Wode Wo Gaxɔ Me Le Woƒe Xɔse Ta—Eritrea

ƑOE

Ƒe geɖee nye esia Eritrea dziɖuɖua léa Yehowa Ðasefowo, siwo dome nyɔnuwo kple ame tsitsiwo le dea gaxɔ me, evɔ wometsɔa nya aɖeke ɖe wo ŋu alo drɔ̃a ʋɔnu wo hafi o. Dukplɔla Afwerki de se aɖe le October 25, 1994 dzi, si xɔ dukɔmevinyenye le Ðasefoawo si. Elabe esi dukɔa da akɔ aɖe le ƒe 1993 me tsɔ xɔ ɖokuisinɔnɔ la, Ðasefoawo medae o eye wogbe hã be yewomawɔ asrafodɔ o le yewoƒe dzitsinya ta. Do ŋgɔ le Eritrea la, ɖoɖo nyuiwo nɔ anyi be ame nawɔ dukɔmevidɔ bubu ɖe asrafodɔ teƒe. Ðasefo geɖe wɔ dɔ mawo le dziɖuɖu vovovo siwo kplɔ dukɔa te. Dziɖuɖua naa “Dukɔmevidɔ Nu Wuwu Ƒe Ðaseɖigbalẽ” ame siwo wɔ dɔ mawo eye zi geɖe la, ekafua wo ɖe dɔ siwo wowɔ ta. Gake tso esime dukplɔlaa de se ma ko la, poliswo léa Yehowa Ðasefowo tuna, wowɔa fu wo eye wozia wo dzi ale be woagbe nu le woƒe xɔse gbɔ.

Fifia la, Yehowa Ðasefo 67 (ŋutsu 37 kple nyɔnu 30) ye le gaxɔ me le Eritrea. Ale si wòdzɔ be xexlẽmea dzi ɖe edzi alea ye nye be le September 2024 me la, poliswo ge ɖe aƒe aɖe si me Yehowa Ðasefowo kpe le nɔ woƒe subɔsubɔwɔnawo wɔm le ŋutifafa me. Wogblẽ kpekpea me eye wolé Ðasefo 24. Wova ɖe asi le ɖevi eve siwo nɔ wo dome la ŋu. Le ŋkeke aɖewo megbe la, poliswo gava lé Ðasefo nyɔnu si tsi xɔ ƒe 85 dzoe. Wokplɔ Ðasefo 23-awo katã yi Mai Serwa Gakpɔ me. Le December 7, 2024 dzi la, woɖe asi le wo dometɔ ɖeka si nye Saron Ghebru ŋu. Via gbãtɔ ƒe fu si xɔ dzinu asieke nɔ eƒo. Woɖe asi le Mizan Gebreyesus si xɔ ƒe 81 hã ŋu le January 15, 2025 dzi.

Le November 1, 2024 dzi la, setɔwo gatɔ ŋku Ðasefoawo ake eye wolé sukuvi ene siwo xɔ tso ƒe 16 va se ɖe 18. Wobia gbe wo eye enumake wokplɔ woawo hã yi Mai Serwa Gakpɔ me. Le November 22 dzi la, setɔawo yi Almaz Gebrehiwot vinyɔnuvi ƒe suku eye wokplɔ ɖevia yi poliswo ƒe dɔwɔƒe. Esi Almaz yi polis-awo ƒe dɔwɔƒe be yeakplɔ ye via la, wolé eya ŋutɔ eye woɖe asi le ɖevia ŋu. Va se ɖe fifia la, ekpɔtɔ le Poliswo Ƒe Dɔwɔƒe le Asmara.

Wole Nɔnɔme Sesẽwo Me Tom Le Gaxɔ Me

Ðasefoawo le fu kpem vevie le Mai Serwa gakpɔa kple gakpɔ bubuwo me. Amewo mimi ŋutɔ le gaxɔawo me, elabe gaxɔawo le sue ale gbegbe be ɖe womlɔna woƒe axawo dzi tigina ɖe wo nɔewo ŋu hafi dɔa alɔ̃. Nugododeƒe alo aɖuɖɔɖɔƒe gɔ̃ hã meli o. Woɖo ɣeyiɣi ɖi koŋ na ŋutsuwo kple nyɔnuwo siaa be woayi nugodo zi eve pɛ le ŋkekea me, eye sodzawo ƒe ŋku nɔa wo ŋu ne wole esia wɔm. Nuɖuɖu kple tsi si wonana wo la medena na wo o eye ne wodze dɔ la, womete ŋu wɔa atike na wo kpɔa wo gbɔ nyuie o.

Nɔnɔme siawo wɔe be Ðasefo ene ku le gaxɔ me le Eritrea eye Ðasefo tsitsi etɔ̃ siwo ŋu woɖe asi le le gaxɔ me la va ku le nɔnɔme sesẽ siwo me woto esime wonɔ gaxɔ me la ta.

Le ƒe 2011 kple 2012 me la, Ðasefo eve ku le esi wowɔ fu wo vevie le Meitir Gakpɔ me ta. Misghina Gebretinsae, si xɔ ƒe 62, ku le July 2011 me esi wohe to nɛ vae tui ɖe tomexɔ aɖe si me xɔ dzo gbãgbãgbã la me. Yohannes Haile, si xɔ ƒe 68 la hã ku le August 16, 2012 dzi esime wòto nɔnɔme sesẽ mawo tɔgbi me le gaxɔ me ƒe ene kloe.
Esi woɖe asi le Ðasefo tsitsi etɔ̃ bubu siwo nye Kahsai Mekonnen, Goitom Gebrekristos kple Tsehaye Tesfariam ŋu vɔ la, woku elabe woto nɔnɔme sesẽ geɖe me esime wonɔ Meitir Gakpɔa me.
Le ƒe 2018 me la, Ðasefo eve ku esi woɖe wo yi Mai Serwa Gakpɔ me vɔ megbe. Aƒetɔ Habtemichael Tesfamariam ku le January 3 dzi esi wòxɔ ƒe 76, eye Habtemichael Mekonnen ku le March 6 dzi esi wòxɔ ƒe 77. Eritrea dziɖuɖua lé wo de gaxɔ me le ƒe 2008 me evɔ metsɔ nya aɖeke ɖe wo ŋu le ʋɔnu hafi o.

Gaxɔmenɔnɔ Ðikaa

Womeka ƒe aɖeke na Ðasefo akpa gãtɔ siwo le gaxɔ me o, eya ta mɔkpɔkpɔ meli be woaɖe asi le wo ŋu o va se ɖe esime woku alo ɖo kudo nu hafi. Esi wònye be ʋɔnudrɔ̃nyawo kple senyawo mewɔa dɔ nyuie le dukɔa me o ta la, ne wolé wo de gaxɔ me la, ɖeko wòle abe wotso kufia na wo ene.

Ame Si Wolé De Gaxɔ Me Le Eƒe Dzitsinya Ta Ƒe Ŋutinya

Henok Ghebru

Wolé Ðasefo si nye Henok Ghebru, si xɔ ƒe 42 de gaxɔ me tso January 24, 2005 me elabe egbe be yemawɔ asrafodɔ o le yeƒe dzitsinya ta. Eyae nye Ðasefo si le gaxɔ me wòdidi wu le Eritrea. Dziɖuɖua lée esi wonɔ ɖekakpuiwo dim be woana hehe wo woazu asrafowo.

Wodzi Henok le August 10, 1982 dzi eye Yehowa Ðasefowo ƒe ƒome mee wòtsi le. Esrɔ̃ Biblia eye esi wòxɔ nu siwo wòsrɔ̃ dzi se ta la, eɖe adzɔgbe na eƒe Mawu Yehowa eye wòxɔ nyɔnyrɔ le February 2004 me. Le ema megbe la, mede ƒe ɖeka hafi wolée de gaxɔ me o. Wolé tɔa, Ghebru Berhane, zi ene sɔŋ de gaxɔ me le eƒe xɔse ta (wolée zi eve le ƒe 1970-awo me, wogalée le ƒe 2006-2008 me, kple le ƒe 2014-2020 me). Wolé nɔvianyɔnu Saron Ghebru hã zi gbɔ zi geɖe, eye nyitsɔ laa koe woɖe asi le eŋu le gaxɔ me.

Hafi woava lé Henok la, ekpena ɖe tɔa ŋu wonyia nyiwo. Edi be yeava nye elektrikdɔwɔla eye kamedefefewo dzɔa dzi nɛ, vevietɔ bɔlƒoƒo. Eɖoe hã be yeazã ɣeyiɣi geɖe atsɔ awɔ subɔsubɔdɔ na yeƒe Mawu Yehowa.

Dɔ sesẽ siwo wɔm Henok le le gaxɔ me la wɔe be eƒe dzime va nɔ evem. Dɔléle sesẽ aɖe hã ɖe fu nɛ vevie ƒe adre sɔŋ si na wòse veve ŋutɔ. Womeɖe mɔ nɛ be wòayi kɔdzi alo eƒe ƒometɔwo kple xɔlɔ̃wo nawɔ atike vɛ nɛ o. Wova wɔ ɖoɖo mlɔeba be woawɔ dɔ nɛ ale be eƒe vevesesea dzi naɖiɖi.

Togbɔ be Henok kpɔtɔ le gaxɔ me hã la, eƒe xɔse doa ŋusẽe. Edea ŋugble zi geɖe le eƒe mawunyakpukpui vevi si nye Psalmo 100:5 ŋu, eye esia kpe ɖe eŋu wòyi edzi le ŋu ɖom ɖe Mawu ŋu.

Woŋe Aɖaba Ƒu Amegbetɔwo Ƒe Gomenɔamesi Ƒe Habɔbɔ Xɔŋkɔwo Ƒe Nyawo Dzi

Eritrea mele bubu dem gomenɔamesi si le ame ɖe sia ɖe si le xexea me si la ŋu o. Habɔbɔ gã siwo kpɔa amegbetɔwo ƒe gomenɔamesi ƒe nyawo gbɔ la ƒo nu tsi tre ɖe nu si wɔm Eritrea dziɖuɖua le ŋu, eye woyi edzi bia tso wo si be woaɖɔ nɔnɔmea ɖo.

Le ƒe 2014 me la, Amegbetɔwo Ƒe Gomenɔamesinyawo Gbɔkpɔha kpɔ ŋudzedze ɖe nyatakaka si numekulawo na ku ɖe ale si amegbetɔwo ƒe gomenɔamesi ƒe nyawo le le Eritrea ŋu. Le nyatakaka me la, wobia tso Eritrea dziɖuɖua si be wòade bubu gome si le dukɔmeviwo si be woate ŋu agbe be yewomawɔ asrafodɔ o le woƒe dzitsinya ta ŋu. Elabe esia “wɔ ɖeka kple ɖoɖo siwo dzi dukɔwo da asi ɖo le xexea me godoo.” Wobia tso dziɖuɖua si hã be “wòakpɔ egbɔ be gamenɔlawo katã le dedie eye womeɖia gbɔ̃ wo o, wòawɔ atike na wo dometɔ siwo hiãe . . . eye wòana ale si nɔnɔmeawo le le gaxɔawo me la nanyo ɖe edzi, elabe esia hã wɔ ɖeka kple ɖoɖo siwo dzi dukɔwo da asi ɖo le xexea me godoo.” Le 2015 me la, Amegbetɔwo Ƒe Gomenɔamesinyawo Gbɔkpɔhaa tso nya me be ele be woabia tso Eritrea dziɖuɖua si be “wòaɖe mɔ na dumeviwo be woate ŋu agbe be yewomawɔ asrafodɔ o le woƒe dzitsinya ta.”
Le ƒe 2016 me la, Habɔbɔ Si Kua Nu Me Tso Amegbetɔwo Ƒe Gomenɔamesinyawo Ŋu Le Eritrea de dzesii be Eritrea dziɖuɖua “wɔ nu vlo eye eɖi fɔ” le esi wòle Yehowa Ðasefowo kple ame bubuwo “yome tim le woƒe xɔse kple to si me wotso ta.”
Le ƒe 2017 me la, Afrikatɔwo Ƒe Kɔmiti Si Kpɔa Ðeviwo Ƒe Gomenɔamesi Kple Dedienɔnɔ Ƒe Nyawo Gbɔ la gblɔ be ete ɖe yewo dzi be togbɔ be sewo li akpɔ ɖeviwo ta hã, se sia meɖea vi na “Yehowa Ðasefowo ƒe viwo o” eye wowɔa ŋlɔmi le wo ŋu. Kɔmitia bia tso Eritrea dziɖuɖua si be “wòade bubu Tamebubu, Dzitsinya Kple Mawusubɔsubɔ Ƒe Ablɔɖe si le ɖeviwo si la ŋu, eye wòaɖe mɔ na ɖevi ɖe sia ɖe be wòate ŋu awɔ ablɔɖe sia ŋu dɔ.”
Le ƒe 2018 me la, Afrikatɔwo Ƒe Habɔbɔ Si Kpɔa Amegbetɔwo Ƒe Gomenɔamesinyawo Gbɔ bia tso Eritrea dziɖuɖua si be “wòaɖe afɔ enumake atsɔ akpɔ egbɔ be woagate ame siwo katã le gaxɔ me, siwo dome . . . Yehowa Ðasefowo hã le, la ƒe gomenɔamesiwo ɖe to azɔ o.” Ebia tso esi hã be woaku nu me le Ðasefo siwo ku le gaxɔ me la ƒe nyawo ŋu. Habɔbɔ sia te gbe ɖe edzi be ehiã be Eritrea nakpɔ egbɔ be wogbugbɔ “dukɔmevinyenye ƒe gomenɔamesiwo” na Yehowa Ðasefoawo.
Le May 2019 me la, Dukɔ Ƒoƒuawo Ƒe Amegbetɔwo Ƒe Gomenɔamesiwo Ŋuti Kɔmiti bia tso Eritrea si be wòaɖe mɔ dukɔmeviwo nawɔ woƒe mawusubɔsubɔ kple dzixɔse ƒe ablɔɖe ŋu dɔ eye “wòaɖe asi le ame siwo katã wolé alo de gaxɔ me le esi wowɔ woƒe ablɔɖe mawo ŋu dɔ ta la ŋu; Yehowa Ðasefowo hã le eme.” Kɔmitia gabia tso Eritrea si be “wòaɖe mɔ na dukɔmeviwo le se nu be woate ŋu agbe asrafodɔ wɔwɔ le woƒe dzitsinya ta, eye wòawɔ ɖoɖo ɖe dɔ bubuwo ŋu na dukɔmevi siwo ƒe dzitsinya maɖe mɔ na wo be woawɔ asrafodɔ o.”
Le nyatakaka aɖe si wona le May 12, 2021 dzi me la, Dukɔ Ƒoƒuawo ƒe numekulawo bia tso Eritrea dziɖuɖua si be “wòaɖe asi le ame siwo katã wolé de gaxɔ me le woƒe dzixɔse ta evɔ womedrɔ̃ nya na wo o la ŋu enumake; Yehowa Ðasefo 20-awo hã le eme.” Ebia hã be “woagbugbɔ alé ŋku ɖe ale si wotso nya me be woaxɔ dukɔmevinyenye le Yehowa Ðasefowo si le woƒe subɔsubɔ ta la ŋu, eye woawɔ nya si Afrikatɔwo Ƒe Habɔbɔ Si Kpɔa Amegbetɔwo Ƒe Gomenɔamesinyawo Gbɔ gblɔ la dzi akpɔ egbɔ be dukɔmevinyenye ƒe gomenɔamesiwo kpɔtɔ le Yehowa Ðasefowo si, eye woaku nu me le Ðasefo siwo ku le gaxɔ me ƒe nyawo ŋu.”

Ɣeyiɣiawo

January 20, 2025

Ðasefo siwo katã le gaxɔ me ƒe xexlẽmee nye 67.
November 22, 2024

Wolé Almaz Gebrehiwot le esi wògbe be yemanɔ dukɔa ƒe dunyaheha aɖeke me o ta.
November 1, 2024

Wolé sukuvi ene siwo nye Ðasefowo eye wokplɔ wo yi Mai Serwa Gakpɔ me.
September 27, 2024

Wolé Ðasefo 23 eye wokplɔ wo yi Mai Serwa Gakpɔ me; wova ɖe asi le eve ŋu.
February 1, 2021

Woɖe asi le Ðasefo etɔ̃ ŋu le gaxɔ me.
January 29, 2021

Woɖe asi le Ðasefo ɖeka ŋu le gaxɔ me.
December 4, 2020

Woɖe asi le Ðasefo 28 ŋu le gaxɔ me.
March 6, 2018

Habtemichael Mekonnen, si xɔ ƒe 77, ku esi woɖee yi Mai Serwa Gakpɔ me vɔ megbe.
January 3, 2018

Habtemichael Tesfamariam, si xɔ ƒe 76, ku esi woɖee yi Mai Serwa Gakpɔ me vɔ megbe.
July 2017

Woɖe Ðasefo siwo katã le Meitir Gakpɔ me la yi Mai Serwa Gakpɔ me le Asmara dua godo.
July 25, 2014

Woɖe asi le Ðasefo siwo wolé le April 14 dzi la dometɔ akpa gãtɔ ŋu, gake wo dometɔ 20 siwo wolé le April 27 dzi la gakpɔtɔ le gaxɔ me.
April 27, 2014

Wolé Ðasefo 31 esi wokpe nɔ Biblia srɔ̃m.
April 14, 2014

Wolé Ðasefo 90 kple edzivɔ esi wokpe na Kristo ƒe ku ƒe Ŋkuɖodzi si wowɔna ƒe sia ƒe.
August 16, 2012

Yohannes Haile, si xɔ ƒe 68, ku le gaxɔ me le nɔnɔme sesẽ siwo me wòto le afi ma ta.
July 2011

Misghina Gebretinsae, si xɔ ƒe 62, ku le gaxɔ me le nɔnɔme sesẽ siwo me wòto le afi ma ta.
June 28, 2009

Setɔwo va ge ɖe Ðasefo aɖe ƒe aƒe me esime wonɔ Biblia srɔ̃m eye wolé ame 23 siwo katã nɔ kpekpea me; ɖevitɔ si nɔ wo dome xɔ ƒe 2 eye ame tsitsitɔ xɔ ƒe 80.
April 28, 2009

Setɔwo ɖe Yehowa Ðasefo siwo katã wotu ɖe poliswo ƒe dɔwɔƒe la yi Meitir Gakpɔ me; wo dometɔ ɖeka koe wogblẽ ɖi.
July 8, 2008

Setɔwo ge ɖe dɔwɔƒewo kple aƒewo me eye wolé Ðasefo 24, evɔ wo dometɔ akpa gãtɔe kpɔa woƒe ƒomewo dzi.
May 2002

Dziɖuɖua ɖo asi subɔsubɔha siwo katã mele subɔsubɔha 4 siwo dzi wòda asi ɖo dome o la dzi.
October 25, 1994

Dukplɔla de se woxɔ dukɔmevinyenye kple amegbetɔwo ƒe gomenɔamesiwo le Yehowa Ðasefowo si.
September 17, 1994

Wolé Paulos Eyassu, Isaac Mogos kple Negede Teklemariam de gaxɔ me, evɔ wometsɔ nya aɖeke ɖe wo ŋu alo drɔ̃ ʋɔnu wo o.
Le Ƒe 1950-awo Me

Woɖo Yehowa Ðasefowo ƒe ƒuƒoƒo gbãtɔwo le Eritrea.

Ɖewohĩ Esia Hã Adzɔ Dzi Na Wò

NYADZƆDZƆWO

https://cms-imgp.jw-cdn.org/img/p/1012732/univ/art/1012732_univ_sqr_xl.jpg

Yehowa Ɖasefowo

Wode Wo Gaxɔ Me Le Woƒe Xɔse Ta—Eritrea

Wole Nɔnɔme Sesẽwo Me Tom Le Gaxɔ Me

Gaxɔmenɔnɔ Ðikaa

Ɣeyiɣiawo

Ɖewohĩ Esia Hã Adzɔ Dzi Na Wò

Yehowa Ðasefo Siwo Wode Gaxɔ Me Le Woƒe Xɔse Ta—Le Dukɔ Vovovowo Me

Nya Siwo Asrafodɔgbegbe Le Dzitsinya Ta Ŋuti Nunyalawo Gblɔ Tso Eŋu