FURUƝƆGƆNMAW
2: A’ ye kow bɛɛ kɛ ɲɔgɔn fɛ
O KƆRƆ YE MUN YE?
Furuɲɔgɔnma minnu bɛɛ kow bɛɛ kɛ ɲɔgɔn fɛ, olu bɛ iko awiyɔn bolila dɔ ni a dɛmɛbaga kuntilenna kelen bɛ minnu na. Hali ni gɛlɛyaw nana, furuɲɔgɔnma fila bɛɛ bɛ miiri cogo la min b’a jira ko u ye “kelen” de ye, u fila si tɛ miiri “u yɛrɛ dɔrɔn” na.
BIBULU SARIYAKOLO: “O cogo la u tɛ fila ye tun, fɔ kelen.”—Matiyu 19:6.
“Ni mɔgɔ furula, i tɛ se ka kow kɛ i kelenna bilen. Furukɛ ni furumuso ka kan ka baara kɛ ɲɔgɔn fɛ walasa hɛrɛ ka kɛ u ka furu kɔnɔ.”—Christopher.
MUN NA O NAFA KA BON?
Ni bɛnbaliya dɔ nana, furuɲɔgɔnma minnu tɛ kow bɛɛ kɛ ɲɔgɔn fɛ, olu ka telin ka ɲɔgɔn jalaki de sani u ka u ɲɛsin u ka bɛnbaliya ma ka a kɛlɛ. Ko fitiniw laban bɛ yɛlɛma ka kɛ gɛlɛyabaw ye.
“Ka to ka kow bɛɛ kɛ ɲɔgɔn fɛ, o de nafa ka bon furu kɔnɔ kosɛbɛ. Ni ne ni n’cɛ tun tɛ o kɛ, an tun tɛ kɛ i n’a fɔ furuɲɔgɔnmaw nka iko mɔgɔ fila minnu bɛ so kelen kɔnɔ k’a sɔrɔ u tɛ bɛn ni u ka kan ka kuma ani ka latigɛli kɛ ko nafamaba dɔw kan.”—Alexandra.
I BƐ SE KA MIN KƐ
I YƐRƐ SƐGƐSƐGƐ
-
Ne bɛ wari min sɔrɔ, yala ne fɛ ko o “bɛɛ ye ne kelen” dɔrɔn de ta ye wa?
-
Walasa ka lafiya sɔrɔ ka ɲɛ, yala ne b’a ɲini ka n’cɛjanya n’furuɲɔgɔn na wa?
-
Yala ne b’a ɲini ka n’mabɔ n’furuɲɔgɔn somɔgɔw la hali ni n’furuɲɔgɔn ni u ka di wa?
KUMA NI I FURUƝƆGƆN YE
-
An bɛ ko jumɛnw kɛ ɲɔgɔn fɛ ka ɲɛ kosɛbɛ?
-
Ko jumɛnw na an bɛ se ka yɛlɛmaw kɛ walasa ka o kow kɛ ɲɔgɔn fɛ?
-
Ka to ka kow bɛɛ kɛ ɲɔgɔn fɛ, an bɛ se ka fɛɛrɛ jumɛnw tigɛ walasa ka o ko kɛcogo sinsin an hakili la?
LAADILIKANW
-
E ka miiri ko i n’i furuɲɔgɔn bɛ ka tenisi kɛ ɲɔgɔn fɛ nka ko aw tɛ ekipu kelen na. O la, i bɛ se ka fɛɛrɛ jumɛnw tigɛ walasa i n’i furuɲɔgɔn fila bɛɛ ka kɛ fan kelen fɛ, ka kɛ ɲɔgɔn fɛ ekipu kelen kɔnɔ?
-
Sani i k’a ɲini i kelen bɛ se ka gaɲe cogo min na, a ɲini cogo min na aw fila bɛɛ bɛ se ka gaɲe.
“Aw kana jotigi walima jalatigi ɲini, nafa tɛ o la. Nafa bɛ min na, o ye bɛn ni kelenya toli ye aw ka furu kɔnɔ.”—Ethan.
BIBULU SARIYAKOLO: “Aw si kana miiri aw yɛrɛw ka kow la dɔrɔn, nka aw bɛɛ kelen-kelen ka miiri aw mɔgɔɲɔgɔnw ko fana la.”—Filipekaw 2:3, 4.