Johan Pakhatnak 5:1-21
5 Jesuh cu Khrih a si tiah a zummi cu Pathian fa a si. Pa Pathian a dawmi cu Pathian fale a dawmi zong a si.
2 Pathian kan dawt i a nawlbia kan zulh tikah Pathian fale kan dawt hna ti kha kan hngalh.
3 Zeicahtiah Pathian kan dawt ti cu a nawlbia zulh hi a si; a nawlbia cu thilrit a si lo.
4 Pathian fa a simi nih cun vawlei kha a tei. Vawlei a kan teitertu cu kan zumhnak hi a si.
5 Vawlei a tei khotu cu ahodah a si? Jesuh cu Pathian Fapa a si ti a zummi kha a si ko lo maw?
6 Jesuh Khrih cu ti le thi in a ra. Ti lawng si loin ti he, thi he a ra. Mah kha thiang thlarau nih tehte a khaan. Zeicahtiah thiang thlarau cu biatak a si.
7 Tehte khangtu pathum an um:
8 thiang thlarau le ti le thi an si; an pathum in a kong pakhat kha tehte an khaan.
9 Minung tehte khaannak kha kan cohlan ahcun mah nakin a ngan deuhmi Pathian tehte khaannak zong kan cohlan awk a si. Pathian nih tehte a khaanmi cu a Fapa kong kha a si.
10 Pathian Fapa a zummi cu Pathian tehte khaannak kha a lungthin in a cohlangmi a si. Pathian a zum lomi nih cun Pathian kha lihchim ah a sermi bantuk a si. Zeicahtiah Pathian nih a Fapa kong tehte a khaanmi kha a zum lo.
11 Cu tehte khaannak cu hihi a si, Pathian nih zungzal nunnak a kan pek i cu nunnak cu a Fapa thawng in kan hmuh.
12 Fapa a cohlangmi cu zungzal nunnak a hmu lai; Pathian Fapa a cohlang lomi cu zungzal nunnak a hmu lai lo.
13 Pathian Fapa min nan zumh caah zungzal nunnak kan hmu lai ti nan hngalh nakhnga hi kong hna hi ka rak ṭial.
14 A duhnak ning in kan hal ahcun kan halmi paoh Pathian nih a kan ngaihpiak lai ti kha kan zumh.
15 Kan halmi paoh a kan ngaihpiak ti kan hngalh caah kan halmi kha kan hmuh lai ti zong kan zumh.
16 Unau pakhat nih thih tlak a si lomi sualnak a tuahmi kha pakhatkhat nih a hmuh ahcun a caah thla a campiak lai i cu pa cu Pathian nih nunnak a pek lai. Mah cu thih tlak a si lomi sualnak a tuahmi caah ka chimmi a si. Asinain thih tlak a simi sualnak zong a um. Cu bantuk sualnak caah thlacampiak ding in ka chimmi a si lo.
17 Dinlonak vialte cu sualnak a si. Asinain thih tlak a si lomi sualnak zong a um.
18 Pathian fa a simi nih cun sualnak a tuah peng lo ti kha kan hngalh. Pathian Fapa nih amah cu a zohkhenh i miṭhalo pa nih a tawng kho lo.
19 Kannih cu Pathian lei ah a ṭangmi kan si, asinain vawlei pumpi cu miṭhalo pa kut tang ah a um ti kha kan hngalh.
20 Pathian Fapa cu vawlei ah a ra i a hmaanmi Pathian kong hngalhnak kan ngeih nakhnga fimnak a kan pek ti kha kan hngalh. Fapa Jesuh Khrih thawng in amah he lungthin khat tein kan um cang. Amah cu a hmaanmi Pathian, zungzal nunnak hrampi a si.
21 Ka fale hna, siasal kha hrial ko u.
