Jeremiah 27;1-22
27 Ke ntọn̄ọ ubọn̄ Jehoiakim eyen Josiah,+ edidem Judah, uyo emi okoto Jehovah esịm Jeremiah, ete:
2 “Ntem ke Jehovah ọdọhọ mi ete, ‘Nam mme n̄kpọkọbi ye mme ọkpọnọ+ nọ idemfo, nyụn̄ kọn̄ọ mmọ ke itọn̄ fo.+
3 Afo nyụn̄ nọ mmọ ẹsọk edidem Edom+ ye edidem Moab+ ye edidem nditọ Ammon+ ye edidem Tyre+ ye edidem Sidon+ ebe ke ubọk mme isụn̄utom emi ẹdide Jerusalem ẹbịne Zedekiah edidem Judah.
4 Nyụn̄ nọ mmọ ewụhọ ẹsọk mme eteufọk mmọ, ete:
“‘“Ntem ke Jehovah mme udịm, Abasi Israel,+ ọdọhọ ete; ntem ke mbufo ẹdidọhọ mme eteufọk mbufo ẹte,
5 ‘Ami n̄kada akwa odudu+ mi ye edinyanade ubọk+ mi nnam isọn̄,+ ubonowo+ ye mme unam ikọt oro ẹdude ke iso isọn̄; ndien mmayak enye nnọ owo eke enende mi ke enyịn.
6 Ndien ke emi, ami mmayak kpukpru isọn̄ emi nsịn ke ubọk Nebuchadnezzar edidem Babylon, asan̄autom mi; mmonyụn̄ nnọ enye mme unam ikọt nte ẹnam n̄kpọ ẹnọ enye.
7 Ndien kpukpru mme idụt ẹyenam n̄kpọ ẹnọ enye ye eyen esie ye eyeyen esie tutu ini idụt esie n̄ko edi, ndien ediwak idụt ye ikpọ ndidem ẹyesịn enye ke ufụn.’+
8 “‘“‘Ndien ama ekem idụt ye obio ubọn̄ oro mîdinamke n̄kpọ inọ Nebuchadnezzar edidem Babylon, ye enye oro mîdisịnke itọn̄ esie ke ọkpọnọ edidem Babylon, ami nyada akan̄kan̄+ ye akan̄+ ye idiọk udọn̄ọ+ n̄wọn̄ọde enyịn nse idụt oro,’ uyo Jehovah edi emi, ‘tutu ami nda ubọk esie nnam mmọ ẹkụre.’+
9 “‘“‘Ndien amaedi mbufo, ẹkûkop ikọ mme prọfet+ mbufo ye mbiaidiọn̄ mbufo ye mme adaba ndap+ mbufo ye mme ebre mfọni mbufo ye mbiamfa+ mbufo, emi ẹdọhọde mbufo ẹte: “Mbufo idinamke n̄kpọ inọ edidem Babylon.”+
10 Koro mmọ ẹtịn̄ nsunsu ntịn̄nnịm ikọ ẹnọ mbufo, man ẹda mbufo ẹkpọn̄ isọn̄ mbufo ẹka anyan ebiet; ndien ami nyasuan mbufo, mbufo ẹyenyụn̄ ẹtak.+
11 “‘“‘Ndien amaedi idụt oro edisịnde itọn̄ esie ke ọkpọnọ edidem Babylon onyụn̄ anam n̄kpọ esie, ami n̄ko nyayak enye ọduọk odudu ke isọn̄ esie,’ uyo Jehovah edi emi, ‘ndien enye ọyọtọ n̄kpọ ke esịt onyụn̄ odụn̄ ke esịt.’”’”+
12 Mmọdọhọ Zedekiah+ edidem Judah nte ekemde ye kpukpru ikọ emi,+ nte: “Mbufo ẹmen itọn̄ mbufo ẹsịn ke ọkpọnọ edidem Babylon ẹnyụn̄ ẹnam n̄kpọ ẹnọ enye ye ikọt esie ẹnyụn̄ ẹdu uwem.+
13 Ntak emi afo ye ikọt fo ẹkpekpan̄ade ke akan̄kan̄,+ ye ke akan̄+ ye ke idiọk udọn̄ọ+ nte ekemde ye se Jehovah ọkọdọhọde aban̄a idụt oro mînamke n̄kpọ inọ edidem Babylon?
14 Ẹkûnyụn̄ ẹkop ikọ mme prọfet oro ẹdọhọde mbufo ẹte, ‘Mbufo idinamke n̄kpọ inọ edidem Babylon,’+ koro nsunsu ntịn̄nnịm ikọ ke mmọ ẹtịn̄ ẹnọ mbufo.+
15 “‘Koro ami ndọn̄ke mmọ,’ uyo Jehovah edi emi, ‘edi mmọ ẹtịn̄ nsunsu ntịn̄nnịm ikọ ke enyịn̄ mi, man ami nsuan mbufo,+ ndien mbufo ẹyetak,+ mbufo ye mme prọfet oro ẹtịn̄de ntịn̄nnịm ikọ ẹnọ mbufo.’”+
16 Ndien ami ndọhọ mme oku ye kpukpru owo emi, nte: “Ntem ke Jehovah ọdọhọ ete, ‘Ẹkûkop ikọ mme prọfet mbufo oro ẹtịn̄de ntịn̄nnịm ikọ ẹnọ mbufo, ẹte: “Sese! Ke emi ẹmọn̄ ẹda mme n̄kpoduoho ufọk Jehovah ẹto Babylon ẹfiak ẹdi ke mîbịghike!”+ Koro nsunsu ntịn̄nnịm ikọ ke mmọ ẹtịn̄ ẹnọ mbufo.+
17 Ẹkûkop ikọ mmọ. Ẹnam n̄kpọ ẹnọ edidem Babylon ẹnyụn̄ ẹdu uwem.+ Ntak emi obio emi akpakabarede edi n̄wụre ebiet?+
18 Edi edieke mmọ ẹdide mme prọfet, edieke ikọ Jehovah onyụn̄ odude ye mmọ, mbọk, yak mmọ ẹkpe Jehovah mme udịm ubọk,+ man mme n̄kpoduoho oro ẹsụhọde ke ufọk Jehovah ye ke ufọk edidem Judah ye ke Jerusalem ẹkûbe ẹdụk Babylon.’
19 “Koro ntem ke Jehovah mme udịm ọdọhọ aban̄a mme adaha+ ye n̄kpọ udọn̄ mmọn̄+ ye mme ukpatn̄kpọ+ ye mme n̄kpoduoho oro ẹsụhọde ke obio emi,+
20 oro Nebuchadnezzar edidem Babylon mîkatan̄ke ke ini enye akadade Jeconiah+ eyen Jehoiakim, edidem Judah, ke Jerusalem aka ntan̄mfep ke Babylon, ọkọrọ ye kpukpru mbọn̄ Judah ye Jerusalem;+
21 koro ntem ke Jehovah mme udịm, Abasi Israel, ọdọhọ aban̄a mme n̄kpoduoho oro ẹsụhọde ke ufọk Jehovah ye ke ufọk edidem Judah ye ke Jerusalem,+ ete,
22 ‘“Ẹyetan̄+ mmọ ẹka Babylon ndien mmọ ẹyedu do tutu esịm usen oro ndiwọn̄ọrede ntịn̄enyịn mi nnọ mmọ,”+ uyo Jehovah edi emi. “Ndien ami nyada mmọ ndọk ndi nnyụn̄ mfiak nda mmọ ndinịm ke ebiet emi.”’”+
