1, 2. Aha do panggora ni roha, jala ise do na mangalehon i tu hita?

TINGKI Debata Jahowa manompa jolma, dipaloas do nasida mamillit aha na laho ulahononna. Asa boi tapillit na denggan, dilehon Jahowa tu hita tudutudu, i ma panggora ni roha. On mangurupi hita mamboto na sintong dohot na sala. Molo tarlatik panggora ni rohanta, taulahon ma na denggan jala tapasiding ma na roa. Panggora ni roha patuduhon na dihaholongi Jahowa do hita jala lomo rohaNa asa denggan ngolunta.

² Godang do saonari na mangulahon na denggan jala mangkasogohon na roa, nang pe ndang diboto nasida aturan ni Bibel. (Jaha Rom 2:14, 15.) Boasa? Ala adong panggora ni rohana. Panggora ni roha mangurupi halak pasidingkon na jahat. Aut sugari ma ndang adong panggora ni roha ni jolma, holan hajahaton ma na masa di portibi on! Jala ndang tahasogohon be hajahaton. Alani i, mandok mauliate ma hita tu Jahowa ala dilehon panggora ni roha tu hita!

3. Songon dia do panggora ni roha mangurupi hita di huria?

 ³ Godang halak ndang mangalatik panggora ni rohana. Sahalak naposo ni Jahowa ingkon denggan do panggora ni rohana. On mangurupi huria marsada. Panggora ni roha paingothon hita tu aturan ni Bibel taringot na sintong dohot na sala, na denggan dohot na roa. Ndang sae holan mamboto isi ni Bibel laho mangalatik panggora ni rohanta. Ingkon tahaholongi do aturan ni Debata jala pos rohanta na denggan do on tu ngolunta. Si Paulus manurat, ”Alai na tinembak ni patik i do haholongon sian roha na ias, sian panolopi ni panggora ni roha, nang sian haporseaon na so marlaok.” (1 Timoteus 1:5) Molo talatik panggora ni rohanta jala taihuthon, lam togu ma haporseaon dohot holong tu Jahowa. Sian haputusan na tabahen marhite panggora ni roha, tarida ma sadia solhot paralealeonta tu Jahowa, jala sadia ringkot di hita pasonangkon Ibana.

4. Songon dia do bahenonta mangalatik panggora ni roha?

⁴ Songon dia do bahenonta mangalatik panggora ni roha? Taparsiajari ma Bibel, tarimangi, jala tapangido tu Jahowa asa diurupi mangulahon i. Alani i, tingki marsiajar hita, unang ma holan mamboto uhum dohot prinsip ni Bibel. Alai, ingkon tangkas do tatanda Jahowa, aha na dihalomohon dohot na dihasogohon Ibana. Lam godang taparsiajari taringot Jahowa lam denggan ma panggora ni rohanta. Molo sai talatik panggora ni rohanta, lam hombar ma pingkiranta tu pingkiran ni Jahowa.

5. Aha do na taulas di artikel on?

⁵ Alai, sungkunsungkun do rohanta, ”Songon dia do panggora ni roha na denggan mangurupi hita mambahen haputusan? Songon dia do mangargai panggora ni roha ni dongan sahuria? Jala songon dia do panggora ni roha mangurupi hita mangulahon na sintong?” Taulas ma tolu na mangkaporluhon panggora ni roha, (1) kesehatan, (2) rekreasi, dohot (3) marbarita na uli.

6. Aha do haputusan na ringkot tabahen taringot kesehatan?

⁶ Didok Bibel do asa tapasiding angka sipanganon dohot siinumon na mambahen hita marsahit. (Poda 23:20; 2 Korint 7:1) Molo taoloi poda ni Bibel, lam sehat ma pamatangta. Alai, saonari marsahit jala matua dope hita. Aha do haputusan na ringkot tabahen taringot kesehatan? Ringkot do tabahen haputusan taringot isara parubatan sisongon dia na laho taulahon. Di pigapiga negara, gok do rumah sakit na paradehon marragam isara mangubati. Jotjot do ditongos angka donganta surat tu kantor cabang na manungkun haputusan ni nasida taringot isara parubatan sipillitonna. Godang na manungkun, ”Boi do Sitindangi Ni Jahowa mamangke isara parubatan sisongon on?”

7. Songon dia do hita mambahen haputusan taringot mudar?

⁷ Ndang boi sintua manang kantor cabang mambahen haputusan taringot aha na ingkon taulahon, nang pe tasungkun. (Galatia 6:5) Alai boi do sintua patuduhon prinsip ni Bibel taringot i. Umpamana, didok Bibel do asa marsubang hita tu mudar. (Ul. 15:29) Parenta on mangurupi  halak Kristen asa pasidingkon parubatan na ingkon mamangke mudar dohot opat komponen utama darah. Hatorangan on mangurupi halak Kristen tingki mambahen haputusan taringot fraksi kecil darah, i ma bagian na gumelleng sian opat komponen utama darah. * Aha do sipaingot sian Bibel na mangurupi hita mambahen haputusan taringot parubatan?

8. Songon dia do Pilippi 4:5 mangurupi hita mambahen haputusan na denggan taringot kesehatan?

⁸ Poda 14:15 mandok, ”Halak na oto marhatutuhon luhut hatahata, alai anggo halak na bisuk i, ditimbang do langkalangkana.” Ala ndang adong dope ubat ni sude sahit, manat ma hita mamillit parubatan. Si Paulus manurat, ”Pabotohon hamu ma habasaronmuna [masuk akal] tu saluhut halak!” (Pilippi 4:5) Molo manat hita mamillit parubatan, on patuduhon na rumingkot di ngolunta, ndang holan mamingkiri kesehatan ni pamatangta, alai manomba Jahowa. Molo holan kesehatan na ringkot di hita, on patuduhon holan dirinta do na tahaholongi. (Pilippi 2:4) Taboto do, ndang boi dope tapadao sahit saonari on. Alani i, manomba Jahowa ma na rumingkot di ngolunta.—Jaha Pilippi 1:10.

9. Songon dia do Rom 14:13, 19 mangkorhon tu haputusanta taringot kesehatan dohot paralealeon di huria?

⁹ Halak Kristen ndang boi mambahen haputusan tu na asing, nang pe dihilala ibana i na dumenggan. Di sada negara, sahalak tunggani doli dohot ripena manjujui halak mangallang ubat asa tongtong uli. Nasida manjujui donganta asa mangulahon i, alai ndang sude na olo. Godang donganta jut rohana ala diida ndang marlaba ubat i. Toho do, manang ise pe boi do mamillit laho mangallang ubat i manang ndang. Alai ingkon pingkirhonon ni nasida do, molo sai dijugulhon manjujui na asing, boi do on manegai paralealeon di huria? Songon na masa tu halak Kristen di Rom, marimbar do pandapotna taringot mudar dohot ari raya. Aha do sipasingot na dilehon si Paulus tu nasida? Ibana mandok, ”Ia di roha ni na deba, marhasurungan do ari on sian ari an; ia di roha ni na asing, dos be do angka ari i. Asal ma gomos pingkiranna be!” Alani i, manat ma hita asa unang tartuktuk dongan na asing.—Jaha Rom 14:5, 13, 15, 19, 20.

10. Boasa porlu taargai haputusan ni na asing? (Ida gombar di mula ni parsiajaran.)

¹⁰ Ndang sai taantusi aha na mambahen  donganta di huria mangulahon sada haputusan. Molo songon i, aha do na taulahon? Unang ma tauhumi manang tajugulhon asa muba haputusanna i. Taboto do, ibana porlu mangalatik panggora ni rohana. Ra, nunga bagas dipingkiri haputusan on. (1 Korint 8:11, 12) Manang panggora ni rohanta do na porlu dilatik. Taingot ma, ingkon hita do mambahen haputusan tu dirinta, jala martanggung jawab ma hita tu haputusan i.

11, 12. Songon dia do Bibel mangurupi hita mamillit rekreasi?

¹¹ Lomo roha ni Jahowa marlas ni roha hita alani rekreasi. Si Salomo manurat, adong do tingkina ”mengkel” dohot ”na manontor.” (Parjamita 3:4) Alai, ndang sude rekreasi denggan tu pamatang dohot tu partondionta. Manat ma hita mamillit asa unang habis tingkinta alani rekreasi. Songon dia do panggora ni roha mangurupi hita mandapot laba sian rekreasi?

¹² Bibel paingothon hita asa mangalo ”parulaon ni daging.” Parulaon ni daging, i ma, ”parmainanon, hahodaron, pargadombuson, hasipelebeguon, hadatuon, parmusumusuon, parbadabadaon, pangiburuon, rimasrimas, pargutugutuon, parsalisian, partahitahion, bunubunu, parmabuhon, haormuson jala angka na suman tusi.” Si Paulus manurat ”ndang teanon ni angka na mangulahon sisongon i harajaon ni Debata.” (Galatia 5:19-21) Tasungkun ma dirinta, ”Diurupi panggora ni rohangku do ahu pasidingkon olahraga na mambahen mura tarrimas, sai naeng monang, jala marhasurungan tu sada negara? Mangkuling do panggora ni rohangku tingki tarelaela manonton film pornografi, hamabukon, dohot hadatuon?”

13. Songon dia do 1 Timoteus 4:8 dohot Poda 13:20 mangurupi hita mamillit rekreasi na denggan?

¹³ Prinsip ni Bibel mangurupi asa tarlatik panggora ni rohanta. Umpamana, disurat do di Bibel, ”Ai otik do guna ni na pabosihon [pelatihan] daging.” (1 Timoteus 4:8) Godang do halak mandok lam sehat do nasida dung marolahraga. Alai, songon dia do molo parsidohot di sada klub olahraga? Marpangkorhon do i tu hita? Poda 13:20 paboahon, ”Manang ise na mangkombar halak na bisuk, gabe marbisuk do, alai manang ise na sauduran dohot halak na oto, manjadi jahat do.” Alani i, porlu ma panggora ni roha na tarlatik laho mamillit rekreasi.

14. Songon dia do donganta na poso mangulahon Rom 14:2-4?

¹⁴ Adong dua boru ni si Christian dohot si Daniela. Si Christian mandok, ”Saleleng panombaon na sasaripe hami mangulas rekreasi. Satolop do hami ndang sude rekreasi denggan. Tingki husungkun, ise do na boi parsidohot di rekreasi i? Borungku mandok, tingki reses nasida di singkola pigapiga dongan sahaporseaon, mangulahon na so denggan. On mambahen ibana maol mangulahon na denggan. Didok hami ma tu nasida sude jolma adong do panggora ni rohana, on mambahen nasida boi mamillit aha na laho diulahon jala dohot ise nasida mangulahon i.”—Jaha Rom 14:2-4.

15. Songon dia do Mateus 6:33 mangurupi hita mambahen haputusan taringot rekreasi?

¹⁵ Sadia godang do tingki na talehon  tu rekreasi? Dipatujolo hamu do parpunguan, ulaon marbarita dohot parsiajaran Bibel? Manang dipatujolo hamu do rekreasi? Dia do na rumingkot di hamu? Jesus mandok, ”Sai jumolo ma lului hamu harajaon ni Debata dohot hatigoranna, dung i tambahononna do sude angka ondeng tu hamuna!” (Mateus 6:33) Tingki tabahen haputusan taringot godang ni tingki na talehon tu rekreasi, diingot hamu do hata ni Jesus on?

16. Songon dia do panggora ni roha manjujui hita laho marbarita?

¹⁶ Panggora ni roha na tarlatik ndang holan mangurupi hita pasidingkon na sala, alai manjujui hita mangulahon na sintong. Songon na diulahon ni si Paulus. Dijujui do hita marbarita na uli sian jabu tu jabu manang di inganan na ribur. Didok si Paulus do, ”Ai molo huhatahon barita na uli i, ndang hasurunganku i; utangku hian do i. Marjea do ahu, aut so hubaritahon i!” (1 Korint 9:16) Molo tatiru si Paulus, tarlatik ma panggora ni rohanta jala boi ma hita mangulahon na denggan. Tingki marbarita hita tu na asing, na taurupi do nasida mangalatik panggora ni rohana. Si Paulus mandok, ”Hasintongan i do hupapatar hami, gabe jongjong hami, tandaon ni roha ni saluhutna jolma di adopan ni Debata.”—2 Korint 4:2.

17. Songon dia do donganta na poso mangihuthon panggora ni rohana?

¹⁷ Tingki di singkola, diparsiajari si Jacqueline do evolusi. Didok ibana, ”Maralo do tu panggora ni rohangku tingki mangulas evolusi di singkola. Ndang satolop ahu tu ajaran ni evolusi. Hupaboa ma tu guru taringot haporseaonku. Dipaloas ma ahu mangganti topikna gabe panompaon.” Las ma roha ni si Jacqueline ala ditangihon jala diulahon ibana panggora ni rohana. Dijujui panggora ni rohamuna do hamu mangulahon na denggan?

18. Boasa ingkon tarlatik panggora ni rohanta?

¹⁸ Na tinuju ni ngolunta, i ma mangulahon aha na dihalomohon ni Jahowa. Jala panggora ni roha ma na mangurupi hita mangulahon i. Molo taparsiajari Bibel, tarimangi, jala taulahon di ngolunta, tarlatik ma panggora ni rohanta. Panggora ni roha, manogunogu ngolu ni halak Kristen asa denggan!