Mme Mbụme Ẹtode Mme Andikot

Sia ẹkesitọn̄ọde ukpen̄e ke ini kpukpru iren Israel ẹkekade usọrọ Uyo Eke Leaven Mîdụhe, mmanie ẹkesikpen̄e akpa mfri barley oro ẹkedade ẹdi temple?

Ibet Moses ama eteme nditọ Israel ete: “Yak kpukpru iren-owo fo ẹwụt Jehovah idem mmọ utịm ikata ke isua ke ebiet emi enye edimekde; ke usọrọ uyo eke leaven mîdụhe, ye ke usọrọ mme urua, ye ke usọrọ mme ataya.” (Deuteronomy 16:16) Ọtọn̄ọde ke eyo Edidem Solomon, ebiet emi Jehovah ekemekde ekedi temple ke Jerusalem.

Ẹkenịm akpa ke otu usọrọ ita emi ke ntọn̄ọ ntọn̄ọ ini utọ. Enye ke ẹkekot Usọrọ Uyo Eke Leaven Mîdụhe, ndien ẹkesinịm enye ke Nisan 15 esịm Nisan 21. Ke n̄wed usenọfiọn̄ Bible, ẹketọn̄ọ ukpen̄e emi ke Nisan 16, kpa ọyọhọ usen usọrọ iba. Ke usen oro, akwa oku ekenyene ndida ‘ebek akpasarade ukpen̄e barley mfụn̄ ke iso Jehovah’ ke temple. (Leviticus 23:5-12) Sia ẹkedọhọde kpukpru irenowo ẹka Usọrọ Uyo Eke Leaven Mîdụhe, mmanie ndien ẹkekpen̄e akpa mfri barley emi?

Ẹkewụk ofụri Israel ẹte ẹnọ Jehovah akpasarade ukpen̄e ke ini Usọrọ Uyo Eke Leaven Mîdụhe. Owo ikọdọhọke owo kiet kiet ekekpen̄e esiemmọ edi. Edi ẹkedọhọ ofụri idụt Israel ẹmek owo kiet man enye ọnọ ke ibuot kpukpru owo. Ntre, ẹkeme ndidọn̄ ẹkekpen̄e barley ke in̄wan̄ barley ekededi oro okodude ekpere man ẹda ẹnịm Usọrọ Uyo Eke Leaven Mîdụhe. Kop se Encyclopaedia Judaica etịn̄de aban̄a n̄kpọ emi: “Edieke ekedide ini barley, ẹkekpen̄e mbon oro ẹdude ke Jerusalem; mîdịghe ẹkeme ndikpen̄e ke ebiet ekededi ke Israel. Owo ita ẹkesikpen̄e barley emi, kiet kiet akamade ofụt ye akpasa esie.” Ekem, ẹyemen ebek barley kiet ẹsọk akwa oku man ọnọ Jehovah.

Ndidọhọ nditọ Israel ẹda akpa mfri ukpen̄e mmọ ẹsọk Abasi ama ọnọ mmọ ata eti ifet ndiwụt esịtekọm mban̄a nte Abasi ọdiọn̄de isọn̄ ye mbun̄wụm mmọ. (Deuteronomy 8:6-10) Ke adianade do, mme enọ emi ẹkedi “mbukpọn̄ nti n̄kpọ eke ẹdidide.” (Mme Hebrew 10:1) Tịm fiọk ke Jesus ekeset ke Nisan 16, 33 E.N., kpa usen oro ẹkenọde Jehovah akpa mfri oro. Apostle Paul ama etịn̄ aban̄a Jesus ete: “Ẹma ẹnam Christ eset ke otu mme akpan̄kpa, nte akpa mfri ke otu mbon oro ẹdede ke n̄kpa. . . . Edi owo kiet kiet ke idaha esie: Christ akpa mfri, ekem mmọ eke ẹdide eke Christ ke ini edidu esie.” (1 Corinth 15:20-23) Ebek akpa mfri oro akwa oku okofụn̄de ke iso Jehovah akada aban̄a ediset ke n̄kpa Jesus Christ, kpa akpa owo oro ẹkenamde eset ekenyene nsinsi uwem. Ntre, Jesus ama eberede usụn̄ ọnọ ubonowo ndiwọrọ ke ufụn idiọkn̄kpọ ye n̄kpa.

[Ebiet Ẹdade Ndise Ẹto ke page 26]

© 2003 BiblePlaces.com