Jiwañajja mä enemigökaspas ukhamawa, ukat taqeniw ukar atipjañatakejj chʼamachastanjja. Mä munat familiarasa jan ukajj amigosa jiwjje ukhajja, janiw cheqaw sañjamäkiti. Wayn tawaqöskstan ukhajja, janiw jiwkäti sasin inas amuysna. Ukajj janis cheqäkchejja, waljaniw ukham amuyapjje.

Egipto marka apnaqer faraonanakjamajj jukʼanikiw jiwañar atipjañatak wal chʼamachasiwayapjje. Jupanakajj jiwañar atipjañatakejj waranq waranqa irnaqerinakaparuw jiwañar aptʼawayapjje, ukat jupanak pachpas jiwañar puriwayapjje. Kunjamsa wal chʼamachasipjjäna ukajj jachʼa piramidenak lurapkäna ukanwa qhan amuyasi ukat aynachtʼapjjatapas amuyasirakiwa.

China marka apnaqer emperadoranakajj jiwañar atipjañ munapjjarakïnwa, ukatakejj wiñay jakayir qolla jikjjatañatakiw chʼamachasipjjäna. Qin Shi Huang sat emperadorajja, qolla uñstayirinakaparuw uka qolla uñstayapjjañapatak waytʼäna. Ukampis uka qollanakajj mercurionïnwa. Amuyatajj uka qollanak umasaw jupajj jiwpachäna.

Jan uñtʼat cheqanak thaqheri Juan Ponce de León sat español chachajj 1513 maranjja, kʼumara ukat wiñaya wayn tawaqokïskañataki qolla jikjjatañ laykojj Puerto Rico markat qalltasinwa alay toqer saräna. Ukham thaqkasaw jichhajj Florida (Estados Unidos) markjam uñtʼatäki uka cheqa jikjjatäna. Ukatjja, Norte América toqenkir jaqenakamp chʼajjwapkän ukat mä qawqha maranak qhepatwa jiwjjäna, ukampis thaqkäna uka qolljja janiw jikjjatawaykänti.

Faraonanakasa, emperadoranakasa ukat jan uñtʼat cheqanak thaqherinakasa jan jiwañatakejj wal chʼamachasiwayapjje. Ukat kuntï lurawayapki ukajj janis jiwasatak askïkchejja, kunatsa ukanak lurawayapjje uk sum amuytanjja, kunattejj janiw jiwañ munktänti.

¿Kunatsa jaqenakajj jan jiwañ munapki? Jehová Diosat * parlkasajj akham sasaw Bibliajj qhanañchi:  “Diosasti horasaparuwa taqe kunsa suma luri; ukhamarakiw jupajj jaqen chuymaparu amuytʼayi kunatï wiñayäki uka” sasa (Eclesiastés 3:11). Ukatwa aka Oraqen wiñayatak jakañ muntanjja, janiw 80 maranakak jakañ munktanti (Salmo 90:10). Cheqas ukwa chuymasajj wal muni.

¿Kunatsa Diosajj jaqen chuymaparu kunatï wiñayäki uk uchpacha? ¿Aynachtʼañasataki? Janiw Diosajj kunäkipans uk lurkaspati. Jiwañajj jan mayampitak tukjatäniwa sasaw arsuwayi. Bibliajj walja kutiw jiwañajj chhaqtayatäniwa ukat Diosajj wiñay jakañwa churistani sasin qhanañchi. ( “Jiwañarojj atipjasiniwa” siski uka recuadro uñjjattʼäta.)

Jesusajj ukhamarakiw qhan arsuwayäna: “Aka wiñay jakañajj juma sapa cheqpach Diosar uñtʼañanwa utji, ukhamarak Jesucristoru kawkïrirutejj jumajj khitankta ukaru” sasa (Juan 17:3). Ukhamajj jiwañarojj atipjasiniwa. Ukat kunjamtï Jesusajj siskänjja, Diosan yanaptʼapampikiw jiwañar atipjasispa.