru n̄kpọ ke idak ikpaenyọn̄ . . . ini eke ẹmade ye ini eke ẹsuade.” (Ecclesiastes 3:1, 8) Itien̄wed emi owụt ke kpa ye emi Abasi enyenede ima onyụn̄ ọfọnde ido, ke enyene mme ini emi enye esisuade n̄kpọ.

Akpa kan̄a, nso ke Bible okot usua? N̄wed kiet ọbọrọ ete: “Ke ini ẹtịn̄de ẹban̄a usua ke Bible, enye ọwọrọ ata ediwak n̄kpọ. Enye ekeme ndiwọrọ ndinam n̄kpọ ata idiọk idiọk ye owo ke ntak udu. Utọ usua emi ekeme ndinam owo oyom ndinam owo emi enye asuade ibak.” Usua enye emi ke nnyịn isisọp ikụt, ndien imokụt utịp esie ke ofụri ererimbot emi. N̄wed oro ọdọhọ n̄ko ke ‘owo ekeme ndinen̄ede nsua n̄kpọ edi ikereke idiọk iban̄a n̄kpọ oro.’

Ọyọhọ usua iba emi ke iyom ndineme mban̄a ke ibuotikọ emi. Enye edi ndinen̄ede nsua ido owo, edi usịnke owo oro ke esịt unyụn̄ ukereke ndinam enye ibak. Ndi Abasi ekeme ndisua n̄kpọ ntem? Kop se Mme N̄ke 6:16-19 etịn̄de mi: “Odu n̄kpọ itiokiet emi Jehovah asuade; ih, n̄kpọ itiaba emi ẹdide mbubiam ẹnọ ukpọn̄ esie: enyịn ntan̄idem, edeme nsu, ubọk eke ọduọkde iyịp eke mîduehe, esịt eke aduakde ibak, ukot eke ọsọpde aka ndinam idiọk, ntiense nsu eke etịbide nsu, owo ekededi eke edemerede utọk ke otu nditọete.”

Itien̄wed oro owụt ke enyene mme ido emi Abasi asuade. Edi emi iwọrọke ke enye asua owo emi enyenede ido emi. Enye esiti ke enyene mme n̄kpọ emi ẹkemede ndinam owo anam idiọkn̄kpọ—utọ nte unana  mfọnmma, ebiet emi owo odude, nte ẹkebọkde owo, ye unana ifiọk. (Genesis 8:21; Rome 5:12) Andiwet Mme N̄ke anam emi an̄wan̄a ke ndinọ eti uwụtn̄kpọ emi: “Jehovah [asua] ọnọ owo eke enye amade, kpa nte ete anamde ye eyen eke enemde enye esịt.” (Mme N̄ke 3:12) Ete esisua idiọkido eyen, edi isuaha eyen. Ntre ima emi enye amade eyen esie esinam enye anam se ededi emi enye ekemede man an̄wam eyen emi okpụhọde. Ima esinyụn̄ anam Jehovah anam n̄kpọ ntem ye nnyịn ke ini enye okụtde ke imekeme ndikpụhọde.

Ini Emi Abasi Esisuade Owo

Edi nso kaban̄a owo emi ọdiọn̄ọde uduak Abasi edi esịn ndinam? Abasi isimaha utọ owo emi. Edieke enye okoide-koi anam n̄kpọ emi Jehovah asuade, ini oro ndien ke Abasi edisua enye. Ke uwụtn̄kpọ, Bible ọdọhọ ete: “Jehovah odụn̄ọde edinen owo ọkọrọ ye idiọkowo, ndien ukpọn̄ Esie asasua owo ekededi eke amade afai.” (Psalm 11:5) Leta emi apostle Paul ekewetde ọnọ mme Christian oro ẹkedide nditọ Hebrew owụt ke Abasi isifenke inọ utọ owo nsọn̄ibuot emi. Paul ekewet ete: “Edieke nnyịn ikoide-koi ika iso inam idiọkn̄kpọ ke ima ikọbọ nnennen ifiọk akpanikọ, uwa ndomokiet idụhe aba inọ mme idiọkn̄kpọ, edi idotenyịn ubiomikpe eke enyenede ndịk odu ye ikan̄-ikan̄ ufụp eke editade mmọ emi ẹbiọn̄ọde Abasi.” (Mme Hebrew 10:26, 27) Nso ikpanam Abasi ima anam n̄kpọ ntem?

Edieke owo okoide-koi anam akamba idiọkn̄kpọ, ido emi ekeme ndinen̄ede mmehe enye nnyụn̄ mbiat enye tutu enye ikemeke aba nditre ido emi. Bible ọdọhọ ke utọ mbon emi ẹtie nte anawụri ekpe emi mîkemeke ndikpụhọde n̄kem. (Jeremiah 13:23) Bible n̄ko ọdọhọ ke mmọ ẹnam “nsinsi idiọkn̄kpọ” emi Abasi mîdifenke tutu amama.—Mark 3:29.

Utọ idiọkn̄kpọ emi ke Adam ye Eve ye Judas Iscariot ẹkenam. Inyeneke se ẹkemede nditịn̄ nnyan̄a Adam ye Eve sia mmọ ẹkedi mfọnmma ndien ibet emi Abasi ọkọnọde mmọ ekedi nnennen ibet emi akan̄wan̄ade mmọ; ke ntre mmọ ẹkekokoi ẹsọn̄ ibuot ye Abasi. Se Abasi eketịn̄de ye mmọ ke mmọ ẹma ẹkenam idiọkn̄kpọ owụt ke ufọn ikodụhe mmọ ndikabade esịt. (Genesis 3:16-24) Okposụkedi emi Judas ekedide anana-mfọnmma owo, enye ama enen̄ede ekpere Eyen Abasi idem, edi kpa ye oro, ada Eyen Abasi ọnọ. Jesus ke idemesie okokot Judas, “eyen nsobo.” (John 17:12) Bible owụt n̄ko ke ebịghi Devil ọkọtọn̄ọ ndikokoi  mbak ibak, ntre ke enye etie ebet nsobo. (1 John 3:8; Ediyarade 12:12) Abasi asasua kpukpru mbon oro isiakde mi.

Edi ata n̄kpọ ndọn̄esịt ndifiọk ke ndusụk mme anamidiọk ẹkeme ndikpụhọde. Jehovah edi Abasi ime, isidatke enye esịt ndinọ mbon emi ẹnamde idiọkn̄kpọ ke unana ifiọk ufen. (Ezekiel 33:11) Enye ọdọhọ mmọ ẹkabade esịt man imọ ifen inọ mmọ. Bible ọdọhọ ete: “Yak idiọkowo ọkpọn̄ usụn̄ esie, owo ibak onyụn̄ ọkpọn̄ mme ekikere esie; yak enye onyụn̄ afiak etiene Jehovah, emi edituade enye mbọm, onyụn̄ etiene Abasi nnyịn, koro enye eyefen ke akamba usụn̄.”—Isaiah 55:7.

Nnennen Usụn̄ Ndise Ima ye Usua

Sia ata mme Christian ẹkpebede Abasi, mmọ ẹkpenyene ndidiọn̄ọ “ini eke ẹmade ye ini eke ẹsuade.” Ima emi imade owo ekeme ndikịm nnyịn enyịn tutu nnyịn idiọn̄ọke aba ini emi ikpasuade n̄kpọ ye ini ikpowụtde mbọm. Ikọ Jude mbet Jesus ekeme ndin̄wam nnyịn idiọn̄ọ ini emi ikpowụtde mbọm ye nte ikpasuade idiọkn̄kpọ. Enye ọkọdọhọ ete: “Ẹka iso nditua [mme owo] mbọm, ẹnyụn̄ ẹkpeme idem nte ẹnamde emi, ndien ẹsua kpa ọfọn̄ idakidem oro obụkidem anamde edehe.” (Jude 22, 23) Ke ntre, ikpenyene ndisua idiọkn̄kpọ, idịghe anamidiọk.

Bible ọdọhọ mme Christian ẹma mme asua mmọ, ẹnyụn̄ ẹfọn ido ye mmọ. Jesus ọkọdọhọ ete: “Ẹka iso ẹma mme asua mbufo ẹnyụn̄ ẹbọn̄ akam ẹyom ufọn mmọ eke ẹkọbọde mbufo.” (Matthew 5:44) Emi anam Mme Ntiense Jehovah ẹka iso ẹkwọrọ eti mbụk Obio Ubọn̄ ẹnọ mme owo, kpa ye emi ndusụk mmọ mînamke n̄kpọ ndomokiet iban̄a etop emi. (Matthew 24:14) Mme Ntiense Jehovah ẹda owo ekededi oro mmọ ẹsobode nte Bible adade, oro edi, nte owo emi Jehovah ekemede ndima nnyụn̄ ntua mbọm. Ke ini mme owo mîmaha se mmọ ẹkwọrọde m̀mê ẹkọbọde mmọ, Mme Ntiense ẹsinam se apostle Paul eketemede ete: “Ẹka iso ẹdiọn̄ mmọ oro ẹkọbọde mbufo; ẹdọdiọn̄ ẹkûsosụn̄i . . . Ẹkûda idiọk ẹsio owo usiene idiọk.” (Rome 12:14, 17) Mmọ ẹfiọk ẹte ke Jehovah enyene ndibiere mbon emi enye amade ye mbon emi enye asuade. Enye edibiere mbon emi ẹdidude uwem ye mbon emi ẹdisobode.—Mme Hebrew 10:30.

Ih, “Abasi edi ima.” Ntre, ikpenyene ndikọm enye ke ima esie nnyụn̄ nsịn ifịk n̄kpep uduak esie nnyụn̄ nnanam. Mme Ntiense Jehovah ke edem mbufo ẹyema ndida Bible fo n̄wụt fi se idide uduak Abasi ye nte akpadade enye odu uwem. Ndinam emi ayanam Abasi ama fi utu ke ndisua fi.

[Se ẹwetde ke ikpọ abisi ke page 23]

“Odu n̄kpọ itiokiet emi Jehovah asuade; ih, n̄kpọ itiaba emi ẹdide mbubiam ẹnọ ukpọn̄ esie: enyịn ntan̄idem, edeme nsu, ubọk eke ọduọkde iyịp eke mîduehe, esịt eke aduakde ibak, ukot eke ọsọpde aka ndinam idiọk, ntiense nsu eke etịbide nsu, owo ekededi eke edemerede utọk ke otu nditọete.”—MME N̄KE 6:16-19

[Se ẹwetde ke ikpọ abisi ke page 24]

“Edieke nnyịn ikoide-koi ika iso inam idiọkn̄kpọ ke ima ikọbọ nnennen ifiọk akpanikọ, uwa ndomokiet idụhe aba inọ mme idiọkn̄kpọ, edi idotenyịn ubiomikpe eke enyenede ndịk odu ye ikan̄-ikan̄ ufụp eke editade mmọ emi ẹbiọn̄ọde Abasi.”—MME HEBREW 10:26, 27

[Se ẹwetde ke ikpọ abisi ke page 25]

“Yak idiọkowo ọkpọn̄ usụn̄ esie, owo ibak onyụn̄ ọkpọn̄ mme ekikere esie; yak enye onyụn̄ afiak etiene Jehovah, emi edituade enye mbọm, . . . koro enye eyefen ke akamba usụn̄.”—ISAIAH 55:7

[Ndise ke page 24]

Ete emi amade eyen esitụnọ eyen esie man enye okpụhọde

[Ndise ke page 25]

Ediwak mbon emi ẹdude ke ufọk-n̄kpọkọbi ẹkụt ima ye mbọm Abasi