Rimangi ma situasi on: Tingki marmeam si Tim dohot donganna, dilempar ibana ma bola, gabe puntar ma kaca jandela ni hombar jabuna.

Molo hamu gabe si Tim, aha do na laho ulahononmu?

ADONG TOLU SIPILLITONMUNA:

1. Sipsip laho.

2. Didok hamu, halak do na sala.

3. Dipaboa hamu hasalaanmuna, jala rade mangganti manang paturehon i.

Ra, olo do hamu mamillit Bagian A. Alai, sai adong do labana molo dipaboa hamu hasalaanmuna.

1. I do na dumenggan.

   Bibel paboahon, ”Huringkoti hami marparange na denggan di na saluhut.”​—Heber 13:18.

2. Molo taakkui hasalaanta, olo do halak manalpuhon i.

   Bibel paboahon, ”Manang ise na mamorso angka hajahatonna, ndang tagamon mardohar, alai manang ise na manopoti, laos ditadingkon antong, dapotan asi ni roha do.”​—Poda 28:13.

3. Na rumingkot, dihalomohon Debata Jahowa do on.

   Bibel paboahon, ”Ai sogo do roha ni Jahowa di halak na jahat dipardongan do halak na tigor.”​—Poda 3:32, Bibel siganup ari.

Si Karina, na marumur 20 taon, manabunihon surat tilang sian bapakna. Alai, ndang tartabunihon ibana i. Didok si Karina ma, ”Dung sataon, diboto bapakku ma molo ahu hona tilang. Gabe masalah ma on di ahu!”

Aha parsiajaranna? Didok si Karina muse, ”Ndang denggan molo tatabunihon hasalaanta. Alana, habotoan do muse!”

Bibel paboahon, ”Ai saluhut hita marsala.” (Jakobus 3:2) Songon naung diulas, molo taakkui hasalaanta jala pintor hatop taulahon i, on patuduhon hita jolma na serep marroha jala jolma na matoras.

Dung i, marsiajar ma sian hasalaanmuna. Sahalak borua na margoar si Vera mandok, ”Marsiajar do ahu sian hasalaanku. Alani i, diurupi ma ahu lam denggan marparange asa unang mangulahon hasalaan na sarupa.” Parsiajari ma songon dia cara mangulahon i.

Dipangke hamu ma sepeda ni bapakmuna, laos sega ma i alani hamu. Aha do na laho ulahononmuna?

• Ndang olo hamu paboahon, unang ma nian tarboto.

• Dipatorang hamu sasintongna aha na masa.

• Dipatorang hamu aha na masa, alai disalahon hamu halak na asing.

Ndang lulus hamu ujian ala ndang hea marsiajar. Aha do na laho ulahononmuna?

• Disalahon hamu soal ujian i.

• Martanggung jawab ala ndang denggan nilaimuna.

• Didok hamu, ndang lomo roha ni guru mangida hamu.

 Ingot ma muse situasi naung diulas di ginjang, jala rimangi ma molo hamu gabe (1) bapakmuna manang (2) gurumuna. Aha do na dipingkiri bapakmuna dohot gurumuna molo denggan diakkui hamu hasalaanmuna? Aha do na dipingkiri nasida taringot hamu molo ditabunihon hamu hasalaanmuna?

Pingkiri ma hasalaan na hea dibahen hamu jala alusi ma sungkunsungkun on.

Aha do hasalaanku? Aha na huulahon molo sala?

• Hutabunihon.

• Husalahon ma halak na asing.

• Pintor huakkui ma.

Molo ditabunihon hamu hasalaanmu, boha do pangkilalaanmu?

• Las roha—Ndang pola boha i!

• Manolsoli—Ingkon hupaboa do na sasintongna.

Songon dia do hamu mambahen asa denggan situasina?

Aha do na diparsiajari hamu sian hasalaanmuna?

Boasa pigapiga halak lomo rohana manabunihon hasalaanna?

Aha do na ro tu pingkiran ni halak molo ditabunihon hamu hasalaanmuna, alai aha do na ro tu pingkiran ni nasida molo dipaboa hamu hasalaanmuna?​—Lukas 16:10.