‘Toktong ma . . . rade hamu manalpuhon hasalaan ni nasida nang pe haccit rohamuna dibahen.’​—KOLOSSE 3:13.

Sude do hita hea mambahen na sala. Mungkin hea do tabahen haccit roha ni halak na asing, manang hea do halak na asing na mambahen haccit rohatta. Alani i, sude hita ikkon olo do mengampuni sala ni halak na asing. Molo nungnga tamaappon halak na asing, unang be sai sogo rohatta tu ibana. Unang ma tabalos na jahat dohot na jahat, jala unang be sai taingot-ingot hasalaanna i. (Rom 12:17) Alai boha do molo massai haccit rohatta dibahen jala maol talupahon hasalaanna i? Ikkon makkatai do hamu tu halak na mambahen haccit rohamuna i. Jala ikkon denggan do i dihatai hamu. Tujuanta i ma, asa boi do hita mardame dohot ibana. Dang na lao mangalului ise na sala jala ise na sittong.​—Rom 12:18.

“Toruk ma rohamuna, jala sangap ma bahen tu na asing.”​—PILIPPI 2:3.

Molo serep rohatta jala taargai halak na asing, pasti lomo ma roha ni halak mardongan dohot hita. Boi do diboto nasida na burju hita jala peduli tu nasida. Jala diboto nasida do, molo adong pe tabahen na sala dang na sengaja hita mambahen haccit roha ni nasida. Alai molo taanggap do diritta na unjago sian halak na asing manang na ikkon  hatatta na ikkon saut, gabe dang lomo be roha ni halak mardongan dohot hita. Jala olo do dang adong be halak na olo mardongan dohot hita.

“[Dang] marimbar jolma di jolo ni Debata. Lomo do roha ni Debata mangida ganup halak na makkabiari Ibana jala na mangulahon na sittong, dang soal sian bangso na dia pe nasida.”​—ULAON NI APOSTEL 10:34, 35.

Dang hea dibeda-bedahon Debata akka jolma sian bangsona, bahasana, status sosial, manang warna ni kulitna. Alana, “Sian sada jolma do dibahen Ibana sude bangso.” (Ulaon ni Apostel 17:26) Alani i, na marhaha maranggi do sude hita. I do alana, lomo do rohatta asa taargai halak na asing jala burju hita tu nasida. Molo tabahen songon i, las ma roha ni nasida, hita pe las ma rohatta jala Debata pe las ma rohana.

“Patuduhon hamu ma . . . lambok ni roha.”​—KOLOSSE 3:12.

Molo lambok hita, lomo ma roha ni halak mardongan dohot hita. Gabe dang mabiar be halak makkatai tu hita dohot pasingotton hita. Alana diboto nasida, dang halak na mura muruk hita. Jadi tikki adong halak na muruk tu hita, alai molo lambok hita mangalusi, boi do i mambahen halak na muruk i gabe tenang. Poda 15:1 mandok, “Hata na lambok padaohon rimas, alai mambahen muruk do hata na kasar.”

“Umlas do roha ni halak na mangalehon sian na manjalo.”​—ULAON NI APOSTEL 20:35.

Godang halak saonari on na serakah jala holan na mamikkirhon dirina sandiri. Alai, boi do tamba las ni rohatta molo burju hita mangalehon. (Lukas 6:38) Marlas ni roha do halak na burju mangalehon. Alana dianggap ibana, uppetting do halak na asing sian dirina manang sian akka arta. Tikki adong halak na burju tu ibana, mandok mauliate do ibana jala diargai ibana do burju ni roha na dipatudu tu ibana. (Kolosse 3:15) Pikkirhon ma on, ‘Halak na so olo mandok mauliate do au jala halak na holit? Manang halak na burju mangalehon do au, jala sai huingot do mandok mauliate?’ Aha ma parsiajaranna tu hita? Molo lomo rohatta burju halak na asing tu hita, ikkon songon i do tong tabahen tu nasida.​—Mateus 7:12.