Ọkpọsọn̄ Ubiak Oro Ebịghide

KE NDONDO emi, owo kiet ama anam ndụn̄ọde oyom ndifiọk nte esitiede mme ete ye eka ke idem ke ediwak isua ẹma ẹkebe tọn̄ọ nte nditọ mmọ ẹkekpan̄a. Enye ama ewet mme mbụme ọnọ ẹsọk ediwak ete ye eka oro nditọ mmọ ẹkekpan̄ade ke ediwak isua emi ẹkebede. Idịghe kpukpru mmọ ẹkebọrọ mbụme oro. Ete kiet emi ekerede Vladimir, emi eyeneren esie akakpade ke isua ition emi ẹkebede, ọkọdọhọ ke osụk ọsọsọn̄ imọ nditịn̄ nte n̄kpa eyen emi etiede imọ ke idem. *

Mme ete ye eka oro eyen mmọ akpade ẹsikop utọ ọkpọsọn̄ mfụhọ oro. Ke isua duop emi ẹkebede, eyen William eren emi edide isua 18 ama akpa ke mmọn̄. William ewet ete: “N̄kpa esie osụk ababiak mi tutu esịm emi, ndien edisụk ababiak mi tutu n̄kpa.” Ke isua ition ẹma ẹkebe nte eyen Lucy akakpa ke unana idotenyịn, enye ama ewet ete: “Ke ntọn̄ọ ntọn̄ọ, iketiehe mi ke idem nte eyen emi akpakpa. Akakam etie mi ke idem nte n̄kadaba idiọk ndap ndien ke mmọn̄ nsọp ndemede. Nte ini akakade, mma ndifiọk ke enye akakpakpa, ye nte ke nnyịn idikwe enye aba. Isua ition edi emi tọn̄ọ eyen mi akakpa, edi ndusụk ini, ke ini ndude ikpọn̄, mmesitua enye.”

Ntak emi mme ete ye eka oro ẹfụhọde, utọ nte Vladimir, William, ye Lucy, ẹsikopde utọ ọkpọsọn̄ ubiak oro ebịghide ntre? Ẹyak ineme ndusụk ntak.

Ntak Emi Mmọ Ẹsifụhọde Ntre?

Ke ini eyen amanade, esịt esinen̄ede enem ete ye eka. Ndimụm eyen mmọ ubọk, ndise nte enye edede m̀mê ndikụt nte enye asakde imam esinen̄ede enem mmọ. Nti ete ye eka ẹsinen̄ede ẹma nditọ mmọ. Mmọ ẹsikpep nditọ mmọ ndinyene nti edu uwem nnyụn̄ n̄kpono owo. (1 Thessalonica 2:7, 11) Ke ini nditọ ẹnamde se ete ye eka ẹkpepde mmọ, mme ete ye eka ẹsinen̄ede ẹkop idatesịt ẹnyụn̄ ẹnịm ke nditọ mmimọ ẹyekpon ẹwọrọ owo ke ini iso.

Mme ete ye eka oro ẹmade nditọ mmọ ẹsinam utom ọkpọsọn̄ man ẹnọ nditọ mmọ se ẹyomde. Mmọ ẹkeme ndifam okụk nnyụn̄ nnịm mme inyene obụkidem eken nnọ nditọ mmọ man ẹkpeda ẹtọn̄ọ uwem ke ini iso. (2 Corinth 12:14) Uwak ima, ini, ukeme, ye okụk oro  ẹdade ẹnam emi ẹwụt akpan n̄kpọ kiet, oro edi, ke mme ete ye eka ẹsibọk nditọ mmọ man ẹdu uwem, idịghe man ẹkpa. N̄kpa eyen isiyakke ete ye eka ẹbọk eyen ẹma, esinyụn̄ anam idotenyịn oro ete ye eka ẹkenyenede ẹban̄a eyen mmọ akpa mfụhọ. N̄kpa isiyakke ete ye eka ẹwụt ima oro mmọ ẹnyenede ẹnọ eyen mmọ. Ofụri ima oro ete ye eka ẹkemade eyen mmọ ye se mmọ ẹkekerede ndinam nnọ enye ẹsitak. Emi esinam mmọ ẹnen̄ede ẹfụhọ.

Bible owụt ke mme ete ye eka oro nditọ mmọ ẹkpan̄ade ẹsikop ọkpọsọn̄ ubiak. Bible etịn̄ aban̄a se iketịbede ke ini Jacob okokopde ke Joseph eyen imọ akpa, ete: “Jacob awak edisịne-n̄kpọ esie, onyụn̄ esịne ọfọn̄-ikpo ke idem, onyụn̄ atua eyen esie anyan ini. Ndien kpukpru nditọ-iren esie, ye kpukpru nditọ-iban esie ẹdaha ke enyọn̄ ẹte idọn̄ enye esịt, edi enye esịn ndikop ndọn̄esịt; ete, Nsụhọde n̄ka ke udi ntiene eyen mi ke mfụhọ.” Ke ediwak isua ẹma ẹkebe, Jacob okosụk atatua eyen esie emi enye ekekerede ke ama akpa. (Genesis 37:34, 35; 42:36-38) Uwụtn̄kpọ en̄wen emi Bible etịn̄de edi eke anam-akpanikọ n̄wan emi ẹkotde Naomi, emi nditọ esie iba ẹkekpan̄ade ẹkpọn̄ enye. Naomi ama enen̄ede ofụhọ tutu oyom ndikpụhọ enyịn̄ esie emi ọwọrọde “Edinem” n̄kabade n̄kere Mara emi ọwọrọde “Ndot-ndot.”—Ruth 1:3-5, 20, 21.

Nte ededi, ke adianade ye ndidọhọ ke mme ete ye eka ẹsifụhọ ke ini nditọ mmọ ẹkpan̄ade, Bible n̄ko owụt nte Jehovah esidọn̄de mbon mfụhọ esịt. Ke ibuotikọ oro etienede, nnyịn iyese ndusụk usụn̄ oro Abasi esidọn̄de mbon mfụhọ esịt.

[Ikọ idakisọn̄]