Kaat Samuel iba 1:1-27

  • David a nok le Saulô a nwo (1-16)

  • Hiémbi hi maéya hi David inyu Saulô bo Yônatan (17-27)

1  I jam lini jon li bi tagbe i ngéda Saulô a bi wo. David a bi yémbél* Lôk Amalek, a yén dilo diba i Ziklag.+ 2  I hilo hi nyônôs aa, mañge wanda a lôl i homa Saulô a bé yééne, a ban-ga bipéda bi mambot, ni biték i ño. I ngéda a bi pam bebee ni David, a ôm maboñ i bisu gwé, a ôm ki mbom ’isi. 3  David a bat nye le: “U nlôl hee?” A timbhe le: “Me nso, me nlôl i homa Lôk Israel i nyééne.” 4  David a bat ki le: “Mam ma ntagbe lelaa? Soho kal me.” Ha nyen a timbhe le: “Bisônda bi Israel bi nso gwét, ngandak i nwo. Yak Saulô ni man wé Yônatan ba nwo.”+ 5  Ha nyen David a bi bat i mañge wanda nu a bi legel nye nwin le: “Lelaa u nyi le Saulô bo man wé Yônatan ba nwo?” 6  Mañge wanda a timbhe le: “I ngéda me bé i hikôa Gilbôa,+ ha nyen me bi tehe Saulô a nigbene likoñ jé, yak bikak bi gwét ni bakilhosi ba noñok nye, ba bak yaga nye+ bebee. 7  I ngéda a bi hielba, a tehe me, a sébél me, me timbhe nye le: ‘Me nunu, a nwet!’ 8  A bat me le: ‘We u yé njee?’ Me timbhe le: ‘Me yé man Lôk Amalek.’+ 9  I mbus, a kal me le: ‘Soho, loo ipañ yem, u nol me, inyule to hala kiki me ngi niñik, me nok njôghe ngandak.’ 10  A kwo ’isi, a ma babaa. Me bé yi le a nla bé niñ. Jon me bi kôôge nye bebee, me nol+ nye. I mbus, me yoñ ntut u ane u u bé i ngii ño wé, ni nkôm u u bé i woo wé; gwo bini me nlona we, a nwet wem.” 11  Ha nyen David a bi pat mambot mé, yak i bôt bobasôna ba bé lôñni nye ba boñ nlélém. 12  Ba bégél, ba ee, ba sôga je*+ letee ni kôkôa, inyule Saulô ni man wé Yônatan, lôñni ngandak bôt mu litén li Yéhôva ba bi nôla ni pansoñ; ñ, ngandak bon ba Israel+ i bi nôla. 13  David a bat mañge wanda nu a bi legel nye nwin le: “U nlôl hee?” A timbhe le: “Me yé man Lôk Amalek, nkén mut i Israel.” 14  Ha nyen David a bi bat nye le: “Lelaa u mban ñem, u pa woo, u nol nhook u Yéhôva?”+ 15  I nlélém ngéda, David a sébél mañge wanda wada mu boñge bé ba wanda, a kal nye le: “Loo hana bebee, u nol nye.” Jon mañge wanda a bi nol+ nye. 16  David a kal nye le: “Wemede nyen u nyéñ nyemb yoñ,* inyule wemede nyen* u mbok mbôgi, u kal le: ‘Men me nol+ nhook u Yéhôva.’” 17  I mbus, David a bôdôl tôp i hiémbi hi maéya hini inyu Saulô bo man wé Yônatan,+ 18  a ti ki oda le ba niiga hio bôt ba litén li Yuda; ba bé sébél hio le “Mpihlôñgô.” I hiémbi hini hi yé ntilga ikété kaat i Yasar+ le: 19  “A Israel, lipém joñ li nkwo nyoo i dikôa+ tjoñ. Mimpémba mi bôt mi nkwo ’isi! 20  Ni añlak bañ jo i Gat;+ni leglak bañ jo mu minloñ mi Askélôn,tiga le bingond bi Lôk Filistia bi ba maséé,tiga le bingond bi bôt ba yé ngi kweeba bi lôôha hak. 21  A dikôa di Gilbôa,+to manwee, to nop bi kwo ha bañ i ngii nan,to nwom minan mi ti ha bañ bijek ni nla sémél+ Nyambe,inyule biben bi mimpémba mi bôt bi nhooba mahindi,ben i Saulô i ga bana ha bé môô. 22  Mpihlôñgô u Yônatan u bé témb bé ngi kôp matjél ma baoo,u bé témb+ bé to ngi tôp mahoñ ma mimpémba mi bôt;to pansoñ i Saulô i bé témb bé ngi yémbél.+ 23  I ngéda ba bé i niñ, bôt ba bé gwés Saulô bo Yônatan,+ ba diihege bo,to nyemb i bi bagal+ bé bo. Ba bé hoo iloo minyôgôl,+ba ban-ga ngui iloo mbondo njéé.+ 24  A bingond bi Israel, eea Saulô,nyen a bé boñ le ni haba mambot malam, ma kôibak tjôôm,a bé kéi ki gwom bi gôl mu mambot manan. 25  Éé, mimpémba mi bôt mi mbeha ’isi nyoo i gwét! Yônatan a nôla nyoo i dikôa+ dinan! 26  A mankéé Yônatan, me nok njôghe ngandak inyu yoñ;me bé diihe+ we ngandak. I gwés u bé gwés me i bé hélha, i bé loo yak gwéha i bôda.+ 27  Éé, mimpémba mi bôt mi nkwo! Yak bijôl bi gwét bi gwé ha bé nseñ!”

Ndoñi

^ Tole “bép.”
^ Tole “ba kôôba yén njal.”
^ Ni hop Lôk Héber, “nyo woñ won.”
^ Ni hop Lôk Héber, “Matjél moñ ma yé i ngii ño woñ.”