Mme Mbụme Ẹtode Mme Andikot

Ẹkedọhọ mme Jew ke Nehemiah 8:10 ẹte ‘ẹta isek,’ okposụkedi emi Ibet oro odude ke Leviticus 3:17 ọkọdọhọde ete: “Ẹkûta baba ikpọn̄.” Asan̄a didie edi ntre?

Ke akpasarade usem oro ẹkedade ẹwet Bible, ikọ oro ẹkabarede “isek” ke Nehemiah 8:10 edi isio ye ikọ oro ẹkabarede “ikpọn̄” ke Leviticus 3:17. Ikọ Hebrew oro che’lev, oro ẹkabarede “ikpọn̄” ke Leviticus 3:17, edi ikpọn̄ unam m̀mê eke owo. (Lev. 3:3; Judg. 3:22) Se ẹnemede ke ufan̄ikọ 17 owụt ke nditọ Israel ikenyeneke ndita ikpọn̄ emi ẹfụhọde ke n̄kpọ esịt idịbi ye ekpụt unam uwa m̀mê ikpọn̄ emi adianade ke isịn koro ‘ẹfọp ofụri ikpọn̄ ẹnọ Jehovah.’ (Lev. 3:14-16) Ntre, owo ikenyeneke ndita ikpọn̄ oro okodude ke idem unam oro ẹkenyenede ndiwa nnọ Jehovah.

Edi ikọ oro ẹkabarede “isek” ke Nehemiah 8:10 edi mash·man·nimʹ, ndien itie kiet emi kpọt ke ikọ emi odu ke N̄wed Abasi Usem Hebrew. Ẹda enye ẹto ikọedinam oro sha·men’, emi ọwọrọde “kpon ubom m̀mê ye idem.” Etie nte ikọ emi enyene ebuana ye ikọedinam oro ọwọrọde uforo ye nsọn̄idem. (Men Isaiah 25:6 domo.) Kiet ke otu ọsọ ikọ oro ẹsidade ẹto ikọedinam emi edi ikọenyịn̄ oro she’men, emi ẹsiwakde ndikabarede “aran,” emi esịnede ke ikọ oro “aran olive.” (Deut. 8:8; Lev. 24:2) Nte ẹtịn̄de ẹban̄a ke Nehemiah 8:10, etie nte mash·man·nim’ edi udia oro ẹdade ata ediwak aran ẹtem onyụn̄ ekeme ndidi ama esịne unam oro esinyenede isek, edi idịghe ata ikpọn̄ unam.

Okposụkedi emi ẹkekpande nditọ Israel ẹte ẹkûta ikpọn̄ unam, mmọ ẹma ẹkeme ndidia nti inem inem udia. Owo ikesidaha isek unam item ndusụk n̄kpọ nte uyo emi ẹdade ibokpot ẹnam, edi ẹkesida aran, ndien ekesiwak ndidi aran olive. (Lev. 2:7) Ntem, Insight on the Scriptures ọdọhọ ke “isek” oro ẹtịn̄de ẹban̄a mi “edi isek isek udia, idịghe n̄kpọ oro asatde-sat, edi edi ndinem udia, emi esịnede udia oro ẹdade aran ẹtem.”

Edi mme Christian ẹfiọk ẹte ke edikpan ẹte ẹkûta ikpọn̄ ekesịne ke otu Ibet oro ẹkenọde. Mmọ idụhe ke idak Ibet, emi esịnede mme n̄kpọ oro ẹban̄ade ediwa unam.—Rome 3:20; 7:4, 6; 10:4; Col. 2:16, 17.