Suma trabajtʼir jaqenakajj janiw kunan trabajiñs ajjsarapkiti, antisas wal trabajiñ munapjje. Mayninakan yanaptʼatäñ suyañat sipansa, jupanakaw yaqhanakar yanaptʼapjje, trabajopajj janis suma trabajökchejja, trabajasipkakiwa.

Janis trabajañ gustkchistojja, taqeniw walja lurañanakanïtanjja. Yamas jichha tiemponjja, suma trabajtʼir jaqenakajj wali thaqatäpjjewa, kuna laykutejj jilaparte jaqenakajj janiw chʼama trabajonak lurañ munjjapjjeti (Eclesiastés 3:13).

“Wal trabajta ukhajja, wali kusisita chuymas chuymätwa. Ukatwa sapürutjam jukʼamp trabajiñ muntjja. Sum trabajiñatak chʼamachastan ukhajja, jaqenakajj suma trabajtʼir jaqetwa uñtʼapjjestu” (Reyon).

BIBLIAJJ KAMSISA: “Taqe trabajitatwa jilpacha katoqañajj utji” (Proverbios 14:23, Aymar Biblia).

Jukʼamp suma trabajtʼirïñatakejj aka ewjjtʼanakaw yanaptʼiristam:

Sum lurañatak chʼamachasim. Utan lurañanak lurkasasa, tareanak lurkasasa, trabajonsa, taqe kunsa sum phoqañatak chʼamachasim. Kunsa sum lurañ yatsta ukhasa, kunjamsa uk jukʼamp suma, jankʼak lurasma uk amuytʼasim. Ukham lurasaw jukʼamp kusisit jakasïta.

BIBLIAJJ KAMSISA: “Khititejj mä kunsa suma lurkani ukajja, reyinakaruwa servini, janiwa aynachtʼata jaqenakar sirvkaniti” (Proverbios 22:29).

Mayninakat llakisim. Lurañanakam phoqasajj mayninakaruw yanaptʼaraktajja. Akham amuytʼañäni, utantï lurañanakamp yanaptʼäta ukhajja, familiamajj janiw sint qaripkaniti.

BIBLIAJJ KAMSISA: “Katoqañat sipansa churañanwa jukʼamp kusisiñajj utji” (Hechos 20:35).

Jukʼamp trabajiñatak chʼamachasim. Janiw kuntï mayipkätam ukak lurañamäkiti, jan ukasti jukʼamp lurañatakiw chʼamachasiñama. Ukhamatwa juma pachpajj kuntï jakäwiman lurañ amtkäta uk lurarakïta. Inas jukʼamp trabajchïta, ukampis janiw khitin obligatas ukham trabajkätati, jan ukasti juman amtatamatwa ukham trabajïta (Mateo 5:41).

BIBLIAJJ KAMSISA: ‘Kuna suma lurañanaktejj jumajj lurkäta ukjja, janiw obligat lurañamäkiti, jan ukasti chuymamat lurañamawa’ (Filemón 14).

Janiw trabajoruk chuym uchañamäkiti. Suma trabajtʼirïñajj janiw trabajoruk chuym uchaña sañ munkiti. Trabajtʼasajja, samartʼañatakejj tiemp apstʼasiñasarakiwa.

BIBLIAJJ KAMSISA: “Mä jukʼa samartʼañajja askiwa, pä chʼama qaritat sipansa, thayaru katthapiñ munasa” (Eclesiastés 4:6).