SE BIBLE ETỊN̄DE ABAN̄A
Ndika N̄kpọ ke Ini
Ediwak owo ẹma mme owo ẹsika n̄kpọ ke ini, edi mmọ ke idemmọ isikemeke ndika n̄kpọ ke ini. Bible etịn̄ se ikemede ndin̄wam nnyịn isika n̄kpọ ke ini.
Ntak emi ọfọnde ndisika n̄kpọ ke ini-e?
NTAK EMI EKPEBEHEDE FI
Ndusụk ini, owo ndibak n̄kesịm ebiet emi enye akade esinam esịt ana enye sụn̄. Ndibak n̄ka n̄kpọ n̄ko esinam ẹtịn̄ eti ikọ ẹban̄a owo. Ntak emi idọhọde ntre?
Ndisibak n̄ka n̄kpọ owụt ke owo ọdiọn̄ọ se enye anamde. Edieke akade n̄kpọ ke ini, emi oyowụt ke ọmọdiọn̄ọ se adade ini fo anam utu ke ndiyak se itịbede akpan fi ndinam se akpanade anam.
Ndisika n̄kpọ ke ini esinam ẹnyene mbuọtidem ke idem owo. Ke ererimbot emi mme owo mîwakke ndinam se mmọ ẹken̄wọn̄ọde mi, mme owo ẹsikpono mbon emi ẹnamde se mmọ ẹketịn̄de. Edieke mme ufan ye mbonubon fo ẹnyenede mbuọtidem ke idem fo, mmọ ẹyekpono fi. Mme eteutom ẹsima mbon oro ẹsibakde ẹka utom ẹnyụn̄ ẹnamde utom mmọ ẹkụre ke ini. Ẹsiwak ndikpe utọ mbon emi ọfọn ẹnyụn̄ ẹmenede mmọ itie.
SE BIBLE ỌDỌHỌDE
Enyene mme itie ke Bible emi aban̄ade ndinam n̄kpọ ke ini. Ke uwụtn̄kpọ, 1 Corinth 14:40 ọdọhọ ete: “Ẹyak kpukpru n̄kpọ ẹda itie ke ido nte eyede ye ke ndutịm.” Ke ini owo iba ẹnịmde ini ye ebiet emi mmọ ẹdisobode, ọkpọfọn etieti edieke mmọ mbiba ẹsịnde ukeme man ẹsịm do ke ini. Bible ọdọhọ n̄ko ete: “Ẹmenịm ini ẹnọ kpukpru n̄kpọ, ẹmenịm ini ẹnọ kpukpru n̄kpọ ke idak ikpaenyọn̄.” (Ecclesiastes 3:1) Ufan̄ikọ en̄wen ke itien̄wed oro ọdọhọ ke enyene “ini eke ẹtọde ye ini eke ẹwụberede se ẹketọde.” (Ecclesiastes 3:2) Mme owo ẹsitọ n̄kpọ ke in̄wan̄ mmọ ke nnennen ini man se mmọ ẹtọde enen̄ede ọfọn. Ke nditịn̄ ke usụn̄ en̄wen, owo ndibak ntọ n̄kpọ esinam in̄wan̄ esie ọfọn n̄kpọ.
Bible etịn̄ akpan n̄kpọ emi akpanamde isika n̄kpọ ke ini. Ndika n̄kpọ ke ini owụt ke imokpono mbon en̄wen inyụn̄ idaha ini mmọ ibre mbre. (Philippi 2:3, 4) Edi mbon emi ẹsimade ndinam mbon en̄wen ẹtetie ẹbet mmọ idaha ini mbon en̄wen ke n̄kpọ.
“Ẹkûse ẹban̄a mbubehe mbufo kpọt, edi ẹse ẹban̄a mbubehe mbon en̄wen n̄ko.”—Philippi 2:4.
Nso ke akpanam man esika n̄kpọ ke ini?
SE BIBLE ỌDỌHỌDE
Bible ọdọhọ ikûnam n̄kpọ ke ibụmede, edi itie kan̄a ikọk ibuot. (Mme N̄ke 21:5) Edieke okụtde ke usuwakke ndika n̄kpọ ke ini, fiak tie se se esidade ini fo anam. Ekeme ndidi se enyenede ndinam awak akan fi ubọk. Tre mme n̄kpọ emi ẹsibiatde fi ini edieke mmọ mîdịghe akpan n̄kpọ. Kûyom ndika nsio nsio itie ke ekpri ini oro enyenede. Biere ndisibabak n̄ka n̄kpọ man edieke n̄kpọ emi mûkodorike enyịn etịbede ke usụn̄, utọ nte edịm ndidep m̀mê moto ndiwak tutu ukemeke ndisọp mbe, afo osụk ekeme ndikesịm ke ini.
Bible ọdọhọ idi mbon nsụkidem. (Mme N̄ke 11:2) Owo nsụkidem ọdiọn̄ọ se enye ekemede ndinam ye se enye mîkemeke ndinam. Mbemiso enyịmede ndinam n̄kpọ, tie kere kan̄a m̀mê eyekeme ndinam n̄kpọ oro ẹdọhọde anam do ke ini oro ẹnọde fi. Edieke enyịmede ke iyanam n̄kpọ emi mûdukemeke ndinam ke ini emi enyenede, ọwọrọ afo ada mfịna ọnọ idem ye mbon en̄wen!
Bible ọdọhọ n̄ko yak idiọn̄ọ nte idade ini nnyịn inam n̄kpọ. (Ephesus 5:15, 16) Ke ntre, bem iso nam mme n̄kpọ emi ẹdide akpan n̄kpọ. (Philippi 1:10) Ke uwụtn̄kpọ, ke ini esịnede ke ubomisọn̄ m̀mê etiede ebet owo, da ini oro kere se edinamde usen oro, mîdịghe da ini oro kot n̄wed.
“N̄kọkibuot owo nsịnifịk itreke ndinyene ufọn.”—Mme N̄ke 21:5.
