Johan Pakhatnak 1:1-10
1 Nunnak bia a phortu kong he aa tlaiin cakuat kan rak ṭial. Anih cu a hramthawk tein a rak ummi a si. A chimmi kha kan theih, kan mit in kan hmuh, ṭha tein kan rak zoh i kan kut in kan rak tawngh.
2 (Pa sinin a rami zungzal nunnak kong kha kan hun hngalh i kan hmuh. Mah kong kha tehte kan khaan i nan sinah kan phuan.)
3 Kan hmuhmi le kan theihmi kong kha nan sinah kan phuannak a ruang cu Pa le a Fapa Jesuh Khrih he hawikomhnak kan ngeih bantuk in nannih zong kanmah he hawikomhnak nan ngeih khawh nakhnga caah a si.
4 Hi kong hna ca in kan rak ṭialmi cu kan i lawmhnak a tlin khawh nakhnga caah a si.
5 Jesuh sinin kan theih i nan sinah kan phuanmi bia cu hihi a si: Pathian cu ceunak a si, amah sinah muihnak zeihmanh a um lo.
6 “Pathian he hawikomhnak kan ngei” kan ti ko nain muihnak chung ah kan tlonlen rih ko ahcun lih a chimmi le biatak a zul lomi kan si lai.
7 Pathian cu ceunak chung ah a um bantuk in kannih zong ceunak chung ah kan tlonlen ve ahcun pakhat le pakhat hawikomhnak kan ngei kho lai. A Fapa Jesuh thisen nih kan sualnak vialte in a kan thianh lai.
8 “Sualnak kan ngei lo” tiah kan ti ahcun kanmahle kanmah kan i hlen a si i kan chung ah biatak a um lo.
9 Pathian cu zumhawk a tlakmi le a dingmi a si caah kan sualnak kha kan phuan ahcun a kan ngaihthiam lai i dinlonak vialte in a kan thianter lai.
10 “Sualnak kan tuah bal lo” tiah kan ti ahcun Pathian kha lihchim ah kan sermi bantuk a si lai i a bia cu kan chung ah a um lo.
