Udia Mbubịteyo Ọbọn̄—Didie ke Ẹkpenịm Enye?

KE NDISỊN un̄wana ke edinam Udia Mbubịteyo Ọbọn̄, Christian apostle Paul ewet ete: “Koro n̄kọbọde ke ubọk Ọbọn̄ se n̄konyụn̄ nyakde nnọ mbufo, nte, ke okoneyo oro ẹdade Enye ẹnọ, Ọbọn̄ Jesus emen uyo; ndien ke Enye ama ọkọnọ Abasi ekọm, Enye obụn̄ uyo, onyụn̄ ọdọhọ ete, Emi edi ikpọkidem Mi ọnọ mbufo; ẹnam emi nditi Mi. Kpa ntre n̄ko ke Enye emen cup, ke ẹma ẹkedia n̄kpọ ẹma, ete, Cup emi edi obufa ediomi ke iyịp Mi; ẹnam emi, adan̄a ini nte ẹn̄wọn̄wọn̄, ke editi Mi. Koro adan̄a ini nte ẹdadia uyo emi ẹnyụn̄ ẹn̄wọn̄ cup emi, mbufo ẹkwọrọ n̄kpa Ọbọn̄ tutu Enye edi.”—1 Corinth 11:23-26.

Nte Paul ọdọhọde, Jesus ọkọtọn̄ọ Udia Mbubịteyo Ọbọn̄ ‘ke okoneyo oro Judas Iscariot akadade Jesus ọnọ’ mme adaiso ido ukpono mme Jew emi ẹkenyịkde mbon Rome ndikọn̄ Christ ke eto n̄wot. Ẹkedia udia oro ke ata isọn̄ isọn̄ mbubịteyo Thursday, March 31, 33 E.N. Jesus akakpa ke eto ndutụhọ ke uwemeyo Friday, April 1. Sia usen ke n̄wed usenọfiọn̄ mme Jew ekesitọn̄ọde ke mbubịteyo usen kiet esịm mbubịteyo usen efen, Udia Mbubịteyo Ọbọn̄ ye n̄kpa Jesus Christ ẹkeda itie kpa ke usen oro—Nisan 14, 33 E.N.

Mbon oro ẹtade uyo ẹnyụn̄ ẹn̄wọn̄de wine ẹkenyene ‘ndika iso nnam emi’ ke nditi Jesus. Nte ekemde ye edikabade efen, Jesus ọkọdọhọ ete: “Ẹnam emi nte n̄kpọ ndida nti mi.” (1 Corinth 11:24, The Jerusalem Bible) Ẹkot Udia mbubịteyo Ọbọn̄ n̄ko Editi n̄kpa Christ.

Ntak Ẹtide N̄kpa Jesus?

Ibọrọ ọkọn̄ọ ke ufọn oro n̄kpa emi enyenede. Jesus akakpa nte akakan andimụm unen itie edikara Jehovah n̄kama. Ntem enye ama owụt ke Satan edi osu nsu ke ndidori mme owo ikọ nte ke mmọ ẹnam n̄kpọ Abasi n̄kukụre ke ntak ibụk ibụk udọn̄. (Job 2:1-5; Mme N̄ke 27:11) Ebede ke n̄kpa esie nte mfọnmma owo, Jesus n̄ko ama “ọnọ uwem Esie ndifak ediwak owo.” (Matthew 20:28) Ke ini Adam akanamde idiọkn̄kpọ adian Abasi, enye ama ọduọk mfọnmma uwem eke owo ye idotenyịn oro akasan̄ade ye emi. Edi “Abasi akamama ererimbot [ubonowo] ntem, tutu Enye osio ikpọn̄-ikpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.”  (John 3:16) Ke akpanikọ, “n̄kpọ-eyen-utom idiọk-n̄kpọ edi n̄kpa, edi enọ Abasi edi nsinsi uwem ke Christ Jesus Ọbọn̄ nnyịn.”—Rome 6:23.

N̄kpa Jesus Christ ke ntem abuana n̄kponn̄kan ima iba oro ẹwụtde—akwa ima oro Jehovah okowụtde ubonowo ke ndikọnọ Eyen esie ye ima n̄waidem oro Jesus okowụtde ubonowo ke ndikenyịme ndinọ uwem esie eke owo. Editi n̄kpa Jesus anam ẹda ima iba oro ẹkewụtde mi ke ọsọn̄urua n̄kpọ. Sia nnyịn idide mme andibọ ufọn nto ima emi, nte nnyịn ikpowụtke esịtekọm iban̄a enye? Usụn̄ kiet ndinam ntre edi ndidụk edinam Udia Mbubịteyo Ọbọn̄.

Se Uyo ye Wine Ẹdade Ẹban̄a

Ke ini ọkọtọn̄ọde Udia Mbubịteyo Ọbọn̄, Jesus akada uyo ye cup ndatndat wine nte mme n̄kpọ idiọn̄ọ m̀mê mme ndamban̄a n̄kpọ. Jesus ama emen uyo, ndien ke “ama ọkọnọ Abasi ekọm, Enye obụn̄ uyo, onyụn̄ ọdọhọ ete, [uyo] emi edi ikpọkidem mi ọnọ mbufo.” (1 Corinth 11:24) Ẹkenyene ndibụn̄ uyo emi ndeme nnyụn̄ nta sia enye ekedide uyo oro ẹkekemede ndisọp mbụn̄, emi ẹkedade mmọn̄ ye ndomuyo ẹnam, oro owo mîkesịnke leaven m̀mê yeast. Ke N̄wed Abasi, leaven ada aban̄a idiọkn̄kpọ. (Matthew 16:11, 12; 1 Corinth 5:6, 7) Jesus ikanamke idiọkn̄kpọ. Ke ntre mfọnmma ikpọkidem esie eke owo ekedi uwa ufak oro odotde ndifak ubonowo. (1 John 2:1, 2) Odot didie ntem nte uyo oro adade aban̄a anana-idiọkn̄kpọ ikpọkidem Christ edi enye oro leaven mîdụhe!

Jesus n̄ko ama ọnọ ekọm aban̄a cup ndatndat wine oro owo mîkabuakke n̄kpọ onyụn̄ ọdọhọ ete: “Cup emi edi obufa ediomi ke iyịp Mi.” (1 Corinth 11:25) Ndatndat wine oro ekesịnede ke cup ada aban̄a iyịp Jesus. Kpa nte ẹkedade iyịp enan̄ ye ebot oro ẹkewade ẹsọn̄ọ Ibet ediomi ke ufọt Abasi ye idụt Israel ke 1513 M.E.N., ntre ke iyịp Jesus oro ẹkeduọkde ke ini n̄kpa esie ọkọsọn̄ọ obufa ediomi.

Mmanie Ẹkpedia?

Man idiọn̄ọ mbon oro ẹdotde ndidia mme n̄kpọ idiọn̄ọ Editi, oyom nnyịn ifiọk se obufa ediomi edide ye mbon oro ẹbuanade ke enye. Bible ọdọhọ ete: “Jehovah ọdọhọ, ete, Sese, mme usen ke ẹdi eke ndinamde obufa ediomi ye ufọk Israel, ye ufọk Judah . . . nyesịn mmọ mbet mi ke esịt, nnyụn̄ n̄wet mmọ ke ọwọn̄esịt; nyonyụn̄ ndi Abasi mmọ, ndien mmọ ẹyedi ikọt mi. . . . Koro nyefen mme idiọk ido mmọ, ndinyụn̄ ntịghi aba mme oburobụt ido mmọ.”—Jeremiah 31:31-34.

Obufa ediomi emi anam ẹkeme ndinyene san̄asan̄a itie ebuana ye Jehovah Abasi. Ebede ke ediomi emi, odu otu mme owo oro ẹkabarede ẹdi ikọt esie ndien enye akabade edi Abasi mmọ. Ẹwet ibet Jehovah ke ọwọn̄esịt mmọ, ndien idem mme Jew oro mînaha mbobi ẹkeme ndidi ndinyene obufa itie ebuana ediomi ye Abasi. (Rome 2:29) Luke andiwet Bible ewet aban̄a uduak Abasi ‘ndidi ndise mme Gentile, man osio ikọt ke otu mmọ ọnọ enyịn̄ Esie.’ (Utom 15:14) Nte 1 Peter 2:10 ọdọhọde, mmọ emi mîkedịghe “ikọt baba ete kiet ke eyo oko, ẹyedi ikọt Abasi ke emi.” N̄wed Abasi etịn̄ aban̄a mmọ nte “Israel Abasi,” oro edi, Israel eke spirit. (Galatia 6:16; 2 Corinth 1:21) Do, obufa ediomi edi ediomi ke ufọt Jehovah Abasi ye Israel eke spirit.

Ke akpatre okoneyo oro enye okodude ye mme mbet esie, Jesus ke idemesie n̄ko ama anam ediomi efen ye mmọ. Enye ọkọdọhọ mmọ ete: “Kpa nte Ete Mi ekenịmde Obio Ubọn̄ ọnọ Mi, kpasụk ntre ke Ami nnyụn̄  nnịm nnọ mbufo.” (Luke 22:29) Emi edi ediomi Obio Ubọn̄. Ibat mme anana-mfọnmma owo oro ẹdade ẹdisịn ke ediomi Obio Ubọn̄ edi 144,000. Ke ẹma ẹkenam mmọ ẹset ẹka heaven, mmọ ẹyekara ye Christ nte ndidem ye mme oku. (Ediyarade 5:9, 10; 14:1-4) Ntem, mbon oro ẹdude ke obufa ediomi ye Jehovah Abasi ẹdu n̄ko ke ediomi Obio Ubọn̄ ye Jesus Christ. Mmọ ẹdi n̄kukụre mbon oro ẹdotde ndidia mme n̄kpọ idiọn̄ọ ke Udia Mbubịteyo Ọbọn̄.

Didie ke mbon oro ẹdotde ndidia mme n̄kpọ idiọn̄ọ Editi ẹfiọk ke mmimọ imenyene san̄asan̄a itie ebuana ye Abasi, ke inyụn̄ idi nsan̄a mme ada udeme nnyene ye Christ? Paul anam an̄wan̄a ete: “[Edisana] spirit ke Idem Esie etiene spirit nnyịn [idaha ekikere nnyịn] edi ntiense ete, nnyịn idi nditọ Abasi. Edi edieke nnyịn idide nditọ, imonyụn̄ inyene udeme ke se ẹnịmde ẹnọ nditọ; imenyene udeme ke se Abasi enịmde; imasan̄a ye Christ inyene udeme: koro ana nte nnyịn ima ikụt ndutụhọ ye Enye, iyonyụn̄ ida ubọn̄ ye Enye.”—Rome 8:16, 17.

Ebede ke edisana spirit m̀mê anamutom odudu esie, Abasi eyet nsan̄a mme ada udeme nnyene ye Christ, aran. Emi anam mmọ ẹtịm ẹfiọk ke mmimọ idi mme anditiene nnyene udeme ke Obio Ubọn̄. Enye anam mme Christian oro ẹyetde aran ẹnyene idotenyịn eke heaven. Mmọ ẹda kpukpru se Bible etịn̄de aban̄a uwem eke heaven nte aban̄ade mmimọ. Akan oro, mmọ ẹnyịme ndiyak kpukpru ebuana eke isọn̄ ẹtak, esịnede edidu uwem ke isọn̄ ye kpukpru itie ebuana oro mmọ ẹnyenede ye mme owo. Okposụkedi mme Christian oro ẹyetde aran ke spirit ẹfiọkde ke uwem ke Paradise isọn̄ edidi utịbe, emi idịghe idotenyịn mmọ. (Luke 23:43) Sia edide spirit Abasi anam utom ke esịt mmọ mînyụn̄ idịghe mme ekikere nsunsu ido ukpono, mmọ ẹnyene idotenyịn eke heaven oro n̄kpọ mîkemeke ndikpụhọde ndien ke ntre mmọ ẹdot ndidia mme n̄kpọ idiọn̄ọ Editi.

Yak idọhọ ke owo itịmke ifiọk m̀mê imọ imodu ke obufa ediomi ye ediomi Obio Ubọn̄. Nso edieke spirit Abasi mîtiehe ntiense nte ke enye edi nsan̄a ada udeme nnyene ye Christ? Do ayakwan̄a enye ndidia mme n̄kpọ idiọn̄ọ Editi. Ke akpanikọ, Abasi idikopke inemesịt edieke owo okoide-koi owụt idemesie nte ke idi kiet oro ẹkotde ndidi edidem ye oku ke heaven, ke ini enye ke akpanikọ mîkọbọhọ utọ ikot oro.—Rome 9:16; Ediyarade 22:5.

Ẹkpenịm Enye Ikafan̄?

Nte ẹkpenyene nditi n̄kpa Jesus kpukpru urua m̀mê idem kpukpru usen? Ọfọn, Christ ọkọtọn̄ọ Udia Mbubịteyo Ọbọn̄ ndien ẹma ẹwot enye nte mînenke ke Usen Passover. Passover emi ẹkesinịmde inikiet kpọt ke isua, ke Nisan 14, ekedi editi edinyan̄a oro ẹkenyan̄ade Israel ẹsio ke ufụn mbon Egypt. (Exodus 12:6, 14; Leviticus 23:5) Ntre ẹkpenyene nditi n̄kpa “passover nnyịn, kpa Christ” sụk inikiet ke isua, idịghe kpukpru urua m̀mê kpukpru usen. (1 Corinth 5:7) Ke ndinịm Udia Mbubịteyo Ọbọn̄, mme Christian ẹtiene kpa usụn̄ oro Jesus akadade ke ini enye ọkọtọn̄ọde Udia Mbubịteyo Ọbọn̄ emi.

Nso ndien ke mme ikọ Paul emi ẹwọrọ: “Adan̄a ini nte ẹdadia uyo emi ẹnyụn̄ ẹn̄wọn̄ cup emi, mbufo ẹkwọrọ n̄kpa Ọbọn̄ tutu Enye edi”? (1 Corinth 11:26) Ke itien̄wed emi, Paul akada ikọ oro ọwọrọde “kpukpru ini oro,” m̀mê “ini ekededi.” Ntem, enye ọkọdọhọ ke ini ekededi oro mme Christian oro ẹyetde aran ẹdiade mme n̄kpọ idiọn̄ọ, mmọ ẹyetan̄a  mbuọtidem oro mmọ ẹnyenede ke uwa ufak Jesus.

Mme Christian oro ẹyetde aran ẹyeti n̄kpa Christ “tutu Enye edi.” Edinam emi ayaka iso tutu Jesus edi edida mme anditiene enye oro ẹyetde aran aka heaven ebe ke ediset ke n̄kpa ndụk uwem eke spirit ke ini “edidu” (NW) esie. (1 Thessalonica 4:14-17) Emi odu ke n̄kemuyo ye mme ikọ emi Christ eketịn̄de ọnọ mme anam-akpanikọ apostle esie 11 ete: “Edieke n̄kade n̄ketịm itie ntre nnọ mbufo, nyafiak ndi ndida mbufo nnọ Idem Mi; man mbufo ẹnyụn̄ ẹdu ke ebiet eke Ami ndude.”—John 14:3.

Nso ke Enye Ọwọrọ ọnọ Fi?

Ndi oyom ẹdia mme n̄kpọ idiọn̄ọ Editi man ẹbọ ufọn ẹto uwa ufak Jesus ẹnyụn̄ ẹnyene nsinsi uwem ke isọn̄? Baba. Idụhe ebiet ndomokiet ke Bible oro ọnọde ekikere nte ke ini ẹdinamde mme utọ abak-Abasi nte Noah, Abraham, Sarah, Isaac, Rebekah, Joseph, Moses, ye David ẹset, ke mmọ ẹyedia mme n̄kpọ idiọn̄ọ emi. Edi, mmọ ye kpukpru mbon eken oro ẹyomde anana-utịt uwem ke isọn̄ ẹnyene ndibuọt idem ke Abasi ye Christ ye ke enọ uwa ufak Jesus oro Jehovah ọnọde. (John 3:36; 14:1) Man enyene nsinsi uwem, ana afo n̄ko owụt utọ mbuọtidem oro. Afo ndidụk editi n̄kpa Christ eke isua ke isua ayanam afo eti utọ akwa uwa oro oyonyụn̄ anam afo enen̄ede owụt esịtekọm aban̄a enye.

Apostle John ama ọsọn̄ọ owụt ufọn oro uwa Jesus enyenede ke ini enye ọkọdọhọde ete: “Mmewet n̄kpọ emi nnọ mbufo [ekemmọ mbon oro ẹyetde aran], man mbufo ẹkûnam idiọk-n̄kpọ. Ndien edieke owo anamde idiọk-n̄kpọ, nnyịn imenyene Ekpe-emem ke ufọt nnyịn ye Ete, kpa Jesus Christ, emi edide edinen; Enye onyụn̄ edi usio-isop mme idiọk-n̄kpọ nnyịn, inyụn̄ idịghe eke nnyịn ikpọn̄, edi eke ofụri ererimbot nde.” (1 John 2:1, 2) Mbon oro ẹyetde aran ẹkeme ndidọhọ ke uwa Jesus edi usio-isọp oro ofụkde mme idiọkn̄kpọ mmimọ. Edi enye n̄ko edi uwa oro ofụkde mme idiọkn̄kpọ ofụri ererimbot, anamde okopitem ubonowo ekeme ndinyene nsinsi uwem!

Nte afo oyodu ke April 4, 2004, man eti n̄kpa Jesus? Mme Ntiense Jehovah ke ofụri ererimbot ẹyenam edinam emi ke mme itie usopidem mmọ. Edieke afo odụkde, afo ọyọbọ ufọn oto edikpan̄ utọn̄ nnọ ata akpan nneme Bible. Ẹyeti fi ediwak n̄kpọ oro Jehovah Abasi ye Jesus Christ ẹnamde ẹnọ nnyịn. Ọyọbọ ufọn ke n̄kan̄ eke spirit ndisop idem ye mbon oro ẹnyenede ntotụn̄ọ ukpono ẹnọ Abasi ye Christ ye uwa ufak Jesus. Edinam emi ekeme ndinam afo enen̄ede enyene udọn̄ ndikabade ndi andibọ mfọnido Abasi oro owo mîdotke, adade esịm uwem nsinsi. Kûyak n̄kpọ ndomokiet ọbiọn̄ọ fi ndidụk. Dụk inem inem edinam emi adade ukpono ọsọk onyụn̄ enemde Jehovah Abasi, kpa Ete nnyịn eke heaven, esịt.

[Ndise ke page 5]

N̄kpa Jesus abuana n̄kponn̄kan ima iba oro ẹwụtde

[Ndise ke page 6]

Uyo eke leaven mîdụhe ye wine ẹdi n̄kpọ idiọn̄ọ oro ẹtịmde ẹdot ndida mban̄a anana-idiọkn̄kpọ ikpọkidem Jesus ye iyịp esie oro ẹkeduọkde