Ẹyak “Ida Enọ Isọk Jehovah”

KE INI owo ọfọnde mfọn ye afo, didie ke esiwụt esịtekọm? Yak ineme nte ikpọ mbonekọn̄ ke Israel ẹkewụtde esịtekọm ke ẹma ẹkekụre ekọn̄ ye mbon Midian. Ẹken̄wana ekọn̄ emi ke Israel ẹma ẹkenam idiọkn̄kpọ ẹtiene Baal-peor. Abasi ama anam ikọt esie ẹkan, ndien ẹma ẹdeme mbụme ke otu mbonekọn̄ 12,000 ye nditọ Israel eken. Mbonekọn̄ oro ẹma ẹbahade mbụme ẹnọ mme oku nte Jehovah ọkọdọhọde, ndien nditọ Israel eken ẹnyụn̄ ẹbahade ukem ukem emi ẹnọ nditọ Levi.—Num. 31:1-5, 25-30.

Edi mme etubom mbonekọn̄ ẹma ẹyom ndinam n̄kan oro. Mmọ ẹma ẹdọhọ Moses ẹte: “Nnyịn ikọt fo imabat mbon ekọn̄ emi ẹdude nnyịn ke ubọk, ndien owo nnyịn baba kiet ikatakke.” Mmọ ẹma ẹbiere ndinọ Jehovah n̄kpọmbana gold ye nsio nsio n̄kpọmbana. Ndien ofụri gold emi ama aka  ndidobi nte ekpat simen inan̄.—Num. 31:49-54.

Mfịn n̄ko, ediwak owo ẹsima ndiwụt esịtekọm ke se Jehovah anamde ọnọ mmọ. N̄ko, idịghe mme asan̄autom Jehovah kpọt ẹsiwụt esịtekọm ntem. Yak ida awat a-bọs kiet ke uwụtn̄kpọ. Enye ekemen Mme Ntiense Jehovah aka mbono ofụri ererimbot eke 2009, emi ẹkenịmde ke an̄wambre Bologna ke Italy. Mmọ ẹma ẹnen̄ede ẹma ubọk uwat esie tutu ẹnọ enye ekpri kad ekọm ẹnyụn̄ ẹdian ekpri n̄kpọ ẹnọ enye, ye n̄wed Nso ke Bible Enen̄ede Ekpep? Awat a-bọs oro ama ọdọhọ ete: “Mmadara ndibọ kad emi ye n̄wed emi, edi amaedi okụk emi, mbọk ẹda enye ẹdian ẹka iso ẹnam utom Abasi mbufo. Okposụkedi emi mmendịghe kiet ke otu Mme Ntiense Jehovah, nyom ndinọ etịbe mi sia mmokụt ke ima anam mbufo ẹnam kpukpru se ẹnamde.”

Edieke okopde inemesịt ke se Jehovah anamde ọnọ fi, usụn̄ kiet ndiwụt emi edi nditịp n̄kpọ nsịn ke utom Abasi oro Mme Ntiense Jehovah ẹnamde ke ofụri ererimbot. (Matt. 24:14) Imewet mme usụn̄ oro ndusụk owo ẹsinamde emi ke ekebe idak emi.

[Ekebe/Ndise ke page 20, 21]

MME USỤN̄ EMI NDUSỤK OWO ẸMEKDE NDINỌ ENỌ

MME ETỊBE KABAN̄A UTOM OFỤRI ERERIMBOT

Ediwak owo ẹsinịm, mîdịghe ẹnam ndutịm ẹban̄a okụk oro mmọ ẹdisịnde ke ekebe etịbe oro ẹdiande idiọn̄ọ emi: “Worldwide Work.”

Ke ọfiọn̄ kiet kiet, mme esop ẹsinọ okụk emi aka ọfis Mme Ntiense Jehovah emi esede aban̄a idụt mmọ. Emekeme n̄ko ndinọ okụk imaesịt nnennen ẹsọk n̄kọk itieutom Mme Ntiense Jehovah oro esede aban̄a idụt mbufo. Ẹkpenyene ndiwet “Watch Tower” ke babru okụk ban̄k oro ẹnọde. Ẹkeme ndinọ n̄ko mme n̄kpọuto m̀mê mme ọsọn̄urua n̄kpọ eken. Mme utọ etịbe oro ẹkpenyene ndisan̄a ye ibio ibio leta oro owụtde in̄wan̄-in̄wan̄ nte ke emi edi enọ.

ENỌ EMI ẸDIOMIDE-DIOMI

Ke adianade ye edinọ okụk nte enọ, mme usụn̄ enọ efen ẹdu oro ẹkemede ndida nnam utom Obio Ubọn̄ ke ofụri ererimbot. Emi ẹsịne:

Insurance: Ẹkeme ndiwet enyịn̄ Watch Tower nte andibọ ufọn insurance m̀mê okụk ukpọn̄ utom.

Okụk Oro Ẹsịnde ke Itie Unịm Okụk: Ẹkeme ndinam okụk oro ẹsịnde ke itie unịm okụk, n̄wed oro ẹwetde okụk oro ẹsịnde ke itie unịm okụk ẹyom udori, m̀mê okụk ukpọn̄ utom owo odu ke enyịn̄ Watch Tower, mîdịghe ẹnam ẹkpe enye ẹnọ Watch Tower ke ini andinyene akpade, nte ekemde ye ndutịm itie unịm okụk n̄kann̄kụk.

Inyene ye Mbubehe: Ẹkeme ndinọ Watch Tower inyene ye mbubehe nte enọ, mîdịghe ẹnam ẹkpe enye ẹnọ Watch Tower ke ini andinyene akpade.

Isọn̄ ye Ufọk: Ẹkeme ndinọ isọn̄ ye ufọk oro ẹkemede ndinyam, edide nte enọ m̀mê, edieke edide ufọk emi owo odụn̄de, man ẹmụm isọn̄ ye ufọk oro ẹkama ẹnọ andinọ, emi ekemede ndisụk n̄ka iso ndụn̄ do ke eyouwem esie. Tọt n̄kọk itieutom idụt mbufo mbemiso ayakde isọn̄ m̀mê ufọk ekededi ọnọ Watch Tower.

Unen N̄kpọ-Akpa ye Mme Ebuọt: Ẹkeme ndiyak inyene m̀mê okụk nnọ Watch Tower ke ndinọ enye unen oro ekemde ye ibet ndidia n̄kpọ-akpa, mîdịghe ẹkeme ndiwet enyịn̄ Watch Tower nte adia-ufọn ke n̄wed ebuọt.

Nte ikọ oro “enọ emi ẹdiomide-diomi” owụtde, oyom andinọ utọ enọ emi anam ndutịm.

Edieke oyomde ntọt efen efen, emekeme ndinyene nneme ye N̄kọk Itieutom Mme Ntiense Jehovah ke Nigeria, edide ke ndiwewet m̀mê ke ndikot ke urụk ukopikọ, ke adres emi ẹwetde ke idak emi mîdịghe emekeme ndinyene nneme ye n̄kọk itieutom emi esede aban̄a idụt mbufo.

Jehovah’s Witnesses

P.M.B. 1090,

Benin City 300001,

Edo State, Nigeria.

Telephone: 07080662020