ARIMATEA MARKANKIR JOSÉ chachajja, Poncio Pilato romano apnaqerimpejj jan ajjsartʼasaw parläna. Uka apnaqerejj jachʼa jachʼa tukurit uñtʼatänwa. ¿Kunas jan ajjsartʼas parlañatak Josear yanaptʼäna? Jesusar jiwayapkäna uka qhepatjja, mayniw Jesusan cuerpop mayir uka gobernadorampi parlir sarañapäna, ukhamat sum imjjañataki. Ejerciton oficialapajj Jesusajj jiwatäjjatap yatiyäna ukhajja, iyaw sasaw Pilatojj Jesusan jiwat cuerpop Josear churjjäna. Ukhamatwa kuntï Joseajj lurañ munkäna ukajj phoqasïna. Joseajj wali llakitäkchïnsa, kawkjantï Jesusar jiwayapkäna ukar jankʼakiw kuttʼäna (Mar. 15:42-45).

• ¿Arimatea markankir José chachajj khitïnsa?

• ¿Kunjamatsa Jesusar uñtʼäna?

• ¿Kunatsa José chachat yatjjatañajj wakisi?

Marcos qellqatanjja, Arimateankir Joseajj ‘Jachʼa Tribunalan wali aytat jaqënwa’ sasaw qhanañchi. Jachʼa Tribunal sasinjja Sanedrinatwa parlaskäna, ukaw judionakan jachʼa tribunalapjam uñtʼatäna (Mar. 15:1, 43). Joseajj markan mä jilïripänwa, ukatwa romano apnaqerimpi parlañatak tantachasiñ maypachäna. Ukatjja wali qollqenirakipachänwa (Mat. 27:57).

Sanedrinankirinakajj Jesús contrapjjänwa, ukatwa jiwayañatak amtapjjäna. Maysa toqetjja Joseajj “cheqapar sarnaqer suma jaqënwa” (Luc. 23:50). Sanedrinankir jilaparte jaqenakat sipansa jupajj suma jaqënwa, Diosan leyinakaparjam sarnaqañatakiw chʼamachasirakïna. Ukatjja “Diosan Reinopsa suyarakïnwa”, ukatwa Jesusan discipulopäñ amtpachäna (Mar. 15:43; Mat. 27:57). Cheqapar sarnaqer suma jaqëtapatwa Joseajj Jesusan yatichäwinakaparjam sarnaqañ amtpachäna.

Juan 19:38 qellqatanjja, “Joseajj Jesusan discipulopänwa, judionakar ajjsarañatwa jupar creyitap yaqhanakar jan arskänti” sasaw qhanañchi. ¿Kunatsa judionakar ajjsaräna? Judionakajj Jesusar uñisipjjänwa. Maynitï Jesusar creyitap arsuspäna ukhajja, sinagogat jaqsutaw uñjasispäna, Joseajj uk sum yatïna (Juan 7:45-49; 9:22). Sinagogat jaqsutanakarojja, judionakajj jiskʼachapjjerïnwa, yaqhachapjjarakirïnwa. Ukatwa Joseajj Jesusan discipulopätap jan arskänti, ukhamarus janiw jilirïñsa ni uñtʼatäñsa jaytañ munkänti.

Janiw jupa sapakejj ukhaman uñjaskänti. Juan 12:42 qellqatanjja, “jilïrinakatsa waljaniw [Jesusar] confiyapjjäna. Ukampis fariseonakar ajjsarasajja, janis Jesusar creyipkaspa ukhamaw tukupjjäna, sinagogat jan jaqsuyasiñ layku” sasaw qhanañchi. Uka jilïrinakat maynïrejj Nicodemo chachänwa, jupajj Sanedrinankirirakïnwa (Juan 3:1-10; 7:50-52).

Arimateankir Joseajj Jesusan discipulopänwa, ukampis janiw mayninakar arsuñ munkänti. Ukajj janiw walïkänti, Jesusajj sänwa: “Khititï jaqenak nayraqatan nayar uñtʼkitu ukarojja, alajjpachankir Awkij nayraqatanjja, nayajj jupar uñtʼarakïwa. Khititejj jaqenak nayraqatan nayar jan uñtʼir tukkani ukarojja, alajjpachankir Awkij nayraqatanjja janirakiw jupar uñtʼkäti” sasa (Mat. 10:32, 33). Joseajj janiw Jesusar jan uñtʼir tukkänti, jan ukasti jaqenakar arjjsaratapatwa Jesusan discipulopätap jan arskänti. ¿Jiwasat kamsasirakispasa?

Arimateankir Joseajja, Sanedrinankirinakan jan wali amtaparusa lurataparus janiw apoyañ munkänti sasaw Bibliajj qhanañchi (Luc. 23:51). Yaqhepanakajja  Jesusar jiwayañ amtapkäna ukhajj Joseajj janiw ukankkänti sasaw sapjje. Kunjamänsa uk janiw yatktänti, Jesusar jiwayañ amtapjjatapat Joseajj wal chuym ustʼayaspachäna ukampis janiw kunsa lurirjamäkänti.

Jesusajj jiwjjäna ukhatakejja, Jesusan discipulopätwa sañjja janiw Joseajj ajjsarjjänti. Marcos 15:43 qellqatan uka toqet akham siwa: “Jan ajjsartʼasaw Pilaton ukar sarasajj Jesusan cuerpop mayïna” sasa.

Inas Joseajj Jesusar jiwir uñjchïna, ¿kunatsa ukham sistanjja? Joseajj Pilato chachat nayraw Jesusan jiwatapat yatïna. Maysa toqetjja, kunapachatï Joseajj Jesusan jiwat cuerpop maykäna ukhajja, Pilato gobernadorajja “Jesusajj jiwatäjjet janicha ukwa yatiñ munäna” (Mar. 15:44). Joseajj Jesusar lawan jiwiri uñjpachänwa, ukarakiw sum amuytʼasiñapataki, jan ajjsaras Criston discipulopätwa sañatak yanaptʼpachäna. Jesusar jiwir uñjañajja, jan ajjsarañatakiw yanaptʼäna. Jichhajj janiw Jesusan discipulopätapat ajjsarjjañapänti.

Judionakan Leyiparjamajja, khitinakarutï jiwayatäñataki juchañchaskäna ukanakarojj janïr inti jalantkipan imasiñapänwa (Deut. 21:22, 23). Ukampis romanonakajja, lawar chʼakkatapjjerïkäna uka jaqenakan cuerpopajj thujstañapkamaw jaytapjjerïna, jan ukajj aleq pʼiyanakarukiw cuerponakap jaqontapjjerïna. Joseajj  janiw Jesusar ukham lurapjjañap munkänti. Jesusar jiwayapkäna uka jakʼanjja, Joseajj jiwatanak imañatak mä sepulturanïnwa. Uka sepulturajj chʼusakïskänwa. Ukhamajj Arimatea * markankir Joseajj ukhanakakiw Jerusalén markar purpachäna, ukanwa familiaranakaparojj imasiñap munäna (Luc. 23:53; Juan 19:41). Kawkjarutï jupajj imatäñ munkäna uka cheqar Jesusaru imatapajja, suma chuymanïtapwa uñachtʼayäna. Ukhamarus mä profecía phoqaskarakïna, Mesiasarojj ‘qamiri jaqenakampi chikwa imapjjani’ sasaw Bibliajj qhanañchi (Is. 53:5, 8, 9, NM).

Pusi Evangelionakanjja Jesusan cuerpop lawat apaqasajja, Joseajj suma lino telanakampiw chʼoqantäna ukatjja sepulturaruw uchäna sasaw qhanañchi (Mat. 27:59-61; Mar. 15:46, 47; Luc. 23:53, 55; Juan 19:38-40). Nicodemo sapakiw Josearojj yanaptʼäna. Nicodemojj suma aceitenak Jesusan cuerpopar uchañatak apanirakïna. Uka pä chachanakajj wali uñtʼatäpjjänwa, ukhamajj janiw jupanakakejj Jesusan cuerpop apapkpachänti, jan ukasti servirinakapampiw yanaptʼayasipjjpachäna. Kunjamsa uk lurapjjäna uk janiw yatktanti, ukampis ukham lurapjjatapajj wali askïnwa. Maynejj mä jiwat cuerpo apnaqerïna ukhajja, paqallqo urunakaw qʼañut uñjatäñapäna, ukat kunanaktï aparapamp llamktʼirïkäna ukanakajj ukhamarakiw qʼañut uñjasiñapäna (Núm. 19:11; Hag. 2:13). Ukhamarus Pascua fiesta semanajja janiw mayninakar jakʼachasipjjañapäkänti, ukatjja janirakiw uka fiestar sarapjjañapäkänti (Núm. 9:6). Jesusan cuerpop imasajja, Joseajj mayninakan jiskʼachataw uñjasirakiñapäna. Ukampis jupajj janiw Jesusan jiwat cuerpop imañ ajjsarayaskänti, janirakiw discipulopätwa sañsa ajjsarayaskänti.

Jesusar imjjäna uka qhepatjja, Bibliajj janiw Arimatea markankir Joseat jukʼamp qhanañchjjeti. Ukhamajj inas akham sasin jisktʼassna: “¿Kunas Joseampejj pasäna?” sasa. Janiw uk yatktanti. Ukampis yatjjataniwayktan ukarjamajja, inas Criston arkiripätwa sasin taqenir sisjjchïna. Yantʼanakan uñjasiñajja, Diosar jukʼamp confiyañatakiw Josear yanaptʼäna, ukatjja janirakiw ajjsartʼayaskänsa. Ukajj wali askïnwa.

José chachan sarnaqäwipajja, Jehová Diosar serviñat sipansa kunas jakäwisan nayranki uk sum amuytʼasiñasatakiw yanaptʼistu. Awisajj akanakaw Jehová Diosar serviñat jarkʼistaspa wali uñtʼatäñ munaña, cosasanakanïña, jan ukajj familiasaw jarkʼistaspa.