Jeremiah 9;1-26
9 Ubaha nte ibuot mi ekpedide mmọn̄, enyịn mi okponyụn̄ edide ebiet emi mmọn̄eyet otode ọwọrọ!+ Do n̄kpatua uwemeyo ye okoneyo mban̄a nditọ eyenan̄wan ikọt mi oro ẹwotde.+
2 Ubaha nte n̄kpenyenede itienna mme akaisan̄ ke wilderness!+ Do n̄kpọkpọn̄ ikọt mi, nnyụn̄ ndaha n̄kpọn̄ mmọ, koro kpukpru mmọ ẹdi mme esịn efịbe+ ye esop mbon abian̄a;+
3 ndien mmọ ẹnụk edeme mmọ nte utịgha mmọ ke nsu;+ edi idịghe edinam akpanikọ anam mmọ ẹdi n̄kpọsọn̄ owo ke isọn̄.
“Koro mmọ ẹto ke idiọkn̄kpọ ẹsịm idiọkn̄kpọ, ẹnyụn̄ ẹfụmi mi,”+ uyo Jehovah edi emi.
4 “Yak owo mbufo kiet kiet ekpeme idem ye nsan̄a esie,+ mbufo ẹkûnyụn̄ ẹbuọt idem ye baba eyenete kiet.+ Koro eyenete iditreke ndibọ eyenete itie,+ nsan̄a oyonyụn̄ asan̄a akanade nte owo edidọk,+
5 ndien mmọ kiet kiet ẹbian̄a nsan̄a mmọ;+ mmọ inyụn̄ idehedei itịn̄ akpanikọ. Mmọ ẹkpep edeme mmọ ndisu nsu.+ Mmọ ẹnam idiọk tutu ẹkpa mba.+
6 “Afo etie ke ufọt abian̄a.+ Ke ntak abian̄a mmọ ẹsịn ndifiọk mi,”+ uyo Jehovah edi emi.
7 Mmọdo ntem ke Jehovah mme udịm ọdọhọ ete: “Sese ami mmọn̄ nnam mmọ ẹtara, ndien ami nyodụn̄ọde mmọ,+ koro didie ndien ke n̄kpanam n̄kpọ ke ntak eyenan̄wan ikọt mi?+
8 Edeme mmọ edi idan̄ eke owotde-wot.+ Enye etịn̄ se idide abian̄a. Owo ke etịn̄ ikọ emem ye nsan̄a esie ke inua; edi ke esịt esie enye edịbe ebet enye.”+
9 “Nte n̄kpokotke mmọ ẹdinam ibat ẹban̄a mme n̄kpọ emi?” uyo Jehovah edi emi. “Mîdịghe nte ukpọn̄ mi ikposioho idụt eke etiede ntem usiene?+
10 Ami nyatua nnyụn̄ nseme ke mme obot,+ nyonyụn̄ n̄kwọ ikwọ mfụhọ ke mme in̄wan̄ mbiet ufene wilderness; koro ikan̄ ayata+ mmọ tutu baba owo kiet isan̄ake ibe, mme owo idinyụn̄ ikopke uyom ufene.+ Edibotn̄kpọ emi efede ke enyọn̄ ye mme unam ikọt ẹyefen̄e; mmọ ididụhe.+
11 Ndien ami nyanam Jerusalem edi ebok itiat,+ itieidụn̄ mme jackal;+ nyonyụn̄ nnam mme obio Judah ẹdi ndon, ẹnana andidụn̄.+
12 “Anie edi ọniọn̄, man enye ọkpọfiọk emi, anie onyụn̄ edi owo emi Jehovah akadade inua esie etịn̄ ikọ ọnọ, man enye ekpetịn̄?+ Ke nso ntak ke isọn̄ akpabiara onyụn̄ ata ikan̄ nte wilderness tutu owo ndomokiet isan̄ake ibe?”+
13 Ndien Jehovah ọdọhọ ete: “Ke ntak emi mmọ ẹkpọn̄de ibet mi emi n̄kọnọde nte odu mmọ ke iso, ye ke ntak emi mmọ mîkopke uyo mi mînyụn̄ isan̄ake ke esịt,+
14 edi mmọ ẹsan̄a ke itụn esịt+ mmọ ẹnyụn̄ ẹtiene mme mbiet Baal,+ emi mme ete mmọ ẹkekpepde mmọ;+
15 mmọdo, ntem ke Jehovah mme udịm, Abasi Israel, ọdọhọ ete, ‘Sese ami mmọn̄ nnam mmọ, oro edi, mbon emi, ẹdia etidot,+ nyonyụn̄ nnam mmọ ẹn̄wọn̄ mmọn̄ emi ẹsịnde ibọkn̄kpa;+
16 ndien nyasuan mmọ ndọn̄ ke otu mme idụt oro mmọ m̀mê mme ete mmọ mîkọfiọkke,+ ndien ami nyọdọn̄ akan̄kan̄ etiene mmọ tutu nsobo mmọ mfep.’+
17 “Ntem ke Jehovah mme udịm ọdọhọ ete, ‘Mbufo ẹnam n̄kpọ ke mbufiọk, ẹnyụn̄ ẹkot iban emi ẹsikwọde ikwọ mfụhọ,+ man mmọ ẹdi; ẹnyụn̄ ẹdọn̄ ẹkekot iban emi ẹnyenede usọ, man mmọ ẹdi,+
18 man mmọ ẹkpewara ẹmenede uyo ẹseme ẹban̄a nnyịn. Mmọn̄eyet akpakam oto nnyịn ke enyịn ewet osụhọde, mmọn̄ onyụn̄ oto ke nyayama enyịn nnyịn ọtọi.+
19 Koro ẹmekop uyo eseme ke Zion nte ọdọhọde ete:+ “Se nte ẹbụmede nnyịn!+ Se adan̄a nte bụt anamde nnyịn! Koro nnyịn imọkpọn̄ isọn̄; koro mmọ ẹmetop mme ebietidụn̄ nnyịn ẹduọk.”+
20 Edi, O mbufo iban, ẹkop ikọ Jehovah, utọn̄ mbufo ẹkpekam ẹkop ikọ inua esie. Ekem ẹkpep nditọiban mbufo eseme,+ n̄wan kiet kiet onyụn̄ ekpep nsan̄a esie ikwọ mfụhọ.+
21 Koro n̄kpa omoto mme window nnyịn ọdọk odụk; enye omodụk edi mme tọwa ufọkidụn̄ nnyịn, man esịbe eyenọwọn̄ efep ke efak, onyụn̄ esịbe n̄kparawa efep ke an̄wa obio.’+
22 “Dọhọ ete, ‘Ntem ke Jehovah ọdọhọ ete: “Mme okpo owo ẹyeduọn̄ọ nte ifụm ke iso isọn̄ ye nte udịm wheat* emi andikpen̄e ekpen̄ede obufa, emi baba owo kiet eke atan̄de mîdụhe.”’”+
23 Ntem ke Jehovah ọdọhọ ete: “Yak owo ọniọn̄ okûbụre mbụre aban̄a idemesie ke ntak ọniọn̄+ esie, yak ọkpọsọn̄ owo okûbụre mbụre aban̄a idemesie ke ntak odudu+ esie. Yak owo inyene okûnyụn̄ obụre mbụre aban̄a idemesie ke ntak inyene esie.”+
24 “Edi yak owo eke obụrede mbụre aban̄a idemesie obụre ke ntak n̄kpọ emi, ke ntak ikike+ ye ifiọk emi enye enyenede aban̄a mi, nte ke ami ndi Jehovah,+ Enye emi owụtde ima-mfọnido, ye unenikpe ye edinen ido ke isọn̄;+ koro mme n̄kpọ emi ẹdatde mi esịt,”+ uyo Jehovah edi emi.
25 “Sese! Mme usen ke ẹdi,” uyo Jehovah edi emi, “ndien ami nyokot kpukpru owo oro ẹnịmde mbobi edi oro mînaha mbobi nte ẹdinam ibat,+
26 ọkọrọ ye Egypt+ ye Judah+ ye Edom+ ye nditọ Ammon+ ye nditọ Moab+ ye kpukpru mbon oro ẹfatde idet etak mban̄, emi ẹnyụn̄ ẹdụn̄de ke wilderness;+ koro kpukpru mme idụt mînaha mbobi, kpukpru ufọk Israel mînyụn̄ inaha mbobi ke esịt.”+
Mme Ikọ Idakisọn̄
^ Mîdịghe, emi ekeme ndidi “barley.”
