Rome 7;1-25
7 M̀mê nte mbufo ifiọkke, nditọete, (koro ntịn̄ nnọ mbon oro ẹfiọkde ibet,) ite ke Ibet akara owo adan̄a nte enye odude uwem?+
2 Ke uwụtn̄kpọ, ibet ọbọp n̄wan emi ọdọde ndọ adian ye ebe esie adan̄a nte ebe odude uwem; edi edieke ebe esie akpade, enye atara ke ibet ebe esie.+
3 Ntre, ndien, ke adan̄aemi ebe esie odude uwem, ẹdikot enye esịn efịbe edieke enye ọdọde owo efen.+ Edi edieke ebe esie akpade, enye ọwọrọ ke ibet esie, ntre enye idịghe esịn efịbe edieke enye ọdọde owo efen.+
4 Ntre, nditọete mi, ẹkeda idem Christ ẹnam mbufo n̄ko ẹkpan̄a ẹwọn̄ọ ke idak Ibet+ man mbufo ẹkpekabade ẹdi eke owo efen,+ kpa enye emi ẹkenamde eset ke n̄kpa,+ man nnyịn ikpon̄wụm mfri+ inọ Abasi.
5 Koro ke ini nnyịn ikodude uwem nte ekemde ye obụkidem,+ ndiọi udọn̄ oro Ibet akanamde ẹyararede ẹkenam utom ke ndido idem nnyịn man nnyịn ikposion̄o mfri n̄kpa.+
6 Edi ke emi ẹnam nnyịn ibọhọ Ibet,+ koro nnyịn ikakpade+ ke se ikọsọn̄ọde imụm nnyịn ikama, man nnyịn ikpedi ifịn+ ke obufa usụn̄ ebe ke spirit,+ inyụn̄ idịghe ke akani usụn̄ ebe ke ibet oro ẹwetde-wet.+
7 Nso, ndien, ke ididọhọ? Nte Ibet edi idiọkn̄kpọ?+ Baba-o! Ke akpanikọ n̄kpọfiọkke idiọkn̄kpọ+ ke mîkpotoho ke Ibet; ke uwụtn̄kpọ, n̄kpọfiọkke edisịn esịt ke n̄kpọ owo+ ke Ibet mîkpọdọhọke ite: “Kûsịn esịt ke n̄kpọ owo.”+
8 Edi, ewụhọ anam idiọkn̄kpọ okụt ifet+ ndinam esịt mi ọyọhọ ye kpukpru orụk edisịn esịt ke n̄kpọ owo, koro ke ibet mîdụhe, idiọkn̄kpọ akpa.+
9 Ke akpanikọ, mma ndu uwem ini kiet ko ke ini ibet mîkodụhe;+ edi ke ini ewụhọ ekedide edisịm,+ idiọkn̄kpọ ama afiak edidu uwem, ndien ami n̄kpa.+
10 Edi mmedikụt ke ewụhọ emi ẹkenọde ndida ndu uwem,+ amakabade ada n̄kpa edi.+
11 Koro ewụhọ anamde idiọkn̄kpọ okụt ifet abian̄a+ mi onyụn̄ owot mi.
12 Edi, Ibet edi edisana,+ ewụhọ onyụn̄ asana onyụn̄ enen+ onyụn̄ ọfọn.+
13 Nte se ifọnde ama akabade edi n̄kpa ọnọ mi? Baba-o! Edi idiọkn̄kpọ akakabade edi n̄kpa, man ẹkpewụt ke idiọkn̄kpọ ada se ifọnde anam n̄kpa esịm mi;+ man ewụhọ anam idiọkn̄kpọ ọdọdiọn̄ ọdiọk.+
14 Koro nnyịn imọfiọk ite Ibet edi eke spirit;+ edi ami ndi obụkidem, emi ẹkenyamde ẹsịn ke idak idiọkn̄kpọ.+
15 Koro ami mfiọkke se ami nnamde. Koro se nyomde ndinam, idịghe oro ke nnam; edi se nsuade ke nnam.
16 Edi, edieke edide se mmenyomke ndinam kpa oro ke nnam,+ mmenyịme nte Ibet ọfọn.+
17 Edi ke emi idịghe aba ami nnam oro, edi edi idiọkn̄kpọ oro odụn̄de mi ke idem.+
18 Koro mmọfiọk nte ke eti n̄kpọ ndomokiet idụn̄ke mi ke idem, oro edi, ke obụkidem mi;+ koro ukeme ndiyom+ ndinam n̄kpọ odu ye ami, edi ukeme ndinanam+ se ifọnde idụhe.
19 Koro ami nnamke eti n̄kpọ oro nyomde ndinam,+ edi idiọkn̄kpọ oro mmenyomke ndinam kpa oro ke nnam.
20 Edieke mmenamke se nyomde ndinam, idịghe aba ami nnam oro, edi edi idiọkn̄kpọ oro odụn̄de mi ke idem.+
21 N̄kụt, ndien, ibet emi mban̄a idem mi: nte ke ini nyomde ndinam se inende,+ se idiọkde odu ye ami.+
22 Mmenen̄ede ndara+ ibet Abasi ke ọwọn̄esịt mi,
23 edi n̄kụt ibet efen ke ndido idem mi+ nte an̄wanade+ ye ibet oro odude mi ke esịt+ onyụn̄ adade mi nte mbuotekọn̄ ọnọ ibet idiọkn̄kpọ+ emi odude ke ndido idem mi.
24 Owo nditaha nte ami! Anie edinyan̄a mi osio ke ikpọkidem n̄kpa emi?+
25 Mmọkọm Abasi ke Jesus Christ Ọbọn̄ nnyịn!+ Ntre, ndien, ke ekikere mi ndi ofụn nnọ ibet Abasi,+ edi ke obụkidem mi ndi ofụn nnọ ibet idiọkn̄kpọ.+
