Eáni Kinamwe Inaamwo iká A Fis Maun me Osukosuk
Iei met Gary, emén mi piin fiti soufiu a apasa, “Me mwen ái káé Paipel, úse silei pwata a watte féfféringaw, pwúngúngaw, me osukosuk wóón fénúfan. Nge iei a kinamwe lón ekieki. Úa silei pwe Jiowa Kot epwe ewilaaló ei fénúfan ngeni eú leeni mi núkúnúkéch.”
Esap chék Gary a meefi ena. Sipwe ppii ifa ussun ewe Paipel a álisi ekkewe ekkóch.
EWE PAIPEL A APASA: “En, ai Samol, ka kirikiröch o amusala tipis.”—Kölfel 86:5.
IFA USSUN A ÁLISI EKKÓCH: “Ei wokisin a alúkúlúkú ngeniei pwe Jiowa a úméúméch. Úa silei pwe a tipemecheres le omusaaló tipisi ren meinisin ekkewe mettóch úa féri me lóóm atun úa fiti maun.”—Wilmar, Colombia.
EWE PAIPEL A APASA: “Üpwe föri eu läng mi fö me eu fanüfan mi fö. Iwe, esap chüen wor eman epwe chechemeni ekewe mettochun lom o ekieki usun.”—Aisea 65:17.
IFA USSUN A ÁLISI EKKÓCH: “Úa weires ren ái meefi watteen letipechou me semwenin ekiek pokiten ekkewe mettóch úa kúna atun úa fiti soufiu. Nge ei wokisin a áchchema ngeniei pwe ekiseló, Jiowa epwe álisiei ái úsapw chúen chemeni ekkewe mettóch mi ngaw úa kúna. Epwele unusen móróló me lón ekieki me letipei tori feilfeiló. A ifa me amwararen ena feiéch!”—Zafirah, Merika.
EWE PAIPEL A APASA: “Amwo pwüng epwe fefeitä lon ränin manauan, nge feiöch me kinamwe epwe lapala, tori ewe maram esap chüen nom.”—Kölfel 72:7.
IFA USSUN A ÁLISI EKKÓCH: “Úa kan soun ekieki ena wokisin. Ekiseló chék, esap chúen wor maun me ekkewe mettóch meinisin mi ngaw maun a efisi, me sisap chúen lólilen iká chókkewe sia tongeer repwe feiengaw.”—Oleksandra, Ukraine.
EWE PAIPEL A APASA: “Ir mi mäla senikem repwe manau, . . . Ämi sotup mi möür fän pwül, oupwe nela, oupwe köl fän pwapwa.”—Aisea 26:19.
IFA USSUN A ÁLISI EKKÓCH: “Lap ngeni unusen ái famili ra ninniiló atun eú einang a sótun nieló meinisin ekkewe iir seni ewe einangen Tutsi. Nge ei wokisin a alúkúlúkú ngeniei pwe úpwe kúnasefáliir. Úa mwétéresiiti ái úpwe rong léúwer atun repwe manawsefál!”—Marie, Rwanda.
EWE PAIPEL A APASA: “Lon fansoun mochomoch echök ekewe aramasangau resap chüen nom . . . Nge ekewe chon tipetekison repwe fanüeni ewe fanü o pwapwaäsini ar feiöch me kinamwe mi somwola.”—Kölfel 37:10, 11.
IFA USSUN A ÁLISI EKKÓCH: “Inaamwo iká a wes ewe maun, nge a chúen wor pwúngúngaw me aramas mi ngaw. Ekkeei wokisin ra fókkun apéchékkúlaei. Jiowa a kúna mettóch meinisin me a weweiti ái osukosuk. A pwonei pwe ekiseló, meinisin riáfféú epwele móróló me sisap chúen chechchemeniir.”—Daler, Tajikistan.
Ekkewe aramas sia fósun lón ei puk, ra kapachelong lein ekkewe fite million Chón Pwáraatá Jiowa mi kúna álillis seni ewe Paipel le kúna kinamwe. Ra káé ifa ussun repwe okkufu tipefesen lefilen ekkóch fénú, lewo, einang, are ar oputa ekkewe ekkóch. (Efisus 4:31, 32) Chón Pwáraatá Jiowa rese angolong lón mwékútúkútún politics me rese fókkun mochen fiti angangen akkachofesá.—Jon 18:36.
Chón Pwáraatá Jiowa ra pwal álillisfengen ussun chék eú famili mi tong. (Jon 13:35) Áwewe chék, a lamot án Oleksandra, ewe sia fósun me akkomw, me pwiin we repwe sú ngeni eú leeni pokiten a fis maun. Neminna a apasa: “Atun áúa pwerelong lón kiánin eú leeni, áúa mwittir kúna ekkewe Chón Pwáraatá seni ena leeni, ra etto etiwakem. Ar álisikem a ámecheresi ám choisá lón ena leeni.”
Áúa pwapwa le etiwok le fitikem lón ám kewe mwiich ikewe áúa kan kákkáé ekkewe pwóróus mi ekinamwe seni Paipel me ifa ussun áúpwe apwénúetá. Ka tongeni tétá wóón jw.org/chk ren óm kopwe kúna eú leeni mi kkan ngonuk are tingor eú káéén Paipel ese kamé seni emén Chón Pwáraatá Jiowa ren óm néúnéú ewe puk itelapan, Eáni Manaw mi Pwapwa Tori Feilfeiló!
