VBE ẹghẹ nẹdẹ, ẹgbẹe ọghe okhuo ne a khian rhie kevbe ẹgbẹe ọghe okpia ne ọ khian rhie okhuo, gha ghi kue yọ ne okpia vbe okhuo nii rọnmwẹ egbe, a ghi ya mu igho ye okhuo nii uhunmwu. Usun emwi ne a ya mu igho ye okhuo uhunmwu vbe ẹghẹ nii, sẹtin gha re aranmwẹ, emwi ighobioye, ra igho. Ugbẹnso, okpia nọ khian rhie okhuo ghi do ga yọ. Erriọ ẹre Jekọb ya ye ukpo ihinrọn ga ye Rekiẹl. (Gẹn 29:​17, 18, 20) Vbọ mobọ zẹe ne Ivbi Izrẹl na gha mu igho ye okhuo uhunmwu?

Okhuo ọkpa na tie ẹre Carol Meyer, nọ rri egie ebe vbe iruẹmwi e Baibol khare wẹẹ: “A keghi mu igho ye okhuo uhunmwu, ne a ya gi ẹgbẹe ọre rẹn wẹẹ, a gbọyẹmwẹ ye iyobọ nọkhua ne ọmọ okhuo nii ye vbe ẹgbẹe nii, katekate deghẹ ugbo ẹre iran mu vbe ẹgbẹe nii.” Igho na mu ye okhuo uhunmwu, sẹtin vbe ya ẹgbẹe ọghe nokpia kevbe ọghe nokhuo sikẹ egbe sayọ. Iran gha ghi sikẹ egbe vbenian, iran ghi do gha ru iyobọ ne egbe vbe ẹghẹ ibavbaro. Yevbesọni, igho na mu ye okhuo uhunmwu, vbe rhie ma wẹẹ, a ya ẹre ne ọdọ nẹ, kevbe wẹẹ, ẹi khian ghi gha rre ototọ erhae, ototọ arowa re ẹre ọ khian ghi gha ye, arowa re ẹre ọ khian ghi vbe gha gbaroghe ẹre.

A gha mu igho ye okhuo uhunmwu, ọ ma rhie ma wẹẹ, te a dọe ra te a khiẹn ọnrẹn. Ebe na tie ẹre Ancient Israel​—Its Life and Institutions khare wẹẹ: “Vbe otọ Izrẹl vbe ẹghẹ nẹdẹ, a gha mu igho ye okhuo uhunmwu, ọ ghi yevbe na miẹn wẹẹ, te a ye igho nii dẹ okhuo nii. Ọghe ne ẹmwata, ẹi re te a dẹ okhuo nii, te a mu igho nii ye ọre uhunmwu na ya rhie ẹre ma wẹẹ, a gbọyẹmwẹ ye iyobọ ne ọmọ okhuo nii ye vbe ẹgbẹe ọre.”

Vbe ẹdẹnẹrẹ, te emwa wa ye mu igho ye okhuo uhunmwu vbe otọ ẹvbo eso. Ivbiotu e Kristi gha khian ya ovbi iran ne ọdọ, ọ khẹke ne iran rhie ẹre ma wẹẹ, iran mwẹ amuroro daa emwa ọvbehe. Ọni nọ wẹẹ, iran i khian fian igho nọ kpọlọ gbe ra ne iran gha nọ emwi nọ bun gbe. (Fil 4:5; 1 Kọr 10:​32, 33) Odẹ vbenian, te iran rhie ẹre ma wẹẹ, iran ma hoẹmwẹ igho, kevbe wẹẹ, iran i re emwa arovbẹmwẹ. (2 Tim 3:2) Yevbesọni, deghẹ iran ma fian igho nọkhua ne ọtẹn nọ khian do rhie ovbi iran, ọ ghi ru iyobọ nẹẹn ya do ru orọnmwẹ nii, vbe ẹghẹ ne a wa bu yọ. Esa i rrọọ ne ọ khian ya si orọnmwẹ nii ghee odaro, rhunmwuda wẹẹ, ọ ma he miẹn igho ne ọ khian mu ye okhuo nii uhunmwu. Levbasevba, deghẹ arọndẹ ẹre ọtẹn nokpia nii khin, ẹi khian rhie obọ hin iwinna arọndẹ rre, ne ọ rhie ẹghẹ ba ẹghẹ ya gha winna, ne ọ mieke na sẹtin koko igho nọkhua na wẹẹ ne ọ do mu ye ọre uhunmwu.

Vbe ihe eso vbe otagbọn na, arriọba ẹre ọ ta inu igho ne a mu ye okhuo uhunmwu. Ọ khẹke ne Ivbiotu e Kristi ni rre otọ ẹvbo vbenian lele uhi arriọba. Vbọzẹ? Rhunmwuda e Baibol wẹẹ, ne Ivbiotu e Kristi gha “họn ẹmwẹ” ne arriọba ọghe ẹvbo, ne iran vbe gha lele uhi ọghe iran, katekate deghẹ ọ ma gbodan ghee uhi Osanobua.​—Rom 13:1; Iwinna 5:29.