Confiykañ mayordomöpjjtanwa

“Jumanakajj janiw jumanakpachata munañanïkjjapjjtati.” (1 COR. 6:19.)

AKA JISKTʼANAKAR QHANAÑCHTʼAM

¿Nayra tiempon kunsa moyordomonakajj lurapjjerïna?

¿Jehová Diosan mayordomopjamajj kuna luräwinïtansa?

¿Kuna luräwtï mayordomjam katoqtan uk kunjamsa uñjañasa?

1. ¿Esclavonakat lupʼktan ukhajj kuns amuytanjja?

 NIYA 2.500 maranak nayrajja, libronak qellqeri mä griego jaqejj akham sänwa: “Janiw khitis munañapat esclavor tukkiti”. Jichhürunakanjja, waljaniw uka arunakan cheqätap amuyapjje. Ukat kunapachatï uywatanakata jan ukajj esclavonakat lupʼktan ukhajja, wali tʼaqhesiyata ukat yaqhanakataki trabajir jaqenakatwa amuytanjja. Ukat janirakiw jupanakatak trabajasipkiti, jan ukasti patronapatakiw trabajapjje.

2, 3. 1) ¿Kunjam uñjatäpjjes Criston esclavonakapajja? 2) ¿Kuna jisktʼanakarus qhanañchaskañäni?

² Arkirinakajajj altʼat chuymani servirinakäpjjaniwa jan ukajj esclavöpjjaniwa sasaw Jesusajj säna. Ukampis esclavjamajja, cheqpach cristianonakajj janiw tʼaqhesiyatas ni jiskʼachatas uñjasipkiti. Jan ukasti, respetata, askirjam uñjata ukat confiykayäpjjewa. Amtañäni, janïr jiwañap uru purinkäna ukhajja, mä esclavotwa Jesusajj parläna. Ukasti, ‘Amuyasiri Cheqapa Uywatjamaw’ (MT) mä luräwi katoqani sasaw säna (Mat. 24:45-47).

³ Lucas libronjja, uka uywatarojj “mayordomo” sasirakiwa (Lucas 12:42-44 liytʼasiñapawa). Jichhürunakanjja, Diosaru taqe chuyma serviri cristianonakat jila partejj janiw uka uywata taypin jakhutäpkiti. Ukampis Diosan servirinakapajj taqeniw mayordomötanjja. Ukhamajja, ¿kun lurañs waktʼistu? ¿Kunjam chuymampis uka luräwi uñjañasa? Uka jisktʼanakar qhanañchtʼañatakejja, nayra tiemponjj kunsa mayordomonakajj lurapjjäna uk amuytʼañäni.

MAYORDOMONAKAN LURÄWINAKAPA

4, 5. Nayra pachanjja, ¿mayordomonakajj kuna luräwinakanïpjjansa? Khithinakats uk amuytʼsna uk qhanañchtʼam.

⁴ Nayra pachanjja, mayordomojj wali confiykañ esclavönwa, ukat jupaw uywiripan luräwinakapsa jan ukajj  negocionakapsa uñjañapäna. Ukat juparurakiw uywiripajj yänakapjjaru, qollqepjjaru ukat mayni esclavonakar uñjañapatak uttʼayäna. Amuytʼañataki, Abrahamajj Eliezer sat uywataparuw yänakap uñjañapatak jaytäna. Ukat Isaac yoqapataki warmi jikjjataniñapatakejj Abrahamajj inas Eliezer mayordomopar Mesopotamia markar khitchïna. ¡Uk phoqhañajj wali wakiskiripunïnwa! (Gén. 13:2; 15:2, 3; 24:2-4.)

⁵ Joseyajj Abrahaman allchhipan wawapänwa, jupajj Potifaran utapanwa mayordomjam uttʼayatäna (Gén. 39:1, 2). Ukat tiempompejja, jupa pachpaw mä mayordomonirakïna, uka jaqew utap uñjäna ukat mä kutejj Joseyan tunka jilanakaparus khuyaptʼayasiñamp katoqäna. Ukat kunapachatï Joseyajj qollqet lurat copampi jilanakapar yantʼañ munäna ukhajj juparakiw Joseyan arsutaparjam luräna. Kunjamtï amuyktanjja, uywirinakajj mayordomonakapar wal confiyapjjäna (Gén. 43:19-25; 44:1-12).

6. ¿Mayordomjamajj kuna luräwinïpjjes irpir chuymaninakajja?

⁶ Walja maranak qhepatjja, Apóstol Pablojj tama irpirinakat akham sänwa: “Diosan yänakap uñji[rïpjjañapawa]” sasa (Tito 1:7). Jupanakajja, ‘Tatitun ovejanakap sum awatipjjañapataki’ uttʼayatäpjjewa. Ukatwa tam sum sarayapjje ukat taqenitakis yateqaskañ sarnaqapjje (1 Ped. 5:1, 2). Cheqas janiw taqenejj pachpa luräwinïpkiti. Walja jilatanakajj mä tamanwa irpir chuymanjam loqtapjje, yaqhepasti tamanak tumptʼirjamaw irnaqtʼapjje. Ukat Sucursalanakan sarayapki ukanakajja, markpachan utjki uka tamanakaruw yanaptʼapjje. Ukampisa, taqeniw luräwinakap phoqhapjjañapa, kunattejj taqeniw Diosarojj cuenta churapjjani (Heb. 13:17).

7. ¿Kunjamatsa taqe cristianonakajj mayordomöpjjatas yattanjja?

⁷ ¿Ukat khitinakatï taman sarayirjam jan uttʼayatäpki ukanakat kamsasirakispasa? Taqe cristianonakar parlkasajj akham sasaw Pedrojj säna: “Sapa maynis kunjämtejj Diosat chʼam katoqkejj ukhama maynirojj [mayordomjam, NM] sirvpan, ukhamata taqe bendiciontï Diosajj churkistu ukajja sum apnaqañasataki” sasa (1 Ped. 1:1; 4:10). Jehová Diosajj wali khuyapayasiñatwa taqenirojj chʼama churawayistu, ukarjamaw jilat kullakanakasarojj yanaptʼsna. Ukhamasti, Diosan servirinakapajj taqeniw mayordomötanjja. Jupajj wal jiwasar confiyistu, respetistu ukat kuntï churkistu ukanakamp phoqhañaswa suyaraki.

DIOSANKIRÏTANWA

8. ¿Mayordomonakjamajj kuna wakiskir yatichäwsa amtañasa?

⁸ Mayordomonakjamajj taqeniw aka kimsa wakiskir yatichäwinak amtañasa. Nayrïrejj akawa: taqeniw Diosankirïtanjja ukat Jupan munañapwa lurañasa. Pablojj akham sänwa: “Jumanakajj janiw jumanakpachata munañanïkjjapjjtati, jan ukasti Diosaw jumanakarojj jila alampi [Criston loqtasïwipampi] alapjjtam” sasa (1 Cor. 6:19, 20). Niyakejjay Diosankirïstanjja, Jupan mandamientonakap phoqhañaw waktʼistu ukat ukanakasti janirakiw jan phoqhañjamäkiti (Rom. 14:8; 1 Juan 5:3). Ukat Criston esclavoparakïtanwa. Nayra tiempon utjkäna uka mayordomonakajj walja lurañanakjjar uttʼayatäpjjänwa ukat jupanakaw kun lurañsa amtapjjerïna. Jiwasajj ukhamarakïtanwa. Ukampis janiw kuntï munktan uk lurañatakïkiti, jan ukasti kuntï uywirisajj siskistu uk phoqhañatakiwa. Kuna lurañjjay markapan katoqstan, Diosana ukat Criston esclavopakïsktanwa.

9. ¿Uywirimpi esclavopampi kunjam apasitapsa Jesusajj amuytʼayäna?

⁹ Kunjamsa esclavojj uywiripampi apasïna uk Jesusaw amuytʼayistu. Mä kutejja, jurnalpacha trabajis uywiripan utapar kuttʼiri mä esclavotwa arkirinakapar parläna. ¿Uywiripajj “pasanim, mesar qontʼasim manqʼasiñataki” sasati  esclavopar sispachäna? Janiwa. Jan ukasti, akham sänwa: “Manqʼa phayam, jankʼak waktʼayam nayan manqʼañajjataki umañajjatakiraki; ukjjaruw jumajj manqʼaskäta, umaskätasa” sasa. Uka uñachtʼäwimpejj kamsañsa munäna uk akham sasaw Jesusajj qhanañchäna: “Ukhamarakiw jumanakajj kunapachatï taqe kuntejj Diosajj luram sapktam ukanak tukuyasajj sapjjañamajja: ‘Inamaya uywatanakakïpjjtwa, kunatejj lurañanakajjäkän ukakwa lurapjjta’” sasa (Luc. 17:7-10).

10. Jehová Diosajj Jupar serviñatak chʼamachasitas wali askit uñjatapjja, ¿kunas uñachtʼayistu?

¹⁰ Jehová Diosajj Jupar serviñatak chʼamachastan uk wali askitwa uñji. Bibliajj akham sistuwa: “Diosasti askiwa, janiw armaskaniti kuntejj lurapkta, ukhamarak munasiñanakamsa uñachtʼayapjjarakta [‘sutip layku’, NM]” sasa (Heb. 6:10). Jehová Diosajj kuntï lurirjamäktan ukakwa mayistu. Ukhamarusa, kuntï maykistu ukajj jiwasan askisatakiwa, janipuniw jan phoqhañjamäkiti. Jesusajj uñachtʼäwipan parlkäna uka esclavojja, janiw kuntï munki uk lurkiti ni jupan askipsa nayraqat thaqkiti. Niya ukhamarakiwa, kunapachatï jakäwis Diosar katuyastan ukhajja, Jupan munañap nayrar uchañwa amtawaytanjja.

¿KUNSA JEHOVÁ DIOSAJJ JIWASAT SUYI?

11, 12. Mayordomjamajja, ¿kunjam jaqëñatakis chʼamachasiñasa, ukat kunsa jan lurañasäki?

¹¹ Payïr wakiskir yatichäwejj akarakiwa: mayordomjamajja taqeniw pachpa mayitanakar phoqhañasa. Cheqas yaqhep luräwinakajja, mä qhawqha jilatanakakiw katoqapjje. Ukampisa, walja mayitanakjja taqeniw phoqhañasa. Amuytʼañäni, Criston arkirinakapjama ukat Jehová Diosan Qhanañchirinakapjamajja, “maynit maynikam munasi[pjjam]” siskistu uka mayitampejj taqeniw phoqhañasa. Ukham munasirïpjjatamatwa taqenejj nayan arkirinakajäpjjatam amuyapjjani sasaw Jesusajj säna (Juan 13:35). Ukat janiw jilat kullakanakasaruk munasktanti, jan ukasti Jehová Diosan jan Qhanañchirinakapäpki ukanakarus munasiraktanwa. Uka munasiñwa taqenejj uñachtʼayañasa.

¹² Ukat sum sarnaqañaswa Jehová Diosajj munaraki. Ukhamasti, janipuniw kunatï Aruparjamajj jan walïki ukanak lurañ munktanti. Pablojj akham sänwa: “Jan sallqjayasipjjamti, wachoqa juchan sarnaqer jaqejj janiw Diosan markapar mantkaniti, ni idolonakar yupaychirisa, wachoqa juchan sarnaqerisa, chacha pura jan wali sarnaqerinakasa, lunthatanakasa, michʼanakasa, machirinakasa, masipjjat parlasirinakasa, sallqjañampi aparirinakasa mantapkaniti” sasa (1 Cor. 6:9, 10). Cheqpachansa, Diosan kamachinakaparjam sarnaqañatakejj chʼamachasiñaw wakisi. Ukat chʼamachasiñäni ukhajj askinakwa jikjjatañäni. Ukanakat mä qhawqhajj akanakäspawa: jañchi toqetsa sumaw jikjjatasiñäni, mayninakampis sumwa apasiñäni, ukat taqe kunat sipansa Jehová Diosampiw sum apasiñäni (Isaías 48:17, 18 liytʼasiñapawa).

13, 14. ¿Kuna luräwsa Diosajj taqe cristianonakar churawayi, ukat uk kunjamsa uñjañasa?

¹³ Ukat mayordomjamajja, walja luräwinirakïtanwa uk amtañasapuniwa. Jehová Diosajj kunatï Jupat cheqäki ukwa yatichawayistu, ukasti jan kipkani churäwipuniwa. Ukat yaqhanakar yatichañaswa munaraki (Mat. 28:19, 20). Pablojj akham sänwa: ‘Wali askirjampun uñjapjjam khitinakatï Criston yanapirinakapäpki ukat Diosan qollan imantatanakapat mayordomöpki ukanakaru’ sasa (1 Cor. 4:1, NM). Mayordomjamajja, ‘Diosan qollan imantatanakap’ arjjatañapsa ukat kunjamtï Jesucristo Uywirisajj siskistu ukham yaqhanakar yatiyañapsa apóstol Pablojj sum amuyäna (1 Cor. 9:16).

¹⁴ Kunapachatï Diosan cheqa yatichäwinakap jaqenakar yatichktan ukhajja, jupanakar  munasitaswa uñachtʼayasktanjja. Cheqas janiw taqenis mä kikpakejj yatiyir sarksnati, kuna laykutejj jakäwisajj mayj mayjawa. Uk Jehová Diosajj sum yati. Ukampis qhawqtï lurirjamäktan ukarjama lurañataki chʼamachasiñaw wali wakiskirejja. Ukhamatwa Diosaru ukat jaqe masisar munasitassa uñachtʼayañäni.

¿KUNATSA SUM PHOQHAÑAJJ WAKISIPUNI?

15-17. 1) ¿Kunatsa mä mayordomojj phoqherïñapa? 2) ¿Kunja jan walis jan phoqherïñajja uk kunjamsa Jesusajj qhanañchtʼäna?

¹⁵ Kimsïr wakiskir yatichäwejj akarakiwa: istʼasirïsaw sum phoqherïtasa jan ukajj atiniskayätas uñachtʼaysna. Mä mayordomojja inas suma jaqëchispäna ukat kun lurañs sum yatchispäna, ukampis jan istʼasirïkaspäna ukat luräwinakaps jan phoqkaspäna ukhajj inamayakïspänwa. Mayordomotï trabajop sum lurañ munchi ukat uywiripampi askit uñjatäñ munchi ukhajja, istʼasirïñapawa. Kuntï Pablojj qellqkatayna uk amtapuniñäni: “Khititejj mä luraña katoqki ukajj askïñapawa [mä arunjja, suma phoqherïñapawa]” (1 Cor. 4:2).

¹⁶ Jiwasatï phoqherïñänejja, bendicionanakwa katoqañäni. Jan phoqherïkañäni ukhasti, Jehová Diosajj janiw askit uñjkistaniti. Qollq katoqer kimsa uywatanakat Jesusajj parläna ukanwa uka toqet sum qhanañchtʼäna. Kawkïr esclavonakatï uywiripar istʼasin qollqe waljaptayapkäna ukanakajj uywiripamp suma uñjatäpjjänwa ukat askinakwa katoqapjjarakïna. Ukampis jan istʼasiri esclavorojja, ‘nañqhata’ ‘jan wali servirita’ ukat ‘jayratwa’ uywiripajj uñjäna, ukatsti kawkïr qollqtï churkäna uks aparänwa ukat jaqonukurakïnwa (Mateo 25:14-18, 23, 26, 28-30 liytʼasiñapawa).

¹⁷ Kunja jan walisa jan phoqherïñajja uk aka uñachtʼäwimpiw Jesusajj akham sasin qhanañchtʼarakïna: “Mä qamiri jaqewa utjäna,  ukasti mä mayordomonirakïnwa, aka mayordomosti jupan nayraqatapanjja yänakapa chhaktayiritjama juchañchatänwa. Juparu jawsasinsti siwa: ¿Kunasa aka jumata istʼkta ukajja? Mayordomöñamata cuenta churita, kunalaykutejj janiw jukʼampi mayordomökjjätati” sasa (Luc. 16:1, 2, MT). Mayordomojj uywiripan yänakapwa chhaqtayäna, ukatwa uywiripajj jaqonuküna. ¿Kunsa ukajj yatichistu? Janipuniw jan istʼasirïñ munktanti, kuntï Jehová Diosajj maykistu ukamp phoqhañasapuniwa.

¿MAYNINAKJAMÄÑ MUNAÑAJJ WALÏSPATI?

18. ¿Kunatsa mayninakjämañ munañajj jan walïki?

¹⁸ Sapa mayniw ak jisktʼasiñasa: “¿Kunjam mayordomötsa?” sasa. Mayninakjamäñ munañajj jan walinakanwa uñjasiyistaspa. Bibliajj akham ewjjtʼistu: “Sapa mayniwa luräwinakapa uñjasiñapa, ukatsti walikïskchejja, jupa pachpatakïniwa, janiw mayninakatakïkiti” sasa (Gál. 6:4). Mayninakjam lurañ munañat sipansa, kuntï sapa maynejj lurirjamäktan uk lurañatakiw chʼamachasiñasa. Uktï lurañänejja, janiw jachʼa jachʼa tukkañäniti ni aynachtʼatas jikjjataskañäniti. Ukhamarusa ak amtañasarakiwa, inas usutätasata, chuymanëjjatasata, jan ukajj yaqha lurañanak utjatapatwa Diosatakejj jan nayrjam irnaqjjksnati. Jan ukajj inas nayrat sipansa jukʼampi irnaqerjamästan. Ukhamächi ukhajja, ¿janit jukʼampi irnaqañatak chʼamachasksna?

19. ¿Taman kuna luräwtï katoqañ munktan uk jan katoqkañäni ukhajj kunatsa jan aynachtʼañasäki?

¹⁹ Janirakiw khitinakatï taman luräwinakanïpki ukat ukham luräwinak jiwasajj katoqañ munktan ukhamäñ munañasäkiti. Sañäni, mä jilatajj inas irpir chuymanjama irnaqtʼaña jan ukajj jachʼa tantachäwinakan arstʼañ munchispa. Ukanak jikjjatañatak chʼamachasiñajj walikïskiwa, ukampis munktan ukarjam jan katoqkañäni ukhajj janiw aynachtʼañasäkiti. Kunatsa uk jan katoqtan uk inas jan sum amuyksnati, ukatwa suykayätan ukat sipansa jukʼamp suyañajj wakischispa. Ak amtapuniñäni, Moisesajj israelitanakar Egipto markat apsuniñatak wakichtʼatjamäkchïnsa, 40 maranakaw suyañapäna. Ukha tiempo suyasajja, jan istʼasiri ukat kutkatasiri markar irpañatakejj kunjam jaqëñatï wakiskäna ukham jaqëñatakiw yanaptʼäna (Hech. 7:22-25, 30-34).

20. ¿Kunsa Jonatanat yateqassna?

²⁰ Inas taman yaqhep luräwinak jan katoqapunkchiñäniti. Ukaw Jonatanarojj pasäna. Jupasti Saúl reyin yoqapänwa ukat Israel marka apnaqañaw waktʼañapäna. Ukampisa, Davitaruw Jehová Diosajj reyïñapatak ajllïna, jupasti Jonatanat wali sullkänwa. ¿Uk kunjamsa Jonatanajj uñjäna? Walikïskatapwa amuyäna ukat Davitar yanaptʼañatakejj jakäwipsa aptʼasirjamänwa. Jupajj Davitar akham sänwa: “Jumasti mä urojj Israelan reyipaw tuküta. Nayasti juman jakʼamankarakïwa, sullka reyïkiristsa ukhama” sasa (1 Sam. 23:17). Jonatanajj wali askitwa uñjäna, janiw Saúl awkipjam envidiaskänti. ¿Kuns jupat yateqsna? Mayninakan luräwinakapat envidiasiñat sipansa, kuna luräwtï Diosat katoqtan uk sum phoqhañatakiw chʼamachasiñasa. Jutïrinjja, Jehová Diosajj kuntï servirinakapajj munapki uk jilarkirwa churani, ukat janipun pächasiñäniti.

21. ¿Kunjamsa mayordomjamajj luräwis uñjañasa?

²¹ Ak amtapuniñäni, Diosan mayordomonakapjamajj janiw munkir jan munkir ukat tʼaqhesiyata irnaqktanti. Jan ukasti, wali wakiskir luräwi churasaw Jehová Diosajj jachʼar aptistu: aka qhepa urunakan suma yatiyäwinak yatiyaña, ukasti janipuniw wasitat lurasjjaniti. Ukat sapa mayniruw uk phoqhañatakejj amtasarjam jaytistu. Ukhamasti, istʼasir mayordomöñäni ukat taqe kunjjar Munañani Jehová Diosar yupaychañjja wali askitpun uñjapjjañäni.

[Jiskt’anaka]

[12 janan fotonakanaka]

Kuna luräwtï Diosat katoqtan uk phoqhapuniñäni