Joele 3:1-21
3 “Talenu! Ha matangwa aze ni ha mashimbu aze,Muze mungukahilwisa funge mu Yunda ni mu Yerusaleme,
2 Mungukakunga mavungu esweNi kwapalumwisa mu mungulunga wa Yehosofate.
Mwenamo mungukaasopeselaMumu lia atu jami ni chihinga chami, Izalele,Mumu ayo kaamwangine hakachi ka akwa-mavungu,Yalitetela chifuchi chami.
3 Yatela atu jami chela;Te kakulanjisa mwana-lunga hanga afwete pwo chikoi,Kapwile nawa ni kulanjisa mwana-pwo hanga alande vinyu, anwe.
4 Yenu Teru, Sendone ni chifuchi cheswe cha Filistea,Yika nuli nayo ya kulimika ni yami?
Shina nunangufwetesa ha chimwe chuma nalinga?
Nyi nunangufwetesa,Mungukaneha kawashi fweto yenu ha mitwe yenu.
5 Amu yenu hinwanda prata ni oru yami,Ni kutwala upite wami upema mu matembele jenu;
6 Hinwalanjisa atu a mu Yunda ni a mu Yerusaleme kuli A-Ngresia,Hanga aatwale kusuku ni chifuchi cho;
7 Mungwahilwisa hanga akatuke ku chihela kuze nwaalanjishile,Mungukaneha fweto yenu ha mitwe yenu.
8 Mungukakunjika ana jenu a malunga ni a mapwo mu moko ja A-Yunda,Ayo makaalanjisa kuli malunga a ku Sabeu, limwe vungu lia kusuku;Mumu Yehova mwene hanachambe.
9 Ambujolenu chikuma chino hakachi ka mavungu:
‘Liluliekenu nwase jita! Katwisenu akwa-ndundo!
Maswalale eswe akundame hanga ase jita!
10 Matemo jenu afulenu alumuke tutana, poko jenu jifulenu jalumuke makunga.
Mutu mulelu ambe ngwenyi: “Ngukwete ndundo.”
11 Yenu mavungu eswe nwatwama hakamwihi, likungululenu, tweyenu nulikwase umwe ni mukwo!’”
Yehova, kwasa akwa-ndundo je apalumukineko.
12 “Mavungu eswe akatuke eze mu mungulunga wa Yehosofate,Mumu mwenamo mungukatwama hanga ngusopese mavungu eswe atwama hakamwihi.
13 Senu kwengo, mumu mbuto hiyahia.
Tweyenu nuyiliate, mumu ukamino wa vinyu hiwazala.
Ukamino unasopwoka, mumu upi wa mavungu hiwoka chinji.
14 Mbunga yinene, mbunga yinene yili mu mungulunga wa upatwilo,Mumu tangwa lia Yehova linakundama mu mungulunga wa upatwilo.
15 Tangwa ni kakweji muyikalaa pwi,Ni tutongonoshi kechi katemuka nawa.
16 Yehova makakulunguza mu Zaione,Makahanjika ni liji mwilu mu Yerusaleme.
Malilu ni hashi muyikanyika;Alioze, Yehova makapwa uchinyino kuli atu jenyi,Kaposhi kuli A-Izalele.
17 Yenu munukanyingika ngwenu, yami nguli Yehova, Zambi yenu yoze watwama mu Zaione, mulundu wami usandu.
Yerusaleme muyikapwa chihela chisandu,Yilambala kechi kapalikamo nawa.
18 Ha tangwa lize, ku milundu mukukasotoka vinyu yaha,Ku mindundena mukukapukumuka yamwa,Yitwetwe ya mu Yunda muyikazala too ni meya.
Mu zuwo lia Yehova mumukakatuka fuji lia meya,Waze makaulisa Chana cha Mitondo ya Mikesha.
19 Alioze, Engitu muyikapwa ya hululu,Endome muyikapwa puya ya hululu,Mumu lia upupilo uze ayo alingile kuli A-Yunda,Mu chifuchi chize amwangine manyinga chakuhona chitela.
20 Alioze, atu makanunga ni kutwama mu Yunda,Mu Yerusaleme mumukatwama atu chize ku yisemuko ndo ku yisemuko.
21 Mungukasambisa manyinga jo waze chakasambishile;Yehova makatwama mu Zaione.”
