Cheqañchañajja, wawanakasar yanaptʼaña, yatichaña, jan wali luratanakapat amuytʼayaña sañwa muni. Suma amtanakar puripjjañapataki kunatï walïki jan walïkaraki ukanak yatichaña sañwa munaraki.

Aka qhepa maranakanjja, yaqhep awk taykanakajj janiw wawanakapar cheqañchjjapjjeti, “wawajajj janis kunatak walïkaspa ukhamwa amuyasispa” sasaw sapjje. Ukampis wawanakapar sum uywiri awk taykanakajja, kun lurapjjañapas wakisi, kunatsa ukarjam sarnaqapjjañapa ukanakwa wawanakapar yatichapjje.

“Wawanakasajj sum amuytʼasir jaqëpjjañapatakejja, kunatï walïki jan walïkaraki uk jiskʼatpachwa sum amuyapjjañapa. Jan ukajj kunjamtï jan timonani mä barcojj saranukusin chhaqkejja, ukhamarakiw jupanakajj jan wali thakir saranukupjjani” (Pamela).

Lurataparjamaw wawanakamar uñjañama. Jan istʼasitapat kuna jan walinsa uñjasini uk qhanwa wawamarojj sañama. Maysa toqetjja, jupajj istʼkätam ukhajj “walik ukham lurtajja” sañamarakiwa.

“Niyakejjay jichhürunakan wawanakajj jan istʼasirïpjjchejja, wawanakajajj istʼapkitu ukhajj felicittʼapuntwa. Ukaw jupanakarojj cheqañchatäpki ukhajj jan sint chuym ustʼayasiñatak yanaptʼi” (Christine).

BIBLIAJJ KAMSISA: “Kuntï maynejj phawki, ukrakwa apthapini” (Gálatas 6:7).

Amuyumpiw cheqañchañama. Wawar cheqañchasajja, qhawqha maranisa, qhawqsa yateqaspa, luratapajj jan walipuniti janicha ukanakwa amuyañama. Kunansa pantjasi ukarjamaw cheqañchañama, sañäni, wawamatï jan istʼasis celularap jan sum apnaqchi ukhajja, mä qhawqha tiempo aparañwa amtasma. Maysa toqetjja, janiw wawaman pantjasitapajj sinti jan walïkaspas ukham amuyañamäkiti.

“Wawajajj yatkasinti jan istʼitu jan ukajj jan amuyasisach pantjasi uk amuyañatakiw chʼamachasta. Yatkasin jan wali luratapat cheqañchañampi, pantjasitap amuytʼayañampejj janiw pachpäkiti” (Wendell).

BIBLIAJJ KAMSISA: “Awkinaka, jan wawanakamarojj colerasiyapjjamti, ukhamat jupanakajj jan llakisipjjañapataki” (Colosenses 3:21).

Munasiñampiw cheqañchañama. Awk taykanakajj wawanakapar munasiñamp cheqañchapki ukhajja, wawanakajj uk amuyapjjewa, ukarakiw cheqañchatäpki ukhajj jan sint chuym usuyasipjjañapatak yanaptʼi, pantjasitanakapatsa yateqapjjarakiwa.

“Yoqall wawajajj pantjasirïkäna ukhajja, suma amtanakar puriwayki ukajj qhawqsa kusisiyapjjetu uk jupar sapjjapunirïtwa. Ukatjja, ‘jan wali luratam askichäta ukhajja, janiw wiñayatak jan wali jaqet uñjapkätamti, nanakas yanaptʼapjjämawa’ sasaw sapjjerïta” (Daniel).

BIBLIAJJ KAMSISA: “Munasir jaqejj paciencianiwa, khuyapayasiriwa” (1 Corintios 13:4).