Nte Jesus Edi Ata Ọkpọsọn̄ Abasi?
Nte Jesus Edi Ata Ọkpọsọn̄ Abasi?
Se ẹsiwakde ndibọrọ:
▪ “Ih, Jesus edi Ata Ọkpọsọn̄ Abasi.”
▪ “Jesus ekedi Abasi ke mbiet owo.”
Jesus ọkọdọhọ didie?
▪ “Edieke mbufo ẹmade mi, mbufo ẹkpedara nte ke ami nnyọn̄ ntiene Ete, koro Ete omokpon akan mi.” (John 14:28) Jesus ọkọdọhọ ke imọ idịghe n̄ka ye Ete imọ.
▪ “Mmọn̄ ndọk mbịne Ete mi ye Ete mbufo, Abasi mi ye Abasi mbufo.” (John 20:17) Jesus ikọdọhọke ke imọ idi Abasi edi ọkọdọhọ ke Abasi edi Owo en̄wen.
▪ “Ntịn̄ke n̄kpọ emi ke ekikere idemmi, edi Ete emi ọkọdọn̄de mi ọmọnọ mi ewụhọ aban̄a se ndọhọde ye se ntịn̄de.” (John 12:49) Se Jesus ekekpepde okoto Ete esie, ikotoho Jesus ke idemesie.
JESUS ọkọdọhọ ke imọ idi Eyen Abasi, idịghe Ata Ọkpọsọn̄ Abasi. Edieke Jesus ekpedide Abasi, enye ọkọbọn̄ akam ọnọ anie ke ini enye okodude ke isọn̄? (Matthew 14:23; 26:26-29) Ke akpanikọ, Jesus ikanamke-nam nte itịn̄ ikọ inọ owo en̄wen!
Ke ini mbet Jesus iba ẹkedọhọde enye ọnọ mmimọ san̄asan̄a itie ke Obio Ubọn̄ esie, enye ọkọbọrọ mmọ ete: “Editie ke nnasia mi ye ke ufien mi inyeneke mi ndinọ, edi enyene mbon emi Ete mi eketịmde oro ọnọ.” (Matthew 20:23) Ndi Jesus okososu ke ini ọkọdọhọde mmọ ke imọ inyeneke unen ndinọ mmọ se mmọ ẹkeben̄ede? Nsa-o! Utu ke oro, enye okosụhọrede idem asian mmọ ke Abasi ikpọn̄ enyene unen ndinam mme utọ ubiere oro. Jesus ama akam ọdọhọ ke enyene ndusụk n̄kpọ oro imọ m̀mê mme angel mîfiọkke edi Ete imọ ikpọn̄ ọfiọk.—Mark 13:32.
Nte Abasi okokpon akan Jesus n̄kukụre ke ini Jesus ekedide isọn̄ nte owo? Baba. Bible ọdọhọ ke Abasi osụk okpokpon akan Jesus, idem ke enye ama akakpa onyụn̄ eset. Apostle Paul eti nnyịn ete ke “Abasi okpon akan Christ.” (1 Corinth 11:3, Today’s English Version) Bible etịn̄ se iditịbede ke ini iso ete: “Ke ini ẹdinamde kpukpru n̄kpọ ẹdu [Christ] ke idak, adan̄aoro [enye] Eyen ke idemesie n̄ko oyosụk idem ọnọ [Abasi] emi akanamde kpukpru n̄kpọ ẹdu enye ke idak, man Abasi ekpedi kpukpru n̄kpọ ọnọ kpukpru owo.”—1 Corinth 15:28.
Ana in̄wan̄-in̄wan̄ nte ke Jesus idịghe Ata Ọkpọsọn̄ Abasi. Ntak edi oro enye okokotde Ete esie “Abasi mi.”—Ediyarade 3:2, 12; 2 Corinth 1:3, 4. *
[Ikọ Idakisọn̄]
^ ikp. 12 Edieke oyomde ntọt efen efen ke ibuotikọ emi, se page 201-204 ke n̄wed Nso ke Bible Enen̄ede Ekpep? emi Mme Ntiense Jehovah ẹsiode.
[Se ẹwetde ke ikpọ abisi ke page 7]
Jesus ọkọdọhọ ke enyene ndusụk n̄kpọ oro imọ m̀mê mme angel mîfiọkke edi Ete imọ ikpọn̄ ọfiọk