Ka Iso Nyene ‘Edisana Idaha ebe ke Ndibak Abasi’

BIBLE ọdọhọ ke Jehovah Abasi asana ke kpukpru usụn̄, ete: “Edisana, edisana, edisana Jehovah.” (Isa. 6:3; Edi. 4:8) Ikọ Hebrew ye eke Greek oro ẹkabarede “edisana idaha” ọwọrọ ediden̄i m̀mê edinana ndo ke ido ukpono, edisio nnịm san̄asan̄a mbak n̄kpọ edisabade. Edisana idaha Abasi edi mfọnmma edu esie.

Nte Jehovah, kpa edisana Abasi, ikpoyomke mbon oro ẹtuakde ibuot ẹnọ imọ ẹsana ke ikpọkidem, ke ido uwem, ye ke n̄kan̄ eke spirit? Bible enen̄ede etịn̄ ke Jehovah oyom ikọt imọ ẹsana. Akpa Peter 1:16 ọdọhọ ete: “Ana mbufo ẹdi edisana koro ami ndide edisana.” Ndi mme anana-mfọnmma owo ẹkeme ndinen̄ede n̄kpebe edisana idaha Jehovah? Ih, okposụkedi emi mîdidịghe ke mfọnmma usụn̄. Abasi ekeme ndibat nnyịn ke edisana edieke ituakde ibuot inọ enye ke edisana idaha eke spirit inyụn̄ inyenede ata eti itie ebuana ye enye.

Do, didie ke ikeme ndika iso nsana ke oburobụt ererimbot emi? Mme edinam ewe ke ikpefep? Mme ukpụhọde ewe ke oyom inam ke ikọ inua ye ke edinam? Ẹyak ise se ikemede ndikpep mban̄a emi ke se Abasi okoyomde oto mme Jew oro ẹkenyọn̄de Babylon ẹka obio emana mmọ ke isua 537 M.E.N.

‘Usụn̄ Edinen Owo Oyodu’

Jehovah ama ebem iso etịn̄ ke ikọt imọ oro ẹkedude ke ntan̄mfep ke Babylon ẹyefiak ẹnyọn̄ọ obio emana mmọ. Ntịn̄nnịm ikọ oro aban̄ade edifiak nda ikọt Jehovah ndi obio emana mmọ esịne un̄wọn̄ọ emi: “Ọkpọ-usụn̄ oyodu do, ye usụn̄, ndien enye eyekere usụn̄ edinen owo.” (Isa. 35:8a) Ikọ emi owụt ke Jehovah ama ebererede usụn̄ unyọn̄ ọnọ mme Jew onyụn̄ owụt ke enye ama ọn̄wọn̄ọ n̄ko ke imọ iyekpeme mmọ ke usụn̄ isan̄ oro.

Jehovah ama ebererede “usụn̄ edinen owo” ọnọ mme asan̄autom esie eyomfịn emi ẹdude ke isọn̄ man mmọ ẹwọrọ ke Akwa Babylon, kpa ukara ererimbot eke nsunsu ido ukpono. Ke 1919, enye ama osio mme Christian oro ẹyetde aran ke ufụn nsunsu ido ukpono, ndien mmọ ẹma ẹdianade idem sụn̄sụn̄ ẹkpọn̄ mme nsunsu ukpepn̄kpọ. Sia idide mme andituak ibuot nnọ Jehovah mfịn, nnyịn idu ke esop emi asanade onyụn̄ enyenede ifụre, emi ikemede ndituak ibuot nnọ Jehovah, nnyụn̄ nnyene emem emem itie ebuana ye enye ye ekemmọ owo.

 “Ekpri otuerọn̄” emi ẹdide mme Christian oro ẹyetde aran ye “akwa otuowo” eke mme “erọn̄ en̄wen” oro ẹkade-ka iso ndiwak, ẹmek ndisan̄a ke edisana usụn̄ ẹnyụn̄ ẹdọhọ mbon en̄wen ẹtiene mmimọ ẹsan̄a ke usụn̄ oro. (Luke 12:32; Edi. 7:9; John 10:16) “Usụn̄ edinen owo” ebererede ọnọ kpukpru owo oro ẹnyịmede ‘ndinọ ikpọkidem mmọ nte uwa eke odude uwem, edide edisana, enemde Abasi esịt ndibọ.’—Rome 12:1.

‘Baba Edidehe Owo Kiet Idinyụn̄ Isan̄ake ke Esịt Ibe’

Ke isua 537 M.E.N., ama oyom mme Jew oro ẹkenyọn̄de ẹdi ẹnam ata akpan n̄kpọ. Isaiah 35:8b etịn̄ ntem aban̄a mbon oro ẹdotde ndisan̄a ke “usụn̄ edinen owo” oro, ete: “Baba edidehe [owo] kiet idinyụn̄ isan̄ake ke esịt ibe; ndien eyedi eke mmọ; mbon isan̄, idem mme anana ibuot, [ididụhe].” Sia mme Jew ẹkefiakde ẹnyọn̄ Jerusalem man ẹkefiak ẹtọn̄ọ edisana utuakibuot, itie ndomokiet ikodụhe inọ mbon oro ẹkeyomde udọn̄ idemmọ, mîkokponoke ndisana n̄kpọ, m̀mê oro mîkasanake ke n̄kan̄ eke spirit. Ama oyom mbon oro ẹkefiakde ẹnyọn̄ ẹdu uwem ekekem ye n̄kokon̄ idaha ido uwem Jehovah. Oyom mbon oro ẹyomde mfọn Abasi mfịn ẹdu uwem ntre n̄ko. Ana mmọ ẹka iso ẹnyene ‘edisana idaha ebe ke ndibak Abasi.’ (2 Cor. 7:1) Mmọdo, nso idi mbubiam ido oro anade ifep?

Apostle Paul ekewet ete: “Mme utom obụkidem ẹyarade, ndien mmọ ẹdi use, mbubiam ido, obukpo ido.” (Gal. 5:19) Use edi kpukpru edinam idan̄ oro ẹbuanade owo ndida ndido idan̄ esie nnam n̄kpọ ye owo oro mîdịghe nsan̄a ndọ esie. Obukpo ido esịne “unana edifara ke idem, akpan akpan ke mme n̄kpọ oro ẹban̄ade idan̄; etịme etịme ido; edu oro ananade iso o-bụt; oburobụt ido.” Use ye obukpo ido inyeneke n̄kpọ ndomokiet ndinam ye edisana idaha Jehovah. Ntem, ẹsisio mbon oro ẹkade iso ndinam mme orụk n̄kpọ emi ẹfep ke esop Christian. Kpasụk ntre n̄ko ye mbon oro ẹkade iso ẹnam akwa mbubiam ido, oro edi, ndinam “kpukpru orụk mbubiam ido ke idiọkitọn̄.”—Eph. 4:19.

“Mbubiam ido” abuana ata ediwak idiọkn̄kpọ. Ikọ Greek oro ẹkabarede mbubiam ido abuana orụk ndek ekededi—oro edi, eke edinam, eke ikọ inua, ye eke ido ukpono. Enye esịne mme edinam oro ẹbuanade orụk mbubiam ido oro ekemede ndidi idiyomke ẹkpe ikpe ẹnọ owo. * Edi ndi mbon oro ẹnamde orụk mbubiam ido emi ke ẹka iso ẹnyene edisana idaha?

Yak idọhọ ke Christian ọtọn̄ọ ndisidịbe nse n̄wed ye ndise idan̄. Nte ndiọi udọn̄ emi ẹdemerede nsịtnsịt, emi abiat ubiere oro enye akanamde ndika iso nsana ke enyịn Jehovah. Ekeme ndidi se enye anamde idịghe kan̄a akwa mbubiam ido, edi enye ikereke aba kpọt iban̄a mme ‘n̄kpọ ekededi oro ẹsanade, n̄kpọ ekededi oro ẹwọrọde eti etop, eke eti ido odude, ye eke itoro odude.’ (Phil. 4:8) Ndise ye n̄wed idan̄ ẹdi mbubiam ndien mmọ ẹsinen̄ede ẹbiat itie ebuana owo ye Abasi. Nnyịn  ikpayakke ẹtịn̄ ẹban̄a mbubiam ido ekededi ke otu nnyịn.—Eph. 5:3.

Kere ban̄a uwụtn̄kpọ en̄wen. Yak idọhọ ke Christian esima ndifiọn̄ọ ndido idan̄ n̄kop uyụhọ—edide emi esisan̄a ye edise n̄wed m̀mê ndise idan̄ m̀mê isisan̄ake. Okposụkedi emi ikọ oro “edifiọn̄ọ ndido idan̄ n̄kop uyụhọ” mîdụhe ke Bible, nte owo ekeme ndifan̄a ke edinam emi ikemeke ndisabade owo ekikere ye ntụk? Ndi owo ndika iso nsabade idem esie ke utọ usụn̄ emi idibiatke ọkpọkpọ itie ebuana esie ye Jehovah, inyụn̄ inam enye edi mbubiam ke enyịn Esie? Ẹyak inam item apostle Paul emi ọdọhọde “iyet kpukpru se isabarede nnyịn obụkidem ye spirit ifep,” inyụn̄ ‘iwot mme ndido idem nnyịn emi ẹdude ke isọn̄ kaban̄a use, mbubiam ido, ọkpọsọn̄ udọn̄ idan̄, udọn̄ oro ekemede ndinọ unan, ye edisịn esịt ke n̄kpọ owo.’—2 Cor. 7:1; Col. 3:5.

Ererimbot emi Satan akarade mi enyịme onyụn̄ esịn udọn̄ ọnọ mbubiam ido. Ntem, ekeme ndinen̄ede nsọn̄ ndibiọn̄ọ idomo edinam mbubiam ido. Edi inaha ata mme Christian “ẹsan̄a kpa nte mme idụt ẹsan̄ade n̄ko ke ekikere mmọ eke mîdoroke udori.” (Eph. 4:17) Jehovah ediyak nnyịn ika iso isan̄a ke “usụn̄ edinen owo” edieke mînamke mbubiam ido ke ndịbe m̀mê ke eferife.

“Lion Ididụhe Do”

Ekeme ndiyom ndusụk owo ẹnen̄ede ẹnam ukpụhọde ke edinam ye ke ikọ mmọ man ẹkeme ndinyene mfọn edisana Abasi, kpa Jehovah. Isaiah 35:9 ọdọhọ ete: “Lion ididụhe do, idiọk unam idinyụn̄ idọkke ke esịt,” oro edi, “usụn̄ edinen owo.” Ẹsimen mbon oro ẹtiede afai afai, ẹsinyụn̄ ẹtịn̄de ikọ ẹnyụn̄ ẹnamde n̄kpọ ẹkọn̄ ẹkọn̄ ẹdomo ye ndiọi unam. Ke akpanikọ, mmọ idinyeneke udeme ndomokiet ke obufa ererimbot edinen ido Abasi. (Isa. 11:6; 65:25) Ke ntre, enen̄ede oyom mbon oro ẹyomde ndinyene unyịme Abasi ẹkpọn̄ mme utọ edu oro ẹbietde eke unam do ẹnyụn̄ ẹka iso ẹnyene edisana idaha.

N̄wed Abasi eteme nnyịn ete: “Ẹsion̄o kpukpru ndotndot udu ye iyatesịt ye ifụtesịt ye mfiori ye ikọ isụn̄i ẹfep ke otu mbufo ọkọrọ ye kpukpru idiọkn̄kpọ.” (Eph. 4:31) Colossae 3:8 ọdọhọ ete: “Ẹsion̄o kpukpru iyatesịt, ifụtesịt, idiọkn̄kpọ, ikọ isụn̄i, ye mbubiam ikọ ke inua mbufo ẹfep.” Ikọ oro “ikọ isụn̄i” emi ẹtịn̄de ẹban̄a ke ufan̄ikọ mbiba emi ọwọrọ ikọ ebiari m̀mê esuene.

Mfịn, uyat uyat ye etịme etịme ikọ ẹdi ọsọ n̄kpọ ke kpukpru ebiet, idem ke ubon. Ebe ye n̄wan ẹsitịn̄ ikọ ubiak ubiak, uyat uyat, m̀mê ikọ oro osụhọrede owo itie ye kiet eken ẹnyụn̄ ẹtịn̄ ye nditọ mmọ. Ikpanaha ẹsitịn̄ mme utọ ikọ emi ke ubon Christian.—1 Cor. 5:11.

Ndika Iso Nnyene ‘Edisana Idaha ebe ke Ndibak Abasi’ Edi Edidiọn̄!

Nso akwa ifet ke edi ntem ndinam n̄kpọ nnọ edisana Abasi, kpa Jehovah! (Josh. 24:19) Paradise eke spirit emi Jehovah adade nnyịn edisịn idịghe n̄kpọ mbubru. Ndika iso nnyene edisana ido ke enyịn Jehovah edi mfọnn̄kan usụn̄ uwem.

Ibịghike, isọn̄ ayakabade Paradise nte Abasi ọkọn̄wọn̄ọde. (Isa. 35:1, 2, 5-7) Mbon oro ẹyomde Paradise emi ẹnyụn̄ ẹkade iso ẹnyene uten̄e Abasi ẹdidu do. (Isa. 65:17, 21) Do, ẹyak idomo nte ikekeme ndika iso ntuak ibuot nnọ Abasi ke edisana idaha eke spirit inyụn̄ ika iso inyene ata eti itie ebuana ye enye.

[Ikọ Idakisọn̄]

[Ndise ke page 26]

Okoyom mme Jew ẹnam nso man ẹsan̄a ke “usụn̄ edinen owo”?

[Ndise ke page 27]

N̄wed ye ndise idan̄ ẹsibiat itie ebuana owo ye Jehovah

[Ndise ke page 28]

“Ẹsion̄o kpukpru . . . mfiori ye ikọ isụn̄i ẹfep ke otu mbufo”