Barzillai Owo Oro Ọkọdiọn̄ọde Ukeme Esie

BARZILLAI emi ekedide akanieren isua 80 ọkọdọhọ David edidem Israel ete: ‘Ke didie ke n̄kpobiomo fi?’ Bible ọdọhọ ke Barzillai ekedi “ata akamba owo,” eyedi ke ntak inyene esie. (2 Samuel 19:32, 35) Enye okodụn̄ ke Gilead, ke ikpehe oro etiede obot obot ke edem usiahautịn Akpa Jordan.—2 Samuel 17:27; 19:31.

Nso ikanam Barzillai ọdọhọ ke imọ iyomke ndidi mbiomo nnọ David? Ndien ntak emi akanieren oro eketịn̄de ikọ ntre?

Ẹsọn̄ Ibuot ye Edidem

Ẹma ẹyom ndiwot David. Ke Absalom eyen esie ama ‘ekeyịp esịt nditọ Israel,’ enye ama ọbọ ete esie itie edidem. Ama ana in̄wan̄-in̄wan̄ ke Absalom iditreke ndiwot owo ekededi oro adade ye ete esie. Ntre David ye ikọt esie ẹma ẹkpọn̄ Jerusalem. (2 Samuel 15:6, 13, 14) Ke ini David ekesịmde Mahanaim, emi odude ke edem usiahautịn Jordan, Barzillai ama an̄wam enye.

Barzillai, Shobi, ye Machir ẹma ẹnọ David ediwak n̄kpọ. Se owo ita oro ẹkedade ye David mi ẹketịn̄de ẹban̄a enye ye ikọt esie owụt ke mmọ ẹma ẹfiọk idiọk idaha oro David okodude. Mmọ ẹkedọhọ ẹte: “Mmọ oro ẹmekpa biọn̄, ẹnyụn̄ ẹkpọt, ẹnyụn̄ ẹsat itọn̄ ke wilderness.” Mmọ ẹma  ẹnam se ẹkekeme man ẹse ẹban̄a David ye ikọt esie ẹnyụn̄ ẹnọ mmọ mbri, wheat, barley, ndomuyo, edifọp ibokpot, ọkọti, lentil, aran ọkwọk, edibari mmọn̄eba, n̄kpri ufene, ye mme n̄kpọ eken.—2 Samuel 17:27-29.

Ndin̄wam David ọkọwọrọ ndisịn idem ke mfịna. Itiehe nte Absalom akpakayak owo ekededi oro akadade ye David ọbọhọ. Ke ntre, Barzillai ndikọsọn̄ọ nda ye David owụt ke enye ama enyene uko.

N̄kpọ Okpụhọde

Esisịt ini ke oro ebede, udịmekọn̄ Absalom ẹma ẹkesobo ye ikọt David. Ekọn̄ ama asiaha ke akai Ephraim, eyedi ke mbọhọ obio Mahanaim. Ẹma ẹkan udịmekọn̄ Absalom, “ediwak owo ẹnyụn̄ ẹkpan̄a do ke usen oro.” Okposụkedi oro Absalom okoyomde ndifehe, ẹma ẹwot enye.—2 Samuel 18:7-15.

Idụhe owo oro akafiakde anyan̄a aba itie edidem ye David. Ikọt esie ikonyụn̄ idụhe aba uwem nyon̄. Akan oro, David ama ọkọm onyụn̄ okpono mmọ ke ntak oro mmọ ẹkesọn̄ọde ẹda ye enye.

Ke ini David okoyomde ndifiak nnyọn̄ Jerusalem, “Barzillai eyen Gilead oto ke Rogelim osụhọde, ndien etiene edidem ebe Jordan, man ada enye akayak ke edem Jordan oko.” Do ke David ọkọdọhọ Barzillai ete: “San̄a ye ami be, ndien nyọbọk fi ke ọtọ mi ke Jerusalem.”—2 Samuel 19:15, 31, 33.

Nte eyịghe mîdụhe, David ama enen̄ede owụt esịtekọm aban̄a se Barzillai akanamde ọnọ enye. Itiehe nte edidem ọkọdọhọ enye etiene imọ man inọ enye mme n̄kpọ udu-uwem ke utịp mfọnido esie. Barzillai ekedi imọ owo, ntre enye ikoyomke utọ un̄wam oro. Akam etie nte David okoyom enye edidu ke okụre edidem ke ntak nti edu oro ọbọn̄ emi ekenyenede. Ndisịn Barzillai ke okụre edidem ekpekedi ata ukpono, koro emi akpakanam enye aka iso okụt mfọn ke iso edidem.

Nsụhọdeidem ye Eti Ibuot

Ke ini David ọkọdọhọde Barzillai etiene imọ, enye ọkọbọrọ ete: “Isua uwem mi edi ifan̄, eke n̄kpetienede edidem ndọk ke Jerusalem? Ami ndi owo isua anan̄ mfịn emi: nte mmọfiọk se idide eti, ye se inyụn̄ idide idiọk? Nte owo fo okop inem ke se ndiade, ye ke se nnyụn̄ n̄n̄wọn̄de? Nte mmekeme ndikop n̄ko uyo iren ye iban eke ẹkwọde ikwọ?” (2 Samuel 19:34, 35) Ntem, Barzillai ama ada edu ukpono esịn ikot oro David ọkọnọde enye ye akwa ifet oro enye ekpekenyenede. Edi ntak-a?

Etie nte ntak kiet oro akanamde Barzillai esịn ikot emi ekedi koro enye ama ọsọn̄ onyụn̄ enyene mmeme oro esisan̄ade ye usọn̄. Ekeme ndidi Barzillai ekekere ke isua uwem imọ iwakke aba. (Psalm 90:10) Enye ama anam se enye ekekemede ndin̄wam David, edi enye n̄ko ama ọdiọn̄ọ ke enyene ediwak n̄kpọ oro imọ mîkemeke aba ndinam ke ntak usọn̄. Barzillai ikayakke uku ye uwọrọiso ẹnam enye efre ke imọsọn̄. Enye iketiehe nte Absalom emi okoyomde ikpọ n̄kpọ; enye ama osụk idem.—Mme N̄ke 11:2.

Ekeme ndidi ntak efen oro akanamde Barzillai esịn nditiene David ekedi ke enye ikoyomke mmeme esie akabade edi mbiomo ọnọ edidem emi Abasi ekemekde. Barzillai  ama obụp ete: “Ke didie ndien ke owo fo okpobiomo ọbọn̄ mi edidem?” (2 Samuel 19:35) Okposụkedi Barzillai okosụk akade iso an̄wam David, ekeme ndidi enye ama ekere ke akparawa ekeme ndinam utom n̄kan imọ. Etie nte Barzillai eketịn̄ aban̄a eyen esie ke ini enye ọkọdọhọde ete: “Sese, yak Chimham owo fo etiene ọbọn̄ mi edidem ebe; nyụn̄ nam ye enye se afo amade.” David ikayatke esịt, edi ama ama ekikere oro. Ke nditịm ntịn̄, mbemiso David ekebede Jordan, enye ama “etịm Barzillai inua.”—2 Samuel 19:37-39.

Oyom Inyene Eti Ibuot

Mbụk Barzillai owụt ke oyom inyene eti ibuot. Nnyịn ikpenyeneke ndisịn ifetutom m̀mê nditre ndinyanade mbịne ifetutom koro nnyịn mîyomke mfịna m̀mê ikerede ke nnyịn idikemeke ndikama ifetutom. Abasi ekeme ndisọn̄ọ nnyịn idem edieke iberide edem ke ukeme ye ọniọn̄ oro enye ọnọde.—Philippi 4:13; James 4:17; 1 Peter 4:11.

Edi, ana idiọn̄ọ ukeme nnyịn. Ke uwụtn̄kpọ, yak idọhọ ke Christian enyenyene ata ekese ndinam ke utom Abasi. Enye ọfiọk ke edieke ibọde ifetutom efen ke imọ idikemeke ndinam se N̄wed Abasi ọdọhọde imọ inam, utọ nte editịm n̄kpọ nnọ ubon imọ. Ke utọ idaha oro, nte ikpowụtke nsụhọdeidem ye eti ibuot edieke enye esịnde ifetutom efen efen?—Philippi 4:5; 1 Timothy 5:8.

Barzillai ama enịm eti uwụtn̄kpọ, ndien nnyịn ikpenyene ndikpebe enye. Enye ama anam akpanikọ, enyene uko, atat ubọk, onyụn̄ osụhọde idem. Akan oro, enye ama ebiere ndinịm n̄kpọ Abasi akpa.—Matthew 6:33.

[Ndise obio ke page 15]

(Ama oyom ndikụt nte enye enen̄erede etie, se n̄wed)

Barzillai emi ekedide akanieren isua 80 ama asan̄a anyan usụn̄ man akan̄wam David

GILEAD

Rogelim

Succoth

Mahanaim

Akpa Jordan

Gilgal

Jericho

Jerusalem

EPHRAIM

[Ndise ke page 13]

Ntak emi Barzillai mîketieneke David?