Mme Uyen, Ẹtoro Jehovah!
Mme Uyen, Ẹtoro Jehovah!
“Ẹtie ke isọn̄ ẹtoro Jehovah. . . . N̄kparawa, ye nditọ-iban.”—PSALM 148:7, 12.
1, 2. (a) Mme n̄kpọ ewe ke ediwak uyen ẹfiọk ke owo iyakke mmimọ inam? (b) Ntak emi mme uyen mîkpayatke esịt iban̄a mme n̄kpọ oro mme ete ye eka mmọ mîyakke mmọ ẹnam?
MME uyen ẹsiwak ndinen̄ede mfiọk mme n̄kpọ oro owo mîyakke mmọ ẹnam. Ediwak mmọ ẹkeme ndisọsọp nsian fi isua emana oro anade mmimọ isịm mbemiso ẹyakde ibe usụn̄ ikpọn̄ m̀mê itie ke okoneyo ibịghi mbemiso idụkde idap mîdịghe mbemiso ẹyakde mmimọ iwat ubomisọn̄. Ndusụk ini, ekeme nditie uyen ke idem nte ke owo isiyakke imọ inam ediwak n̄kpọ oro isiyomde ndinam, ẹdọhọde kpukpru ini ẹte: “Bet tutu afo okpon.”
2 Mbufo mme uyen ẹmefiọk ke mme ete ye eka mbufo ẹkere ke owụt ifiọk ndidori mme utọ ukpan oro, eyedi man ẹkpeme mbufo. Mbufo ẹmenen̄ede ẹfiọk n̄ko ke Jehovah esinem esịt ke ini ẹkopde uyo ẹnọ mme ete ye eka mbufo. (Colossae 3:20) Nte ededi, ndi ẹmesikere ke mme ukpan emi iyakke mbufo ẹkop inem uwem? Ndi ẹdọhọ mbufo ẹkpon mbemiso ẹnamde kpukpru akpan n̄kpọ? Ke akpanikọ, idịghe ntre! Odu utom oro ẹnamde mfịn emi edide akpan n̄kpọ akan ifet ekededi oro mbufo ẹtiede ẹbet. Ndi ẹyak mbufo mme uyen ẹtiene ẹnam utom emi? Ih ẹyak—Ata Edikon̄ Abasi ke idemesie akam okot mbufo ete ẹditiene ẹnam utom emi!
3. Jehovah okot mme uyen ẹditiene ẹnam ewe akpan utom, ndien mme mbụme ewe ke nnyịn idineme idahaemi?
3 Ewe utom ke nnyịn itịn̄ iban̄a? Ẹtịm ẹfiọk se itien̄wed oro ọbọpde ibuotikọ nnyịn emi ọdọhọde: “Ẹtie ke isọn̄ ẹtoro Jehovah. . . . N̄kparawa, ye nditọ-iban; n̄kani iren, ye nditọwọn̄.” (Psalm 148:7, 12) Itien̄wed oro owụt ke mbufo ẹmenyene akwa ifet nditoro Jehovah. Nte uyen, ndi aduai fi idem nditiene nnam utom oro? Ediwak uyen ẹkop nduaidem ndinam ntre. Nnyịn iyeneme mbụme ita man ikụt ntak oro utom emi aduaide owo idem. Akpa, ntak emi afo okpotorode Jehovah? Ọyọhọ iba, didie ke afo ekeme ndinen̄ede ntoro enye? Ọyọhọ ita, ini ewe ke ọfọn ọtọn̄ọ otoro Jehovah?
Ntak Otorode Jehovah?
4, 5. (a) Nte Psalm ọyọhọ 148 ọdọhọde, ewe ata edinem ikwọ ke nnyịn ikop? (b) Didie ke mme edibotn̄kpọ oro mîtịn̄ke ikọ mînyụn̄ ikereke n̄kpọ ẹkeme nditoro Jehovah?
4 N̄wọrọnda ntak kiet nditoro Jehovah edi ke enye edi Andibot. Psalm ọyọhọ 148 an̄wam nnyịn inen̄ede ikere iban̄a emi. Kere ise: Ekpetie fi didie ke idem edieke akpasan̄ade ekpere akwa otuowo oro ẹdiande uyo ọtọkiet ẹkwọ ata edinem ikwọ? Nso edieke ọkpọfiọkde ke mme ikọ ikwọ oro ẹdi akpanikọ, ẹtịn̄de mme n̄kpọ oro afo ọfiọkde ke ẹdi akpan n̄kpọ, ẹnyụn̄ ẹnamde owo okop inemesịt? Ndi ikpọdọn̄ke fi ndikpep ikwọ oro nnyụn̄ ntiene n̄kwọ? Ediwak nnyịn ikpanam ntre. Ọfọn, Psalm ọyọhọ 148 owụt ke afo omokop akwa otu ẹkwọde ikwọ emi akam enemde akan oro. Psalm oro etịn̄ aban̄a akwa otu emi ẹdiande uyo ọtọkiet ẹtoro Jehovah. Nte ededi, nte okotde psalm oro, afo emekeme ndikụt n̄kpọ oro edide esen esen. Nso idi oro?
5 Ediwak n̄kpọ oro ẹtorode Abasi, oro ẹtịn̄de ẹban̄a ke Psalm 148 ikemeke nditịn̄ ikọ m̀mê ndikere n̄kpọ. Ke uwụtn̄kpọ, nnyịn imokot iban̄a nte utịn, ọfiọn̄, mme ntantaọfiọn̄, snow, oyobio, ikpọ obot, ye n̄kpri obot ẹtorode Jehovah. Didie ke mme anana-uwem edibotn̄kpọ emi ẹkeme nditoro Jehovah? (Ps 148 Ufan̄ikọ 3, 8, 9) Ke nditịm ntịn̄, ke ukem usụn̄ oro mme eto, unam mmọn̄, ye unamikọt ẹtorode Jehovah. (Ps 148 Ufan̄ikọ 7, 9, 10) Ndi akanam omokụt ediye usoputịn m̀mê ememenede enyịn ese ọyọhọ-idịbi ọfiọn̄ emi asan̄ade ebe ke ikpaenyọn̄ oro ntantaọfiọn̄ ẹyọhọde, m̀mê atuak inua imam ndikụt nte mme unam ẹbrede mbre, m̀mê uten̄e ndimụm fi ke ini esede ediye n̄kann̄kụk? Do afo “omokop” ikwọ itoro oro mme edibotn̄kpọ ẹkwọde. Kpukpru n̄kpọ-obot Jehovah ẹti nnyịn ke enye edi Ata Ọkpọsọn̄ Andibot, ye nte ke idụhe owo ndomokiet ke ofụri ekondo oro enyenede odudu, ọniọn̄, m̀mê amade ima nte enye.—Rome 1:20; Ediyarade 4:11.
6, 7. (a) Psalm ọyọhọ 148 ọdọhọ ke mme enyene-ifiọk edibotn̄kpọ ewe ẹtoro Jehovah? (b) Ntak ọkpọdọn̄de nnyịn nditoro Jehovah? Nam an̄wan̄a.
6 Psalm ọyọhọ 148 etịn̄ n̄ko aban̄a mme enyene-ifiọk edibotn̄kpọ oro ẹtorode Jehovah. Ps 148 Ufan̄ikọ 2, asian nnyịn ke “mme udịm” eke enyọn̄, oro edi mme angel, ẹtoro Abasi. Ke Ps 148 ufan̄ikọ 11, ẹkot mme enyene-odudu utọ nte, ndidem ye mme ebiereikpe, ẹte ẹditiene ẹtoro Abasi. Edieke n̄kpọsọn̄ angel ẹdatde esịt nditoro Jehovah, ewe ikpîkpu owo ọkpọdọhọ ke imọ imedi n̄kpọ ikaha nditoro Jehovah? Ekem, Ps 148 ufan̄ikọ 12 ye 13 ọnọ mbufo n̄kparawa n̄ko ikot ete ẹtiene ẹtoro Jehovah. Ndi ọdọn̄ mbufo ndinam oro?
7 Kere ban̄a uwụtn̄kpọ emi. Edieke afo ekpenyenede edima ufan oro enyenede n̄wọrọnda ukeme—eyedi ke mbre mbuba, utomusọ, m̀mê ikwọ—ndi afo ukpanamke mbonubon fo ye mme ufan fo ẹfiọk n̄kpọ ẹban̄a enye? Ke akpanikọ akpanam. Ọfọn, ndikpep mban̄a kpukpru se Jehovah anamde ekeme nditụk nnyịn ke ukem usụn̄ oro. Ke uwụtn̄kpọ, Psalm 19:1, 2 ọdọhọ ke ikpaenyọn̄ oro ntantaọfiọn̄ ẹyọhọde ‘eneme’ ubọn̄ Abasi. Ke ini nnyịn ikerede iban̄a mme utịben̄kpọ oro Jehovah anamde, nnyịn ikemeke nditre nditịn̄ nnọ mbon en̄wen mban̄a Abasi nnyịn.
8, 9. Mme ntak ewe ke Jehovah oyom nnyịn itoro imọ?
8 N̄wọrọnda ntak en̄wen oro anamde nnyịn itoro Jehovah edi koro enye oyom nnyịn inam ntre. Ntak-a? Ndi edi koro enye oyomde mme owo ẹtoro imọ? Baba-o? Nnyịn mme owo imekeme ndiyom ẹtoro nnyịn ndusụk ini, edi Jehovah enen̄ede okon̄ akan nnyịn. (Isaiah 55:8) Enye inyeneke eyịghe ndomokiet iban̄a idemesie m̀mê mme edu esie. (Isaiah 45:5) Kpa ye oro, enye oyom nnyịn itoro imọ, esinyụn̄ enem enye esịt ke ini inamde ntre. Ntak-a? Yak ikere iban̄a ntak iba. Akpa, enye ọfiọk ke oyom nnyịn itoro imọ. Enye okobot nnyịn ye udọn̄ n̄kpọ eke spirit, udọn̄ ndituak ibuot nnọ enye. (Matthew 5:3) Jehovah esinem esịt ndikụt nnyịn iyụhọde udọn̄ oro, kpa nte ete ye eka fo ẹsinemde esịt ndikụt fi adiade udia oro mmọ ẹfiọkde ke ọyọnọ fi nsọn̄idem.—John 4:34.
9 Ọyọhọ iba, Jehovah ọfiọk ke ana mbon en̄wen ẹkop nte nnyịn itorode imọ. Apostle Paul ekewet mme ikọ oro ẹtienede mi ọnọ ẹsọk akparawa Timothy ete: “Nọ ntịn̄enyịn kpukpru ini ke idemfo ye ke ukpepn̄kpọ fo. Sọn̄ọ yịre ke mme n̄kpọ emi, koro ke ndinam emi afo ayanyan̄a idemfo ye mmọ eke ẹkopde uyo fo.” (1 Timothy 4:16) Ih, ke ini afo ekpepde mbon en̄wen aban̄a Jehovah Abasi onyụn̄ otorode enye, mmọ n̄ko ẹkeme ndidi ndifiọk Jehovah. Utọ ifiọk oro ekeme ndinam mmọ ẹnyene nsinsi edinyan̄a!—John 17:3.
10. Ntak ọdọn̄de nnyịn nditoro Abasi nnyịn?
10 Ntak en̄wen odu oro anamde nnyịn itoro Jehovah. Ti uwụtn̄kpọ oro ikọnọde iban̄a ufan fo oro enyenede n̄wọrọnda ukeme. Edieke afo okopde nte mbon en̄wen ẹsude nsu ẹdori enye, ẹnyụn̄ ẹbiat enyịn̄ esie, ndi emi ikpanamke fi etetịm ebiere nditoro enye? Ke akpanikọ, ẹnen̄ede ẹsu nsu ẹdori Jehovah ke ofụri ererimbot. (John 8:44; Ediyarade 12:9) Ke ntre, ọdọn̄ mbon oro ẹmade enye ndisian mme owo akpanikọ aban̄ade enye, man ẹwụt ke ẹkesu nsu ẹdori enye. Ndi afo n̄ko ukpamaha ndiwụt ima ye esịtekọm oro enyenede ọnọ Jehovah onyụn̄ owụt ke imọ iyom enye edi Andikara imọ utu ke akpan asua esie, Satan? Afo emekeme ndinam kpukpru emi ebe ke nditoro Jehovah. Do, ọyọhọ mbụme iba edi, didie ke afo ekeme nditoro enye?
Nte Ndusụk Uyen Ẹketorode Jehovah
11. Mme uwụtn̄kpọ ewe ke Bible ẹwụt ke mme uyen ẹkeme ndinen̄ede n̄kụt unen nditoro Jehovah?
11 Bible owụt ke mme uyen ẹsiwak ndinen̄ede n̄kụt unen ke nditoro Jehovah. Ke uwụtn̄kpọ, odu eyenan̄wan Israel kiet oro mbon Syria ẹkemende ẹka ntan̄mfep. Enye ama ọnọ ekaufọk esie ikọ ntiense uko uko aban̄a Elisha, prọfet Jehovah. Ikọ esie ama osụn̄ọ ke utịben̄kpọ, anamde ẹnọ okopodudu ikọ ntiense. (2 Ndidem 5:1-17) Jesus n̄ko ama ọnọ ikọ ntiense uko uko ke ini enye ekedide eyenọwọn̄. Enye ama anam ediwak n̄kpọ ke ini uyen esie oro ẹkpekewetde ẹsịn ke N̄wed Abasi, edi Jehovah ekemek kiet kpọt; enye oro akaban̄ade ini emi Jesus oro ekedide isua 12 okobụpde mme adaiso ido ukpono mbụme uko uko ke temple ke Jerusalem, onyụn̄ anamde idem akpa mmọ aban̄a nte enye ọkọfiọkde usụn̄ Jehovah.—Luke 2:46-49.
12, 13. (a) Nso ke Jesus akanam ke temple esisịt ini mbemiso enye akakpade, ndien didie ke emi okotụk mme owo ke temple? (b) Jesus akanam n̄kpọ didie aban̄a itoro oro nditọiren ẹketorode enye?
12 Ke Jesus ama okokpon, enye ama esịn udọn̄ ọnọ nditọwọn̄ n̄ko nditoro Jehovah. Ke uwụtn̄kpọ, usen ifan̄ mbemiso Jesus akakpade, enye ama abiat ini ke temple Jerusalem. Bible ọdọhọ ke enye ama anam “mme utịben̄kpọ” do. Enye ama ebịn mbon oro ẹkenamde edisana ebiet oro edi itie udịbe mbon n̄wo, osion̄o. Enye ama anam n̄ko mme nnan ye mme mbụn̄ọ ẹkop nsọn̄idem. Akpakana emi anam kpukpru owo oro ẹkedude do, akpan akpan mme adaiso ido ukpono, ẹtoro Jehovah ye Eyen esie, kpa Messiah. Nte ededi, edi n̄kpọ mfụhọ nditịn̄ ke ediwak mbon eyo oro ikọnọhọ Jehovah utọ itoro oro. Mmọ ẹma ẹfiọk ke Abasi ọkọnọ Jesus edi, edi mmọ ẹkefehe mme adaiso ido ukpono. Edi, otu kiet ama etịn̄ ikọ uko uko. Ndi ọmọfiọk mbon oro mmọ ẹkedide? Bible ọdọhọ ete: “Ke ini mbọn̄ oku ye mme ewetn̄wed ẹkụtde mme utịben̄kpọ emi [Jesus] akanamde ye nte nditọiren oro ẹfioride ke temple ẹnyụn̄ ẹdọhọde ẹte: “Mbọk, nyan̄a Eyen David!” mmọ ẹfịt esịt ẹnyụn̄ ẹdọhọ [Jesus] ẹte: ‘Nte omokop se mmọ emi ẹdọhọde?’”—Matthew 21:15, 16; John 12:42.
13 Mme oku oro ẹkekere ke Jesus ọyọdọhọ nditọiren oro ẹketorode enye ẹdop uyo. Ndi Jesus ama ọdọhọ mmọ ẹdop uyo? Baba-o! Jesus ama ọbọrọ mme oku oro ete: “Ih. Nte akanam mbufo ikotke emi ite, ‘Afo ada inua nseknditọ ye mmọ eke ẹwapde eba ọnọ itoro’?” Nte an̄wan̄ade, itoro nditọiren oro ama enem Jesus ye Ete esie esịt. Nditọiren oro ẹkenam se ikpọ owo oro ẹkedude ke temple ẹkpekenamde. Anaedi mmọ ẹma ẹnen̄ede ẹkụt ntak nditoro Jesus. Mmọ ẹma ẹkụt enye anamde mme utịben̄kpọ, etịn̄ ikọ ye uko ye mbuọtidem, onyụn̄ owụt ke imenen̄ede ima Abasi ye ikọt esie. Kpa nte enye ọkọdọhọde, enye ekedi “Eyen David” oro ẹken̄wọn̄ọde, kpa Messiah. Ẹma ẹdiọn̄ nditọiren oro ke ntak mbuọtidem mmọ, koro mmọ ẹma ẹkam ẹnyene akwa ifet ndisu ntịn̄nnịm ikọ.—Psalm 8:2.
14. Didie ke mme enọ oro mme uyen ẹnyenede ẹkeme ndin̄wam mmọ ẹtoro Abasi?
14 Nso ke nnyịn ikeme ndikpep nto mme utọ uwụtn̄kpọ oro? Imekpep nte ke mme uyen ẹkeme ndinen̄ede n̄kụt unen ke nditoro Jehovah. Mmọ ẹsinyene ukeme ndikụt akpanikọ in̄wan̄-in̄wan̄ ye mmemmem mmemmem, ẹdade ofụri esịt ye ifịk ẹwụt mbuọtidem mmọ. Mmọ ẹnyene enọ efen oro ẹsiakde ke Mme N̄ke 20:29: “Mbana n̄kparawa edi odudu mmọ.” Ih, mbufo mme uyen ẹmenyene ukeme ye odudu—ata inyene ndida ntoro Jehovah. Didie ke mbufo ẹkeme ndinen̄ede nda mme enọ emi nnam n̄kpọ uforo uforo?
Didie ke Afo Ekeme Nditoro Jehovah?
15. Oyom enyene nso orụk esịt man otoro Jehovah ifịk ifịk?
15 Nditoro Jehovah ifịk ifịk ọtọn̄ọ ke esịt. Afo ukemeke nditoro Jehovah ifịk ifịk edieke edide mbon en̄wen ẹdọhọ fi otoro. Ti ete ke n̄kponn̄kan ibet edi emi: “Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo.” (Matthew 22:37) Nte afo emedi edifiọk Jehovah ọkpọkpọ ebe ke ndikpep Ikọ esie? Afo ndikpep Ikọ Abasi ayanam fi ama Jehovah. Ndammana usụn̄ ndiwụt ima oro edi nditoro enye. Edieke enyenede in̄wan̄-in̄wan̄ ye eti esịt, eyemem fi utom nditoro Jehovah ifịk ifịk.
16, 17. Nso ebuana ke edu uwem enyene ke nditoro Jehovah? Da uwụtn̄kpọ nam an̄wan̄a.
16 Idahaemi, idem mbemiso ekerede se editịn̄de, kere nte edinamde n̄kpọ. Edieke eyenan̄wan Israel oro ke eyo Elisha ekpekedide eyen emiom, eyen usọn̄enyịn, m̀mê eyen oro mînamke akpanikọ, ndi emekere ke mbon Syria oro ẹkemende enye ẹka ntan̄mfep ẹkpekekpan̄ utọn̄ ẹkop se enye eketịn̄de aban̄a prọfet Jehovah? Eyedi ikpakakpan̄ke. Kpasụk ntre, enen̄ede etie nte ke mme owo ẹyekpan̄ utọn̄ ẹnọ fi edieke mmọ ẹkụtde ke afo edi eyen oro okponode owo, anamde akpanikọ, onyụn̄ enyenede eti edu uwem. (Rome 2:21) Kere ban̄a uwụtn̄kpọ oro etienede mi.
17 Ke ufọkn̄wed, ẹma ẹnyịk n̄kaiferi isua 11 ke Portugal ndibuana ke edinam usen nduọkodudu oro akatuahade ye ubieresịt esie oro Bible ọnọde ukpep. Enye ama ada edu ukpono anam an̄wan̄a andikpep esie ntak oro imọ mîdibuanake ke edinam oro, edi andikpep esie ama asak enye nsahi. Nte ini akakade, andikpep oro ama odomo ediwak ini ndisuene enye, adade ido ukpono esie anam mbubru. Nte ededi, n̄kaiferi emi ama aka iso ndinam n̄kpọ ukpono ukpono. Ediwak isua ke ukperedem, n̄kaiferi oro ama akabade edi asiakusụn̄ ofụri ini, oro edi asan̄autom uyọhọ ini. Ke akamba mbono, enye ama ada ese mbon oro ẹkenade baptism onyụn̄ ọdiọn̄ọ owo kiet ke otu mmọ. Owo oro ekedi akani andikpep esie! Ke mmọ ẹma ẹkefat kiet eken idara idara, andikpep oro ama asian n̄kaiferi oro ete ke imọ ikefreke edu ukpono esie. Andikpep oro ama onyụn̄ asian enye ke Ntiense kiet ama awaha ufọk imọ, ye nte ke imọ ima itịn̄ iban̄a edu uwem esie. Nte utịp, ẹma ẹtọn̄ọ ukpepn̄kpọ Bible ye andikpep oro, ndien enye ama ọbọ akpanikọ Bible. Ih, edu uwem fo ekeme ndidi ata okopodudu usụn̄ ndida ntoro Jehovah!
18. Nso ke uyen ekeme ndinam edieke esisọn̄de enye nditọn̄ọ nneme mban̄a Bible ye Jehovah Abasi?
18 Ndi esisọn̄ fi ndusụk ini nditọn̄ọ nneme ke ufọkn̄wed mban̄a se afo enịmde ke akpanikọ? Idịghe afo ikpọn̄ ke emi esisọn̄ ndinam. Nte ededi, afo emekeme ndinam n̄kpọ ke usụn̄ oro edinamde mbon en̄wen ẹbụp fi se enịmde ke akpanikọ. Ke uwụtn̄kpọ, edieke ibet enyịmede, ufọkn̄wed mbufo onyụn̄ enyịmede, ntak mûdaha mme n̄wed oro ẹkọn̄ọde ke Bible uka ufọkn̄wed unyụn̄ ukot mmọ ke ini udia uwemeyo m̀mê ke mme ini en̄wen oro ẹyakde ẹnam ntre? Ekemmọ nditọ ufọkn̄wed ẹkeme ndibụp fi se okotde. Ebe ke ndibọrọ mmọ nnyụn̄ nsian mmọ se inemde fi ke ibuotikọ m̀mê ke n̄wed oro okotde, ekeme ndimem fi utom ndisọsọp ntọn̄ọ nneme. Ti ndibụp mme mbụme nyụn̄ dụn̄ọde fiọk se ekemmọ nditọ ufọkn̄wed ẹnịmde ke akpanikọ. Kpan̄ utọn̄ ukpono ukpono, nyụn̄ buana ye mmọ se ekpepde ke Bible. Nte mme ifiọkutom oro ẹdude ke page 29 ẹwụtde, ediwak mme uyen ke ẹtoro Abasi ke ufọkn̄wed. Emi anam mmọ ẹnen̄ede ẹkop inemesịt onyụn̄ an̄wam ediwak owo ẹdi ẹdifiọk Jehovah.
19. Didie ke mme uyen ẹkeme nditịm nnyene uforo ke ini ẹkwọrọde ikọ to ke enyịnusụn̄ sịm enyịnusụn̄?
19 Ndikwọrọ ikọ to ke enyịnusụn̄ sịm enyịnusụn̄ edi ata mfọnn̄kan usụn̄ nditoro Jehovah. Edieke mûtọn̄ọke kan̄a nditiene n̄ka ukwọrọikọ, ntak mûnịmke emi nte utịtmbuba fo? Edieke edide emesitiene aka, ndi mme utịtmbuba efen efen ẹdu oro afo ekemede ndinịm nnọ idemfo? Ke uwụtn̄kpọ, utu ke nditịn̄ ikọ kiet ke kpukpru enyịnusụn̄, yom mme usụn̄ oro akpanamde n̄kọri, ọdọhọde ete ye eka fo ye mbon en̄wen oro ẹnyenede mbufiọk ẹnọ fi nti ekikere. Kpep ndinen̄ede nda Bible nnam n̄kpọ, ndinam mme mfiakn̄ka oro ẹnyenede uforo, nnyụn̄ ntọn̄ọ ukpepn̄kpọ Bible. (1 Timothy 4:15) Adan̄a nte afo adade mme utọ usụn̄ oro otoro Jehovah, ntre ke afo editetịm enyene uforo, onyụn̄ enen̄ede okop inem ke utom ukwọrọikọ fo.
Ini Ewe ke Afo Ọkpọtọn̄ọ Nditoro Jehovah?
20. Ntak emi mme uyen mînyeneke ntak ndomokiet ndikere ke mmimọ imekpri ikaha nditoro Jehovah?
20 Ke otu mbụme ita oro inemede ke ibuotikọ emi, ibọrọ akpatre mbụme emi emem akan. Tịm fiọk in̄wan̄-in̄wan̄ ibọrọ oro Bible ọnọde: “Nyụn̄ ti Andibot fi ke ini afo edide akparawa.” (Ecclesiastes 12:1) Ih, afo enyene nditọn̄ọ idahaemi ntoro Jehovah. Edi mmemmem n̄kpọ ndidọhọ: “Mmekpri n̄kaha nditoro Jehovah, nnyụn̄ nnyeneke ifiọk. N̄kpenyene ndibet tutu n̄kpon.” Idịghe afo edi akpa owo ndikere n̄kpọ ntem. Ke uwụtn̄kpọ, ekpri Jeremiah ọkọdọhọ Jehovah ete: “Aha, Ọbọn̄ Jehovah! sese, mfiọkke nditịn̄ ikọ: koro ami ndide eyenọwọn̄.” Jehovah ama ọsọn̄ọ enye idem onyụn̄ ọdọhọ ke ntak ndomokiet idụhe enye ndikop ndịk. (Jeremiah 1:6, 7) Kpasụk ntre, nnyịn inyeneke ntak ndomokiet ndikop ndịk ke ini itorode Jehovah. Idụhe mfịna ndomokiet oro ekemede ndisịm nnyịn oro Jehovah mîdikọkke ofụri ofụri.—Psalm 118:6.
21, 22. Ntak emi ẹmende mme uyen oro ẹtorode Jehovah ẹdomo ye mbara, ndien ntak emi ọnọde nsịnudọn̄?
21 Do, nnyịn imesịn udọn̄ inọ mbufo mme uyen ite: Ẹkûmen̄e nditoro Jehovah! Ini emi mbufo ẹdide uyen mi edi mfọnn̄kan ini nditiene nnam ata akpan utom oro ẹnamde mfịn ke isọn̄. Edieke mbufo ẹnamde emi, mbufo ẹmekabade ẹdi ubak utịbe utịbe ubon—kpa ubon ofụri ekondo oro otorode Jehovah. Jehovah okop inemesịt mbufo ndidi ubak ubon emi. Ẹtịm ẹfiọk mme ikọ odudu spirit emi, oro andiwet psalm eketịn̄de ye Jehovah ete: “Ikọt fo ẹdi enọ ima-esịt ke usen odudu fo, ke edisana mbana—oto ke idịbi usiere,—afo emenyene mbara uyen fo.”—Psalm 110:3.
22 Ndi isinemke nnyịn ndikụt mbara n̄kpọusen? Mbara esibịt n̄kpọ, eye, onyụn̄ awak etieti. Nte Jehovah adade mbufo mme uyen oro ẹkade iso nditoro enye ke ndiọkeyo emi edi oro. Nte an̄wan̄ade, mbufo ndimek nditoro Jehovah adat enye esịt. (Mme N̄ke 27:11) Ke ntre, mbufo mme uyen ẹsịn ofụri ukeme ẹtoro Jehovah!
Didie ke Afo Ọkpọbọrọ?
• Nso idi ndusụk akpan ntak nditoro Jehovah?
• Mme uwụtn̄kpọ ewe ke Bible ẹwụt ke mme uyen ẹkeme ndinen̄ede n̄kụt unen nditoro Jehovah?
• Didie ke mme uyen ẹkeme nditoro Jehovah mfịn?
• Ini ewe ke mme uyen ẹkpetọn̄ọ nditoro Jehovah, ndien ntak-a?
[Mme Mbụme Ukpepn̄kpọ]
[Mme ndise ke page 25]
Edieke ufan fo ekpenyenede n̄wọrọnda ukeme, ndi afo ukpasianke mbon en̄wen uban̄a emi?
[Ndise ke page 27]
Ekemmọ nditọ ufọkn̄wed ẹkeme ndinyene udọn̄ ke se afo enịmde ke akpanikọ
[Ndise ke page 28]
Edieke afo oyomde ndinam n̄kọri ke utom ukwọrọikọ fo, dọhọ Ntiense oro enen̄erede enyene mbufiọk ọnọ fi nti ekikere