USUNAKAJJ AYNACHTʼAYISTASPAWA. Ulf sat chachajj sano jaqënwa, wal trabajtʼiriraki. Ukampis mä akatjamat usuntasajj janiw cuerpop onjjtayirjamäjjänti. Jupajj akham siwa: “Wal llakisiyäta, janiw kuns lurañ munjjayätti, ni chʼamas utj-jjetänti” sasa.

Janiw khitis usuntañat salvasksnati, ukwa Ulf chachar kunatï paskäna ukajj amuytʼayistu. Ukatwa usunakat jarkʼaqasiñatakejj cuidasiñasa. Ukampis usuntsna ukhajja, ¿janit kusisit jakasjjsna? Kunjamtï yatjjatkañänejja, usuntatäkasas kusisitaw jakassna. ¿Kuna ewjjtʼanakas jan usuntañatak yanaptʼistaspa?

AMUYUMPIW TAQE KUNS LURAÑASA. (1 Timoteo 3:2, 11). Sinti manqʼañasa umañasa usuntayistaspawa, qollqsa tukjasiraksnawa. Ukatwa Bibliajj akham ewjjtʼistu: “Machir jaqenakampejj jan mayachasimti, janirak sinti manqʼeri jaqenakampisa. Machirinakasa, sinti manqʼerinakasa tukjasiñaruw puripjje” sasa (Proverbios 23:20, 21).

CUERPOSAJJ QʼOMÄÑAPAWA. “Kunanakatï cuerposarus amuyusarus qʼañuchki ukanakat qʼomachasipjjañäni” (2 Corintios 7:1). Walja jaqenakaw cigarro fumasa, alcohol sint umasa jan ukajj drogasisajj cuerpop qʼañuchapjje. Uka toqet yatjjattʼat jaqenakajj akham sapjjewa: “Cigarro fumirejj kunayman usunakampiw usuntaspa, taqpach cuerpoparuw jan waltʼayarakispa” sasa (Centros para el Control y la Prevención de Enfermedades de Estados Unidos).

JAKÄWISAJJ DIOSAN REGALOPAWA. “Jiwasas jupïpanwa jakasktanjja, sarnaqasktanjja, utjaskaraktanjja” (Hechos 17:28). Uk yatiñaw wali amuyumpi trabajiñatakisa, kusistʼañatakisa, auto apnaqañatakis yanaptʼistani. Mä rat kusistʼañ laykuki wiñayatak usuchjata qheparañajja, janipuniw walïkaspati.

JANIW AYNACHTʼAYIR AMUYUNAKAMPI APAYASIÑASÄKITI. Aynachtʼayir amuyunakajj cuerposar jan waltʼayiwa. Ukatwa jan sint llakisiñatakisa, jan envidiasiñatakisa, coleramp jan atipayasiñatakis chʼamachasiñasa. Bibliajj akham sasaw ewjjtʼistu: “Qʼapisiñ apanukum, chuym chʼamaktʼayasiñ jaytanukum” sasa (Salmo 37:8). “Jan qharürut llakisipjjamti, qharürojj yaqha llakinakaw utjarakini” sasaw saraki (Mateo 6:34).

 KUNATÏ YANAPTʼKISTASPA UKANAKATWA LUPʼIÑASA. Bibliajj akham siwa: “Samarañ chuymanïñajj cuerporojj jakañwa churi” sasa (Proverbios 14:30). Ukat akham sarakiwa: ‘Kusisit chuymajj jaqen jakañapwa sumaptayi’ sasa (Proverbios 17:22). Uka arunakajj cheqäskapuniwa. Ministerio de Salud de Escocia ukan trabajiri, Derek Cox sat doctorajj akham siwa: “Kusisit sarnaqer jaqenakajja, llakit sarnaqer jaqenakat sipansa, janiw jankʼak usuntapkiti” sasa.

JANIW LLAKIMP AYNACHTʼAÑASÄKITI. Ulf chachajja, jan qollkay usump usuntasajj janiw llakimp aynachtʼkänti. Jiwasajj ukhamarakiw wali usuta uñjasiñäni ukhajj jan aynachtʼañasäkiti, antisas ukar saykatañatakiw chʼamachasiñasa. Yaqhepajja, llakimp apayasisajj jukʼampiw aynachtʼapjje. Bibliajj akham siwa: “Tʼaqhesiña horasantejj mayjtʼasïta ukapachajja, jukʼa chʼamanikiwa jikjjatasjjäta” sasa (Proverbios 24:10).

Yaqhep jaqenakajja, usuntasajj llakimp aynachtʼañat sipansa, ukar saykatañatakiw chʼamachasipjje. Kunanaktï lurirjamäpki ukanakwa lurapjjaraki. Ulf chachajj ukhamwa luräna, jupajj akham siwa: “Diosar mayisiña ukat Biblian yatichäwinakapat lupʼiñaw llakisiñat sipansa, kuntï lurirjamäkta ukanak lurañatak yanaptʼitu” sasa. Walja jaqenakaw ukham wali usut uñjasipjje, jupanakjamarakiw Ulf chachajj khuyapayasirïña ukat mayninakat llakisiñ yateqäna, ukham chuymanïñaw jaqenakarus Bibliat yatiyañatak yanaptʼäna.

Steve sat chachajj ukhamarakiw tʼaqesïna. 15 maranïkasajja, mä arbolat jalaqtasaw jan walin uñjasïna, cuerpopajj janiw kunkat aynacharojj onjjtjjänti. 18 maranëjjäna ukhajj amparanakap onjjtayjjänwa. Qhepatjja, universidadaruw saräna, ukanwa alcohol umañaru, droganakaru, qʼañu juchanakan sarnaqañar yatintäna. Jupajj janiw sum jakasiñ suyjjänti. Ukampis Bibliat yateqañaw vicionakap apanukuñatakisa, kusisit jakasiñatakis yanaptʼäna. Jupajj akham siwa: “Walja maranakaw llakimp aynachtʼata jakasiyäta, jichhajj chuymajan sum jikjjatasta, kusisitaw jakasirakta” sasa.

Steve ukat Ulf chachanakan jakäwipajja, Salmo 19:7, 8 qellqatatwa amtayistu, ukan akham siwa: ‘Tatitun arsutanakapajj cheqapawa, jaqen chuymapar machaqaptayiriwa. Tatitun arunakapajj cheqapawa, chuymar kusisiyiriwa; Tatitun arsutanakapajj qʼomawa, nayranakar qhan chuririwa’ sasa.