Nnyịn Ikadaha Ikpọn̄ ke Ini Ẹkedomode Mbuọtidem Nnyịn

Vicky ekedi ediye nsekeyen an̄wan—okop nsọn̄idem, eye uyai, onyụn̄ atara idem. Ih, ke ini enye akamanade ke ini utọ eke 1993, esịt ama enem nnyịn etieti. Nnyịn ikodụn̄ ke ekpri obio kiet ke edem usụk Sweden, ndien uwem ama enem.

NTE ededi, ke ini Vicky ekedide isua kiet ye ubak, eketie nte uwem nnyịn ama ọtọ etịmede. Enye ikokopke nsọn̄idem ke ndusụk ini, ntre nnyịn ima imen enye ika ufọkibọk. Tutu amama nnyịn idifreke ini oro abiaibọk akasiande nnyịn ete eyen nnyịn an̄wan ọdọn̄ọ ata idiọk udọn̄ọ oro ẹkotde lymphoblastic leukemia, kpa orụk kansa afia nsen iyịp oro esinọmọde nditọwọn̄.

Ama ọsọn̄ ndinyịme nte ke ekpri eyen nnyịn an̄wan ama ọdọn̄ọ utọ enyene-ndịk udọn̄ọ emi. Enye ndisụk ntọtọn̄ọ ndidiọn̄ọ idem ekedi oro, ndien idahaemi enye ekeme ndikpa. Ke odomode ndidọn̄ nnyịn esịt, abiaibọk ama ọdọhọ ke ẹkeme ndinọ usọbọ oro edikụtde unen, esịnede edikịm mmọn̄ibọk ọkọrọ ye ediwak iyịp nsịn enye ke idem. Emi ekedi n̄kpọ n̄kpaidem efen ọnọ nnyịn.

Ẹdomo Mbuọtidem Nnyịn

Nnyịn ima inen̄ede ima eyen nnyịn an̄wan ikonyụn̄ iyom mfọnn̄kan ibọkusọbọ inọ enye. Kpa ye oro, nnyịn ikedehede inyịme edikịm iyịp nsịn ke idem. Nnyịn imọsọn̄ọ inịm Ikọ Abasi, kpa Bible ke akpanikọ, emi etịn̄de in̄wan̄-in̄wan̄ ete ke ana mme Christian ‘ẹbet iyịp.’ (Utom 15:28, 29) Nnyịn n̄ko ima ifiọk ite ke edikịm iyịp nsịn ke idem edi n̄kpọndịk ke idemesie. Ediwak owo ẹmen udọn̄ọ ẹnyụn̄ ẹkpan̄a ẹto edikịm iyịp nsịn ke idem. N̄kukụre ukpụhọ usọbọ ekedi eti usọbọ oro mîbuanake edikịm iyịp nsịn ke idem. Ke afan̄ emi, en̄wan mbuọtidem nnyịn ama ọtọn̄ọ.

 Nso ke nnyịn ikpanam? Nnyịn ima ikot Itieutom Utịm Ntọt Ufọkibọk ke ọfis n̄kọk itieutom eke Mme Ntiense Jehovah ke Sweden ndiben̄e un̄wam. * Ke ndondo oro, ẹma ẹnọ etop ke ukwak unọ etop aka nsio nsio ufọkibọk ke ofụri Europe ke nnyịn ndiyom ufọkibọk ye abiaibọk oro edinyịmede ndikama mmọn̄ibọk nnọ usọbọ ye unana edikịm iyịp nsịn ke idem. Ifịk ye ima oro nditọete Christian nnyịn ẹkewụtde ke ukeme mmọ ndin̄wam nnyịn ẹma ẹnen̄ede ẹsọn̄ọ nnyịn idem. Owo ikọkpọn̄ke nnyịn ke en̄wan mbuọtidem nnyịn.

Ke ufan̄ hour ifan̄, ẹma ẹkụt ufọkibọk ye abiaibọk ke Homburg/Saar, Germany. Ẹma ẹnam ndutịm ẹnọ nnyịn ndife n̄ka do ke ndan̄nsiere man ẹkese Vicky idem. Ke ini ikesịmde, nditọete Christian nnyịn ẹtode mme esop n̄kann̄kụk eke Mme Ntiense Jehovah ke Homburg, ọkọrọ ye ndusụk iman nnyịn, ẹma ẹdu do ndidara nnyịn. Ndien andida ke ibuot Kọmiti Unyene Nneme ye Mbon Ufọkibọk eke n̄kann̄kụk ama adara nnyịn ufiop ufiop. Enye ama asan̄a ye nnyịn aka ufọkibọk oro onyụn̄ ọnọ nnyịn kpukpru un̄wam oro enye ekekemede. Nnyịn ima ikop ndọn̄esịt ndikụt nte ke idem ke esen idụt, nnyịn ima inyene nditọete eke spirit oro ẹkeberede ye nnyịn.

Ke ini nnyịn ikosobode Dr. Graf ke ufọkibọk, nnyịn ima ifiak ikop ndọn̄esịt. Enye ama enen̄ede ọfọn ido onyụn̄ ọsọn̄ọ ọnọ nnyịn ete ke imọ iyanam kpukpru se imọ ikekeme ndinọ Vicky usọbọ ye unana edikịm iyịp nsịn ke idem. Idem ọkpọkọm mbuaha udia emi akarade n̄kọri iyịp esie edisụhọde esịm gram 5 ke deciliter kiet, imọ iyenyịme ndika iso nnọ usọbọ ye unana edikịm iyịp nsịn ke idem. Enye ama ọdọhọ n̄ko ete ke ndikabak ndụn̄ọde nyom udọn̄ọ oro nnyụn̄ nnam n̄kpọ usọp usọp ndimen Vicky ndi do ama anam ẹkeme ndisọbọ enye idem uforo uforo. Enye ama enyịme ete ke emi edidi akpa ini emi imọ idikamade mmọn̄ibọk inọ usọbọ ye unana edikịm iyịp nsịn ke idem ke utọ udọn̄ọ nte eke Vicky. Nnyịn ima inen̄ede ikop inemesịt inyụn̄ ikpono uko ye ubiere Dr. Graf ndin̄wam.

Mme Mfịna Okụk

Idahaemi mbụme ekedi, Nnyịn idinam didie ikpe okụk usọbọ Vicky? Ibuot ama oyon̄ nnyịn ke ini ẹkesiande nnyịn ẹte ke okụk usọbọ isua iba edidi n̄kpọ nte deutsche mark 150,000. Nnyịn ikenyeneke utọ ediwak okụk oro, ndien kpa ye oro ama oyom ẹtọn̄ọ ndisọbọ Vicky idem iwiwa. Sia ima ikọkpọn̄ Sweden ika ndibọ usọbọ ke Germany, nnyịn ikodotke ndibọ okụk usọbọidem ukara ndomokiet. Ntre nnyịn ima itie do ye ekpri eyen nnyịn an̄wan oro ọkọdọn̄ọde idiọk idiọk ye abiausọbọ oro okodude ke mben̄eidem ndin̄wam, edi nnyịn ikenyeneke okụk oro ekemde.

Ufọkibọk oro ama an̄wam nnyịn onyụn̄ ọdọhọ ke ẹyetọn̄ọ usọbọ ke ndondo oro edieke nnyịn ikpede mark 20,000 inyụn̄ isịnde ubọk ke n̄wed ubiọn̄ ndikpe se isụhọde. Nnyịn ima inyene ndusụk okụk, ndien ye ima ima un̄wam mme ufan ye mme iman, nnyịn ima ikeme ndikpe mark 20,000 oro—edi nso kaban̄a okụk oro okosụhọde?

Ini kiet efen ẹma ẹti nnyịn ẹte ke nnyịn ikodụhe ikpọn̄ ke en̄wan mbuọtidem nnyịn. Eyenete kiet, oro nnyịn mîkọdiọn̄ọke ini oro, ama enyịme ndikpe okụk oro okosụhọde. Nte ededi, ufọn ikodụhe nnyịn ndibọ enọ ntatubọk esie sia nnyịn ima ikekeme ndinam mme ndutịm efen.

Abiaibọk Ọtọn̄ọ Utom

Ẹma ẹtọn̄ọ ndida mmọn̄ibọk nnọ usọbọ. Ediwak usen ye urua ẹma ẹbe. Ke ndusụk idaha, n̄kpọ ama enen̄ede ọsọn̄ ye nnyịn ye ekpri eyen nnyịn an̄wan. Ke n̄kan̄ eken, nnyịn ima inen̄ede ikop inemesịt inyụn̄ iwụt esịtekọm kpukpru ini oro enye okowụtde idiọn̄ọ edikop nsọn̄idem. Usọbọ mmọn̄ibọk oro ekebịghi ke ọfiọn̄ itiaita. Nsụhọde n̄kan udomo mbuaha udia emi akarade n̄kọri iyịp Vicky ekedi gram 6 ke deciliter kiet, ndien Dr. Graf ama anam en̄wọn̄ọ esie.

Se iwakde ikan isua itiokiet ẹmebe, ndien akpatre ndụn̄ọde usan̄aiyịp ọkpọ asakedem esie owụt ke enye inyeneke kansa afia nsen iyịp. Idahaemi enye edi eyenan̄wan emi okopde inemesịt  mînyụn̄ inyeneke idiọn̄ọ udọn̄ọ oro ndomokiet. Ih, etie nte edi utịben̄kpọ nte ke Vicky enen̄ede okop nsọn̄idem ntre. Nnyịn imọfiọk ite ke ediwak nditọwọn̄ oro ẹdọn̄ọde ukem udọn̄ọ emi ẹsikpan̄a kpa ye edikịm mmọn̄ibọk ye iyịp nsịn ke idem.

Nnyịn imakan ke en̄wan mbuọtidem, edi ye un̄wam otode mme iman nnyịn, nditọete Christian iren ye iban, ye mbiaibọk. Itieutom Utịm Ntọt Ufọkibọk ama ọnọ nnyịn ọyọhọ ibetedem kpukpru ini. Dr. Graf ye mme nsan̄a esie ẹma ẹda usọ mmọ ẹnam n̄kpọ ndin̄wam Vicky afiak okop nsọn̄idem. Ke kpukpru emi, nnyịn imenen̄ede iwụt esịtekọm.

Ẹsọn̄ọ Mbuọtidem Nnyịn

Nte ededi, ke akande kpukpru, nnyịn imọkọm Abasi nnyịn, Jehovah, ke ima ima ukpeme esie ye odudu oro nnyịn ikọbọde ito Ikọ esie, kpa Bible. Ke ini ifiakde ise edem, nnyịn imokụt adan̄a ediwak n̄kpọ oro nnyịn ikpepde ye adan̄a nte ọkpọsọn̄ ifiọk n̄kpọntịbe uwem emi ọsọn̄ọde mbuọtidem nnyịn.

Idahaemi udọn̄ ofụri esịt nnyịn edi ndika iso nnyene n̄kpet n̄kpet itie ebuana ye Jehovah Abasi nnyụn̄ n̄kpep eyen nnyịn an̄wan ufọn edidu uwem ke n̄kemuyo ye se enye oyomde. Ih, nnyịn iyom ndinọ enye eti n̄kpọ-akpa eke spirit kaban̄a nsinsi uwem ke Paradise oro edide mi ke isọn̄.—Utịp-usịn.

[Ikọ idakisọn̄]