HEMSWORTH cheqanwa 1923 maran nasta, ukajj Yorkshire (Inglaterra) markankiwa. Jilïr jilajajj Robert satawa. Tatajajj kʼari chuyman religión pʼeqtʼirinakarojj wal uñisïna. Llätunka maranïkayät ukhajja, falso religionanakat parlir libronakwa tatajajj liytʼäna, ukanjja kunjamsa religionanakajj jaqenakar engañapjje ukwa qhanañchäna. Qhepatjja, Robert Atkinson jilataw visittʼapjjetäna. Rutherford jilatan arstʼäwipwa mä gramofonot istʼayapjjetu. Tatajajj liytʼkäna uka pachparak ukan qhanañchäna. Bibliat walja jisktʼanakanïpjjayätwa, ukatwa awk taykajajj nanakamp sapa aruma manqʼasir jutañapatak invittʼapjjäna. Robert jilatajj tantachäwinakaruw invittʼapjjetäna, tantachäwejj yaqha jilatan utapankänwa, walja kilometronak sarañankarakïnwa. Tantachäwinakarojj sarjjapjjäyätwa, Hemsworth cheqan mä grupow uñstäna. Qhepatjja congregación tumptʼir jilatanakaruw utar alojtʼapjjerïta, precursor jilat kullakanakarus manqʼasiñatak invittʼapjjarakirïtwa. Ukaw wal yanaptʼitäna.

Familiajajj mueblenak lurasaw aljapjjäna, ukatwa tatajajj jilajar akham säna: “Precursorat serviñamatakejj aka trabajos jaytjjañasawa” sasa. Jilajajj 21 maraniw precursorat serviñatakejj utat sarjjäna. Pä maranak qhepatsti, nayajj precursoratwa servjjarakïyäta, ukhajj 16 maranikïskayätwa. Jilapartejj sapakiw gramofonompi yatiyañatak tarjetampi yatiyirïta. Ukampis Jehová Diosajj mä yateqerimpiw bendisitäna, jupajj jankʼakiw yateqäna. Tiempompejja, familianakapat waljaniw Bibliat yatjjatapjjarakïna. Mä mara qhepatsti, precursor especialat serviñatakiw invittʼapjjetäna. Mary Henshall kullakamp chikaw Condado de Cheshire cheqar yatiyañatak khitapjjetäna.

Uka tiemponjja, Segunda Guerra Mundialaw apasiskäna. Warminakarojj guerrar yanaptʼir sarapjjañapatakiw mayipjjäna. Tribunalanakajj yaqha religionankirinakarojj janiw guerrar sarapjjañapatak maykänti, ukatwa precursor especialanakajj janiw sarapkäti sasin amuyapjjayäta. Ukampis janiw ukhamäkänti, 31 urunakaw carcelar llawintapjjetäna. Mä mara qhepatjja, pä tribunalaruw  sarayäta, ukanjja ‘nayajj Bibliarjam sarnaqañatakiw chʼamachasta, janiw guerrar yanaptʼkirïstti’ sasaw sista, janiw carcelar llawintapkitänti. Ukhajj 19 maranëjjayätwa. Jehová Diosaw yanaptʼaskitäna, uk qhanwa amuyayäta (Isa. 41:10, 13).

Arthur Matthews jilatarojj 1946 maranwa uñtʼta. Jupajj precursor especialat servir Dennis jilapampiw Hemsworth cheqar yatiyir sarapjjäna. Ukatjja kimsa phajjsiw guerrar jan sarañ munatapat carcelan llawintat uñjasïna. Tatapaw jupanakarojj wawatpach yatichatayna, ukat waynitükasaw bautisasipjjarakitayna. Dennis jilaparojj Irlanda markar sarañapatakiw mayipjjäna, ukhamasti Arthur jilatajj sapakiw qheparäna. Awk taykajajja, Arthur jilatarojj utar quedasiñapatakiw invittʼapjjäna. Jupajj wali trabajtʼir precursoränwa. Familiajar visitir sarirïta ukhajja, Arthur jilatampejj platonak jaripjjerïta. Qhepatjja sapa kutiw qellqasjjapjjayäta. 1948 maran mayampis kimsa phajjsi carcelar llawintapkchïnjja, enero 1949 maranwa casarasjjapjjayäta. Precursoräñwa amtapjjayäta, janiw ina chʼusar qollq tukjapjjañajjäkänti. Vacacionanjja frutanak apthapisaw trabajipjjerïta, Diosan yanaptʼapampejj precursorat servisipkakiyätwa.

Mä mara qhepatjja, Irlanda del Norte cheqaruw servir sarañatak invittʼapjjetäna. Armagh cheqar sarasajja, Newry cheqarurakiw sarapjjayäta. Ukanjja jilapartejj catolicöpjjänwa. Yaqha religionankirinakarojj wal uñisipjjäna, ukatwa wali amuyump yatiyapjjañajjäna. Mä jilatan utapanwa tantachasipjjayäta, jupampi esposapampejj 16 kilometronak sarañan jakapjjäna. Kimsaqallqoniw tantachasipjjayäta. Quedasipjjerit ukhajj pamparukiw ikipjjerïta. Ukampis qhepür alwajj wal manqtʼasiniwayapjjerïta. Jichhajj walja jilat kullakanak utj-jjatapat wali kusisitätwa.

Jilajampi Lottie esposapampejja, Irlanda del Norte cheqanwa precursor especialat servisipkäna. Jupanakampiw Belfast cheqan kimsa uru jachʼa tantachäwirojj 1952 maran sarapjjta. Alojtʼapkitäna uka jilatan utapanjja, Pryce Hughes jilataw ukankarakïna. Jupajj Gran Bretaña markan sucursal pʼeqtʼirit serviskäna. Mä arumajja, Pryce jilatampiw El camino de Dios es el de amor sat folletot parlasipkayäta. Jilatajja uka folletojj ‘República de Irlanda markan jakasirinakatakiw lurasiwayi, catoliconakar yatiyañajj chʼamakiwa. Irlandanjja jaqenakajj Testigonakar utanakapat alisnukusipkiwa, tatacuranakajj jan waltʼayapjjañapatakiw jaqenakar chʼamañchasipki’ sasaw säna. Jilatajj saskakïnwa: “Casarat jilat kullakanakaw munasi, jupanakajj autonïpjjaspa, ukhamat folletonak lakirir sarañataki” sasa. * Kunjamtï qalltan siskayätjja, ukhaw “¡nanakaw sarapjjerista!” sasin sapjjayäta.

 Dublín cheqanjja, precursoranakajj walja maranak Diosar servir Ma Rutland kullakan utapan alojtʼasipjjapunirïnwa. Utaparuw mä qhawqha tiempo quedasipjjayäta, kunanakatï utjapkitäna ukanak aljasajj pusinpachaw Robert jilajan motopar sarjjatasajj auto alir sarapjjayäta. Jilajan motopajj mä jiskʼa carritonïnwa. Auto alasajja, aljapkitän uka jaqeruw utakam apañapatak ruwtʼasipjjayäta, nanakajj janiw apnaqañ yatipkayätti. Esposojajj uka jaypʼojj ikiñar qontʼataw auton cajanakapsa apnaqkaspa ukham yateqäna. Qheparmantisti garajet auto apsuñ yantʼäna, ukhamaruw Mildred Willett misionerajj purinïna (jupajj John Barr jilatampiw casarasïna). Auto apnaqañ jupaw yatichapjjetäna, ukhamatwa sarjjapjjayäta.

Sarjjasajja mä ut thaqapjjañajjäna. ‘Janiw autor uñtasit llantanakan utan jakapkasmati, jaqenakaw uñisiñat phichantapjjaspa’ sasaw ewjjtʼapjjetäna. Ukatwa mä ut thaqapjjayäta, jan jikjjatasajja uka arumajj auton ikipjjayäta. Qhepürusti pä jiskʼa ikiñani autor uñtasit llantanakan mä utak jikipjjta. Ukanwa jakasipjjañajjäna. Yaqhep jaqenakajja, uta jakʼar auto jaytasisipkasmawa sasaw sapjjetäna. Ukatwa autor uñtasit ut jaytasajj 20 kilometronak jayanakan yatiyapjjerïta. Ukatjja yaqha cheqaruw jittʼayapjjerïta, ukhamat jaqenakajj jan kunsa lurapjjañapataki.

Irlanda markankir Inti jalsu aynach toqen utjki uka markanakanwa yatiyapjjayäta, janiw kunas pasapkitänti. 20.000 jila folletonak jaytapjjarakiyäta. Gran Bretaña sucursalaruw Bibliat yateqañ munapkäna ukanakan sutinakap churapjjayäta. Uksanjja walja Testigonakaw utj-jje.

Mä qhawqha maranak qhepatjja, Londres markat aynach toqeruw servir khitapjjetäna. Mä qhawqha urunakatjja, Arthur esposojarojj congregacionanak tumptʼirit serviñapatakiw sucursalat jawsanipjjäna. Qheparmantiw congregacionanak tumptʼañ qalltañapäna. Ukatakisti mä semanaw wakichtʼapjjetäna. Uka qhepatjja, Escocia markaruw sarjjapjjayäta, ukanwa congregacionanak tumptʼapjjañajjäna. Esposojajj janiw arstʼäwinak sum wakichtʼasiñatak tiemponïkänti, ukhampachas luräwip sum phoqäna. ¡Jupajj wali yateqaskayänwa! Nayrajj jaya cheqanakanwa yatiyapjjayäta, jichhajj wali kusisitaw walja jilat kullakanakar visittʼapjjayäta. Ukajj mä suma bendicionapunïnwa.

Arthur esposojarojj 1962 maranwa Galaad Escuelar invittʼapjjäna. Uka escuelajj 10 phajjsinakaw apasïna. Ukhamajj mä amtaruw puripjjañajjäna. Sapakis quedasiñajäkchïnjja, esposojampejj uka escuelar sarañap amtapjjayäta. Nayarojj Hemsworth cheqaruw precursor especialat serviñajatak khitapjjetäna. Esposojajj kuttʼanjjäna ukhajja, congregación tumptʼirinakan uñjiripat serviñapatakiw invittʼapjjäna. Ukhamajj Escocia, Irlanda del Norte, Inglaterra markat alay toqenakaruw visittʼir sarapjjañajjäna.

Khä 1964 maranjja, esposojarojj Irlanda markankir sucursal uñjirit uttʼayapjjäna. Congregación tumptʼirjama, tumptʼirinakan uñjiripjam serviñas wal kusisiyapjjetäna. Betelar sarañ ajjsarayasiyätwa, ukampis Betelan servitajat wali kusisitätwa. Kunanaktï Jehová Diosajj lurañas muni uk lurtan ukhajja, jupajj bendisipunistuwa. Betelanjja oficinana, qellqatanak apayasa, manqʼa phayasa, qʼomachasaw trabajiyäta. Mä jukʼa tiempojj congregación tumtʼirinakan uñjiripjamaw servipjjarakta, walja jilat kullakanakaruw uñtʼawayapta. Bibliat yateqerinakasas bautisasipjjänwa, taqe ukanakaw Irlanda markankir jilat kullakanakar jukʼamp munasiñatak yanaptʼapjjetu. Taqe ukanakajj mä bendicionawa.

Irlanda markanjja, 1965 maranwa Dublín cheqan walja markanakat nayrïr jachʼa tantachäwejj apasïna. * Jilapart jaqenakajj janiw utjañap munapkänti. Ukampis 3.948 ukhaniw uka tantachäwinkapjjäna, ukat 65 bautisasipjjarakïna. 3.500 ukha Testigonakaw yaqha markanakat jutapjjäna. Jupanakarojj Dublín cheqankir jaqenakaw alojtʼapjjäna. Alojapkän uka jaqenakarojj yuspärañatak mä carta qellqapjjäna. Ukatjja waljaniw Testigonakajj wali suma jaqenakäpjjewa sasin sapjjäna. Uka tantachäwejj Irlanda markan walpun yanaptʼawayi.

Khä 1966 maranjja, Irlanda markan alaya ukat aynacha toqenkir markanakajj Dublín cheqankir sucursalan apnaqatäjjänwa. Uka markanakanjja jaqenakajj uñisisipjjänwa. Catoliconakatsa yaqha iglesiar saririnakatsa Jehová Diosaruw uñtʼapjjäna. Jupanakajj mayachtʼataw Diosar servipjjarakïna uk uñjañajj wali sumapunïnwa.

Gran Bretaña markankir sucursalampi Irlanda markankir sucursalampejja, 2011 maranwa mayachtʼasipjjäna. Ukatwa Londres Betel utaruw sarapjjañama sasin sapjjetäna. Ukapachajja doctoranakajj Parkinson usunïtawa sasaw esposojar sapjjäna. 20 de mayo de 2015 maranwa esposojajj jiwjjäna, 66 maranakaw jupamp serviwayapjjta.

Aka qhepa maranakajj nayatakejj chʼamakïnwa, esposojat wal llakista. Ukampis ukham jan walinakan uñjasktan ukhaw Jehová Diosar jukʼamp jakʼachassna. Jilat kullakanakajj esposojarojj wal munasipjjäna, ukajj wal chʼamachtʼitu. Amigonakajajj Irlanda, Gran Bretaña, Estados Unidos uksatpach qellqanipjjetu. Esposojan Dennis jilapasa Mavis esposapasa, Ruth, Judy sobrinanakajas wal chuymachtʼapjjarakitu, ukanakaw wal yanaptʼawayitu.

Isaías 30:18 qellqataw yanaptʼitu, ukan akham siwa: “Tatitojj jumanakat khuyapayasiñatakiw suyasipktam, jupasti walipuniw munasiñapjja uñachtʼayañ munapjjtam, [Jehová Diosasti] khuyapayasiri cheqapa Diosarakiwa. ¡Kusisiñanïpjjew jupar suytʼirinakajja!” sasa. Jehová Diosajj jan walinak chhaqtayañ wal muni, ukajj walpun chuymachtʼitu. Jutïrinjja walja lurañanak churarakistani.

Kunjamsa Jehová Diosajj servirinakapar Irlanda markan yanaptʼawayi uk sum uñjawayta. Diosan markapar yanaptʼatajat wali kusisitätwa. Cheqansa, kunanaktï Diosajj lurañas muni ukanak lurtan ukhajja bendisipunistuwa.