Nte Abasi Enyene Enyịn̄?
Nte Abasi Enyene Enyịn̄?
Se ẹsiwakde ndibọrọ:
▪ “Enyịn̄ esie edi Abasi.”
▪ “Enye inyeneke ọkpọkpọ enyịn̄.”
Jesus ọkọdọhọ didie?
▪ “Mbufo ẹnyene ndibọn̄ akam ntem, ndien, ẹte: ‘Ete nnyịn emi odude ke heaven, yak ẹnam enyịn̄ fo asana.’” (Matthew 6:9) Jesus ama enịm ke Abasi enyene enyịn̄.
▪ “Ami mmonyụn̄ nnam mmọ ẹfiọk enyịn̄ fo nyonyụn̄ nnam mmọ ẹfiọk, man ima oro afo akamade mi okpodu ye mmọ, ami n̄kponyụn̄ ndu ke ebuana ye mmọ.” (John 17:26) Jesus ama anam ẹdiọn̄ọ enyịn̄ Abasi.
▪ “Mbufo idikwe mi tutu mbufo ẹdọhọ ẹte, ‘Itoro enyene enye emi edide ke enyịn̄ Jehovah!’” (Luke 13:35; Psalm 118:26) Jesus ama esikot enyịn̄ Abasi.
ABASI ke idemesie asian nnyịn enyịn̄ esiemmọ. Enye ọdọhọ ke Bible ete: “Ami ndi Jehovah; enyịn̄ mi edi oro.” * (Isaiah 42:8) Enyịn̄ oro Jehovah edi nte ẹkabarede enyịn̄ usem Hebrew emi Abasi ọnọde idemesie ke Ikọ Efịk. Idem ekeme ndikpa fi ndifiọk ke san̄asan̄a enyịn̄ usem Hebrew emi odu ke ediwak tọsịn itie ke mme uwetn̄kpọ Bible eset. Ke nditịm ntịn̄, enyịn̄ oro awak akan enyịn̄ ekededi oro ẹsiakde ke Bible.
Edieke ẹbụpde ẹte, “Nso idi enyịn̄ Abasi?” Ndusụk owo ẹkeme ndibọrọ, “Abasi.” Ke akpanikọ, etie ukem ukem nte emi ẹkpebụpde ẹte, “Anie eketem udia emi?” ndien ẹbọrọ ẹte, “etemudia.” Ibọrọ mbiba emi idịghe akpan ibọrọ sia “Abasi” ye “etemudia” mîdịghe enyịn̄ owo.
Ntak emi Abasi akasiande nnyịn enyịn̄ esie? Enye akasian nnyịn man ikpekeme ndinen̄ede mfiọk enye. Ke uwụtn̄kpọ, ẹkeme ndikot owo Ete, Eteutom, Papa, m̀mê Ete Ete, etiene idaha. Udorienyịn̄ emi ẹsian nnyịn n̄kpọ ẹban̄a owo oro. Edi enyịn̄ owo eti nnyịn kpukpru n̄kpọ oro idiọn̄ọde iban̄a enye. Kpasụk ntre, mme utọ udorienyịn̄ nte Ọbọn̄, Ata Ọkpọsọn̄, Ete, ye Andibot ẹnam nnyịn iti nsio nsio n̄kpọ oro Abasi anamde. Edi Jehovah, kpa ọkpọkpọ enyịn̄ esie, anam nnyịn iti kpukpru n̄kpọ oro ifiọkde iban̄a enye. Owo akpasasan̄a didie enen̄ede ọfiọk Abasi edi ifiọkke enyịn̄ esie?
Ọfọn ifiọk enyịn̄ oro inyụn̄ isikot enye. Ntak-a? Koro Bible ọdọhọ nnyịn ete: “Ẹyenyan̄a owo ekededi eke edisemede okot enyịn̄ Jehovah.”—Rome 10:13; Joel 2:32.
[Ikọ Idakisọn̄]
^ ikp. 9 Edieke oyomde ndifiọk se enyịn̄ Abasi ọwọrọde, ọkọrọ ye ntak emi owo mîwetke enyịn̄ oro ke ndusụk edikabade Bible, afo emekeme ndise page 195-197 ke n̄wed Nso ke Bible Enen̄ede Ekpep? emi Mme Ntiense Jehovah ẹsiode.
[Se ẹwetde ke ikpọ abisi ke page 6]
Ẹkeme ndikot owo Ete, Eteutom, Papa, m̀mê Ete Ete, etiene idaha. Edi ọkpọkpọ enyịn̄ esie eti nnyịn kpukpru n̄kpọ oro idiọn̄ọde iban̄a enye