Genesis 37;1-36
37 Ndien Jacob odụn̄ ke isọn̄ Canaan,+ emi ete esie okodụn̄de nte esenowo.+
2 Emi edi mbụk emi aban̄ade Jacob.
Ke ini Joseph+ ekedide isua efịteba, enye ama esitiene nditọete esie ọbọk ufene,+ edi sia enye ekedide eyenọwọn̄, enye ekesisan̄a ye nditọ Bilhah+ ye nditọ Zilpah,+ iban ete esie. Ntem Joseph emen idiọkido mmọ eketịn̄ ọnọ ete mmọ.+
3 Ndien Israel ama Joseph akan kpukpru nditọiren esie eken,+ koro enye ekedide eyen ini usọn̄ esie; ndien enye anam ẹkịm anyan, n̄wet-n̄wet ọfọn̄idem ẹnọ enye.+
4 Ke ini nditọete esie ẹkụtde ke ete mmimọ ama enye akan kpukpru mmimọ, mmọ ẹtọn̄ọ ndisua enye,+ inyụn̄ ikemeke nditịn̄ ikọ emem emem ye enye.+
5 Ekem Joseph adaba ndap onyụn̄ etịn̄ ọnọ nditọete esie,+ ndien mmọ ẹkụt ntak ndidọdiọn̄ nsua enye.
6 Ndien enye ọdọhọ mmọ ete: “Mbọk, ẹkop ndap emi n̄kadabade.+
7 Sese, nnyịn ikọbọp ebek ke in̄wan̄ ndien ebek mi adaha adada, ndien sese ebek mbufo ẹdaha ẹkanade ebek mi ẹkụk ẹnyụn̄ ẹnụhọ ẹnọ enye.”+
8 Ndien nditọete esie ẹdọhọ enye ẹte: “Nte afo edidi edidem nnyịn?+ mîdịghe, Nte afo edidi andikara nnyịn?”+ Ndien mmọ ẹkụt ntak efen ndisua enye kaban̄a ndap esie ye ikọ esie.
9 Ekem enye afiak adaba ndap onyụn̄ eketịn̄ ọnọ nditọete esie ete: “Mmafiak ndaba ndap, ndien, sese, utịn ye ọfiọn̄ ye ntantaọfiọn̄ duopekiet ẹnụhọ ẹnọ mi.”+
10 Ndien enye etịn̄ ọnọ ete esie ye nditọete esie n̄ko, ndien ete esie asua ọnọ enye onyụn̄ ọdọhọ enye ete:+ “Nso ke ndap fo ọwọrọ? Ndi ami ye uka n̄ko ye nditọete fo ididi idinụhọ ke isọn̄ inọ fi?”
11 Ndien nditọete esie ẹfịbe enye ufụp,+ edi ete esie omụm mme ikọ emi akama.+
12 Edikem nditọete esie ẹka ẹkebọk ufene ete mmọ ẹkpere Shechem.+
13 Ekem Israel ọdọhọ Joseph ete: “Nte nditọusọ ibọkke ufene ikpere Shechem? Di, yak ndọn̄ fi ekese mmọ.” Ndien enye ọdọhọ ete: “Se mi mi!”+
14 Ntre enye ọdọhọ Joseph ete: “Mbọk, ka kese m̀mê n̄kpọ ọfọn ye nditọusọ ye mme ufene, nyụn̄ fiak didọhọ mi.”+ Ntem enye etie ke unaisọn̄ itịghede Hebron+ osio enye ọdọn̄, ndien enye adaha aka Shechem.
15 Ekem owo kiet okụt nte enye oyode ke ikọt. Ndien owo oro obụp enye ete: “Oyom nso?”
16 Ndien enye ọbọrọ ete: “Nyom nditọete mi. Mbọk, sian mi, Mmọ ẹbọk ufene ke m̀mọ̀n̄?”
17 Owo oro ọbọrọ enye ete: “Mmọ ẹma ẹkpọn̄ mi, koro mma n̄kop nte mmọ ẹdọhọde ẹte, ‘Ẹyak nnyịn ika Dothan.’” Ndien Joseph asan̄a oyom nditọete esie onyụn̄ okokụt mmọ ke Dothan.
18 Ekem mmọ ẹda ẹkụt enye nsannsan nte asan̄ade edi, ndien mbemiso enye asan̄ade ekpere, mmọ ẹdụk odu ndiwot enye.+
19 Ntre mmọ ẹdọhọ kiet eken ẹte: “Sese! Adaba ndap oro ke edi.+
20 Mbufo ẹdi nnyịn iwot enye itop isịn ke obube mmọn̄ emi;+ iyonyụn̄ idọhọ ke idiọk unam okowot enye.+ Ndien iyese nte ndap esie edisude.”
21 Ke ini Reuben okopde ikọ emi enye odomo ndinyan̄a enye nsio mmọ ke ubọk.+ Ntre enye ọdọhọ ete: “Ẹyak nnyịn ikûsịbe ukpọn̄ esie ifep.”+
22 Ndien Reuben ọdọhọ mmọ ete: “Ẹkûduọk iyịp esie.+ Ẹtop enye ẹsịn ke obube mmọn̄ emi ke wilderness ẹkûnyụn̄ ẹnam enye idiọk.”+ Enye akaduak ndinyan̄a enye nsio mmọ ke ubọk man ada enye ọsọk ete esie.
23 Ntre edikem ke Joseph asan̄ade edisịm nditọete esie, mmọ ẹsio Joseph anyan, n̄wet-n̄wet ọfọn̄idem oro enye ekesịnede;+
24 ekem mmọ ẹtop enye ẹsịn ke obube mmọn̄.+ Ini oro obube oro akana ukpọk; mmọn̄ ikonyụn̄ idụhe ke esịt.
25 Ekem mmọ ẹsụhọde ẹtetie ndidia udia.+ Ke ini mmọ ẹmenerede enyịn ẹse, sese, mbonurua Ishmael+ ke ẹto Gilead ẹdi, mme camel mmọ ẹnyụn̄ ẹbiom labdanum ye balsam ye ikpọketo emi enyenede itai,+ ndida nsụhọde n̄ka Egypt.
26 Ndien Judah ọdọhọ nditọete esie ete: “Nso udori ke nnyịn ididia edieke iwotde eyenete nnyịn inyụn̄ idịpde iyịp esie?+
27 Ẹyak ikam inyam enye inọ nditọ Ishmael,+ ubọk nnyịn okûnyụn̄ otụk enye.+ Kamse, enye edi eyenete nnyịn, kpa obụk nnyịn.” Ntre mmọ ẹkop uyo eyenete mmọ.+
28 Ndien mbonurua emi ẹdide mbon Midian+ ke ẹkesan̄a ẹbe. Ntem mmọ ẹdụri Joseph ẹsio ke obube mmọn̄+ oro ẹnyụn̄ ẹnyam Joseph ẹnọ nditọ Ishmael ke mbak silver edịp.+ Ndien mmọ ẹda Joseph ẹkesịm Egypt.
29 Ekem Reuben aka obube mmọn̄ oro, ndien sese, Joseph idụhe do. Ntre enye awak ọfọn̄idem esie.+
30 Ke ini enye afiakde ekesịm nditọete esie eken, enye ofiori ete: “Eyen oro omosop! Ndidụk m̀mọ̀n̄?”+
31 Ndien mmọ ẹwot okpo ebot ẹnyụn̄ ẹmen anyan ọfọn̄idem Joseph ẹnyịni ke iyịp ebot oro.+
32 Ekem mmọ ẹnọ anyan, n̄wet-n̄wet ọfọn̄idem oro ẹsọk ete mmọ ẹnyụn̄ ẹdọhọ ẹte: “Se ikụtde edi emi. Mbọk, tịm se+ m̀mê anyan ọfọn̄idem eyen fo edi emi.”+
33 Ndien enye ese ọfọn̄ oro onyụn̄ ofiori ete: “Anyan ọfọn̄idem eyen mi edi emi! Anaedi idiọk unam owot enye!+ Ke akpanikọ idiọk unam amawai Joseph mbai mbai!”+
34 Ntem Jacob awak ọfọn̄ esie onyụn̄ okụne ọfọn̄ ntuan̄a ke isịn onyụn̄ ofụhọ eyen esie ediwak usen.+
35 Ndien kpukpru nditọiren ye nditọiban esie ẹdaha ẹka ndidọn̄ enye esịt,+ edi enye imaha ndibọ ndọn̄esịt edi ọdọhọ ete:+ “Nyosụhọde ke Udi* ke mfụhọ ntiene eyen mi!” Ndien ete esie atua enye.
36 Ndien mbon Midian ẹnyam enye ke Egypt ẹnọ Potiphar, adaidaha ke okụre Pharaoh+ emi onyụn̄ edide etubom mbon ukpeme.+
Mme Ikọ Idakisọn̄
^ Heb., “Sheol.” Se N̄w. Ik. 5.
