Joele 2:1-32
2 “Imbenu chitavwi mu Zaione!
Twenu mutambi wa jita ku mulundu wami usandu.
Atu eswe atwama mu chifuchi chino achikime,Mumu tangwa lia Yehova linakundama! Hiliapwa hakamwihi!
2 Lili tangwa lia milima, milima yinji,Lili tangwa lia malelwa ni milima pwi.Ngwe chize tangwa liakupanguka chimene ku milundu.
Kuli limwe vungu linene, lia ndundo,Kanda kupwa kama vungu likwo ngwe vungu liacho,Kukuchi keza kapwa nawa vungu likwo,Chipwe mukupalika miaka yinji.
3 Kulutwe lia vungu liacho, kahia kanocho,Kunyima lio, milengi ya kahia kuyinanongesa.
Chifuchi chize chili kulutwe lio, chapwa ngwe munda wa Endene,Alioze kunyima lio kuli puya ya hululu,Nichimwe chuma muchihasa kuchina chakuhi.
4 Chifwa cho, chapwa ngwe chifwa cha tuvwalu,Ayo kakuzomboka ngwe tuvwalu a jita.
5 Zungo lio, liapwa ngwe zungo lia matemba a jita muze anatumbwoka helu lia milundu,Ngwe kutotoka cha kahia kanji kaze kanocho yambu.
Lili ngwe atu a ndundo waze aalulieka hanga ase jita.
6 Atu makamona lamba mumu lia ayo.
Kumeso ja atu eswe mukukachila ni woma.
7 Ayo kakulukuka ngwe tujita,Kakunyina yipanga ngwe maswalale,Mutu ni mutu kakwendela mu jila yenyi,Ayo keshi kupianguka mu jila yo.
8 Keshi kulishinjeka umwe ni mukwo,Mutu ni mutu kakuya mu jila yenyi.
Nyi yitwa ya jita muyilimbula amwe,Akwo keshi kuhiluka kunyima.
9 Kakunjila mu mbonge ni fuji, kakuzomboka ha yipanga.
Kakunyina ha mazuwo, kakunjila ha tupenda ngwe eji.
10 Mavu kakuchikima kulutwe lio, lilu liakunyika.
Tangwa ni kakweji hiyalaa pwi,Tutongonoshi keshi kutemuka nawa.
11 Yehova makahanjika ni liji likolo kuli tujita twenyi, mumu chilombo chenyi chinene chinji.
Mumu yoze wakumanununa Liji lienyi tachi akwete,Mumu tangwa lia Yehova lili linene, liakola woma unji.
Iya makahasa kumana ha tangwa liacho?”
12 Kashika, Yehova kanambe ngwenyi: “Muze kuchili mashimbu, hilukenu kuli yami ni mbunge yeswe,Ni kulitwamina kulia ni kulila ni kulinyenga.
13 Suwenu mbunge jenu, kanda nusuwa mazalo jenu,Hilukenu kuli Yehova Zambi yenu,Mumu iye kakulisa mu chihela cha akwo, mukwa-keke, keshi kutenuka ni kawashi, kazala too ni zango lize kulishi kuhwa.Hanji iye malumuna manyonga hakutwala ku lamba lize anambe kuneha.
14 Iya unanyingika, hanji iye mahiluka kunyima ni kwalumuna manyonga jenyi,Manuhichikila chimwe chiwape,Mulambu wa mbuto ni mulambu wa walwa wa Yehova Zambi yenu.
15 Imbenu chitavwi mu Zaione!
Ambujolenu tangwa lia kulitwamina kulia, lingenu kukunguluka chilemu.
16 Kungululenu atu, selenu chikungulwila ku usandu.
Kungululenu malunga eswe tushinakaji, kungululenu nawa twanuke ni ana kemba.
Sandungi atuhuke mu chipatulo chenyi cha muchima, nandungi atuhuke mu zuwo lienyi.
17 Asasendote, tuvumbi twa Yehova,Alilile hakachi ka mbalanda ni chilumbilo, ni kwamba ngwo:
‘Yehova, evila kama atu je keke,Kanda wecha hanga chihinga che achisaule,Ha kwecha hanga akwa-mavungu aayule.
Mumu nyi ka, atu mamba ngwo: “Zambi yo kulihi ali?”’
18 Chocho, Yehova makakwasa chifuchi chenyi,Makevila atu jenyi keke.
19 Yehova makakumbulula atu jenyi ngwenyi:
‘Ngunanutumina mbuto, vinyu yaha ni maji,Hanga nukakute nayo.Chichi kecha nawa hanga akwa-mavungu anusaule.
20 Mungukatwala kusuku ni yena yoze unakatuka ku sango,Mungukamuhangila mu puya ya hululu muze kumushi meya,Chizavu chenyi cha maswalale cha kulutwe, muchikatalikisa ku kalunga-lwiji ku chivumbukoChizavu chenyi cha kunyima, muchikatalikisa ku kalunga-lwiji ku chitokelo.
Vumba lienyi lipi mulikakanduka,Vumba lienyi lipi mulikanunga ni kukanduka,Mumu Iye makalinga yuma yinene-yinene.’
21 Yena chifuchi, kanda wiva woma.
Wahilila ni chiseke mumu Yehova makalinga yuma yinene-yinene.
22 Yenu tushitu a mu yambu, kanda nwiva woma,Mumu ulilo wa mu puya muukapwa ni kelo,Mitondo muyikema mihuko,Mukuyu ni mutondo wa uva muyikema mihuko yinji.
23 Yenu ana ja mu Zaione, wahililenu ni chiseke muli Yehova Zambi yenu,Mumu iye makanwaha vula musazu ni kulitaMakanokesa vula musazu munji ni vula wa chihungula soke,*Ngwe chize apwile ni kulinga kunyima.
24 Mazuwo akutulikila mbuto, makazala too ni mbuto yipema,Ukamino wa vinyu yaha ni maji muukasupwoka.
25 Mungukanuhilwishila mbuto yenu yeswe yize alile kuli chizavu chami chize natumine,Chizavu chinene cha mapasu, mapasu waze keshi ngona, mapasu waze akulia yeswe ni mapasu waze akuumbula,Kulita ni miaka yize alile mbuto yenu.
26 Pundu lume, yenu munukalia ndo muze munukuta,Munukahalisa jina lia Yehova Zambi yenu,Yoze wanulingila yuma yakukomwesa.Atu jami kechi keza kaakolesa nawa sonyi.
27 Yenu munukanyingika ngwenu, nguli hakachi ka IzaleleYami nguli Yehova Zambi yenu, kukushi mukwo!
Atu jami kechi keza kaakolesa nawa sonyi.
28 Kulutwe lia yino yeswe, mungukazukwila spiritu yami hali atu eswe,Mba ana jenu a malunga ni ana jenu a mapwo kumakaprofeteza,Ni tushinakaji jenu kumakalota yilota,Ni akweze jenu kumakamona usolwelo.
29 Chipwe hali ndungo jami a malunga ni hali ndungo jami a mapwoNo kumungukaazukwila spiritu yami ha matangwa aze.
30 Mungukalinga yikomokeso mwilu ni hashi:Manyinga, kahia ni manguji a mwishi.
31 Tangwa mulikalumuka milima ni kakweji kumakalumuka manyinga,Shimbu tangwa linene lia Yehova liakola woma, kanda liza.
32 Mweswawo matambika ha jina lia Yehova, kumakamulamwina,Mumu ku Mulundu wa Zaione ni mu Yerusaleme mukukapwa waze alilamwinyine ngwe chize Yehova ambile ngwenyi:Masalila waze Yehova anasanyika.”
Footnotes
^ Hanji “samakwasa.”
