Andigan do ulaon marbarita na uli i marujung?

Didok Jesus, “Dibaritahon ma barita na uli taringot tu Harajaon i di liat portibi on, asa saluhut bangso mambege barita i. Dung masa i ro ma ujungna.” (Mat. 24:14) Hata “ujungna” di ayat on, di ayat 6, dohot di ayat 13, diterjemahon sian hata Junani, i ma teʹlos. Lapatanna, ujung ni portibi na dirajai Sibolis, i ma tikki di Armagedon. (Pgk. 16:​14, 16) Sian on taboto, dang leleng sebelum dimulai Armagedon, tetap dope tapasahat barita na uli. On menyesuaihon pangattusionta na sebelumna.

Molo pangattusionta na sebelumna, disi dimulai hasusaan bolon, i ma tikki dihancurhon Babel na Balga, dang marbarita na uli be hita. (Pgk. 17:​3, 5, 15, 16) Tikki i, porsea do hita molo nungnga dimulai hasusaan bolon, dang dilehon Jahowa be kesempatan tu akka halak lao mambege barita na uli. (Jes. 61:2) Jala porsea do tong hita, holan akka halak na setia tu Jahowa andorang so hasusaan bolon i do na lao dipalua. Disarupahon do nasida songon halak Jahudi na malua tikki dihancurhon Jerusalem di taon 607 SM. Alana andorang so dihancurhon Jerusalem, marsitutu do akka halak Jahudi i mangulahon ibadat na sittong jala magigi tu ulaon na jahat. (Hes. 5:11; 9:4) Alai pangattusionta i dang sesuai tu hata ni Jesus di Mateus 24:14. Hata ni Jesus i patuduhon dilehon dope ra kesempatan tu akka halak lao mambege barita na uli dang leleng sebelum dimulai Armagedon.

Ala nungnga disesuaihon pangattusionta taringot Mateus 24:14 on, porlu do tong disesuaihon pangattusionta taringot udan es na disurirakkon di Pangungkapon 16:21. Dung diparsiajari muse jala dirimangi, berkaitan do hape dua ayat i. Parrohahon ma na didok Apostel Paulus taringot tanggapan ni akka halak tu barita na tapasahat. Didok ibana, gabe “songon uap na parohon hangoluan” do barita na uli i tu “halak na lao dipalua”. Alai, gabe “songon uap na parohon hamatean” do barita i di akka musu ni Debata. (2 Kor. 2:​15, 16) Sogo do roha ni nasida tu barita na uli i. Boasa? Alana holong do roha ni nasida tu sude na adong di portibi on. Hape barita na uli i patuduhon Sibolis do na mangarajai portibi on, massai gok do hajahaton, jala lao dihancurhon nama sudena i.—Joh. 7:7; 1 Joh. 2:17; 5:19.

Jala parrohahon ma muse na didok Bibel taringot udan es na balga. Didok di Bibel, alani udan es i, “balga situtu do jea i”. Lapatanna, ra saleleng hasusaan bolon i, gabe lam terus terang ma hita pasahatton barita i. Hasilna, gabe lam godang ma halak na mamboto Jahowa do Debata na sittong. (Hes. 39:7) Di tikki i, dung dihancurhon Babel na Balga, adong dope akka halak na manjalo barita i songon uap na angur? Adong do ra. Diingot nasida do ra, nungnga jotjot dipaboa Saksi Jahowa na lao dihancurhon do Babel na Balga. Gabe diboto nasida ma sittong do na didok Saksi Jahowa i ala diida nasida do i terjadi.

Sarupa ma on songon na masa tikki diparo Jahowa Sappulu Tulah tu halak Mesir. Dung ‘dihukum Jahowa sude debata ni halak Mesir’, gabe “godang do akka halak na sian bangso na asing mangihutton [bangso Israel]”. (2 Mus. 12:​12, 37, 38) Ra ala diida nasida saut do sude na didok si Musa taringot Sappulu Tulah i, gabe dipillit nasida ma mangihutton naposo ni Jahowa.

Dung dihancurhon Babel na Balga, adong do ra akka halak na mamillit lao marpihak tu Jahowa. Gabe dapot ni nasida ma kesempatan lao mendukung haha anggi ni Jesus manang akka na miniahan na adong dope di tano on. (Mat. 25:​34-36, 40) Alai asa boi nasida ditandai Jesus gabe biru-biru, ikkon olo do nasida muba sebelum ro Armagedon i. Alana di tikki i, nakkok nama sude na miniahan tu surgo.

Jadi, pangattusionta na disesuaihon on mambahen lam pos rohatta tu holong dohot asi ni roha ni Jahowa na massai balga. Takkas ma, “dang lomo rohana diripasson manang ise pe, alai naeng ma sude jolma marhamubaon”.—2 Ptr. 3:9.