Zacarías 2:1-13
2 Uñtasasti mä jaqeruw nayajj mä visionan uñjayäta, uka jaqejj mediñatak mä pita+ aptʼatänwa.
2 Ukatwa nayajj akham sasin jisktʼayäta: “¿Kawkirus saraskta?” sasa.
Jupasti sarakitänwa: “Jerusalén marka midtʼiriw saraskta, ukhamat anchorusa largorusa qhawqchʼasa uk yatiñataki”+ sasa.
3 Nayamp parlkäna uka angelajja mistuwayänwa, ukatsti yaqha angelaw jupamp jikisir jutäna.
4 Jupajja nayamp parlkäna uka angelarojj akham sasaw säna: “Tʼijukam ukar saram, akham sasin uka waynar sanim: ‘“Niyakejjay Jerusalén markan walja jaqenakampi walja uywanakampi utjchinejja,+ uka markanjja camponkir mä markanjamaw* jakapjjani.+
5 Uka marka muytpachanjja nina aqkir mä murallaruw nayajj tuköjja,+ jachʼañchäwijas Jerusalén taypinkaniwa”+ siw Jehová Diosajja’ sasa”.
6 Jehová Diosajj akham siwa: “¡Jutapjjam! ¡Jutapjjam! Alay toqenkir* oraqet escapanipjjam,+
kuna laykutejj alajjpachanakankir pusi thayanak toqeruw nayajj aywitatayapjjsma”+ siw Jehová Diosajja.
7 “¡Sion, jutam! Babilonia markan phuchapamp jakir marka, escapanim.+
8 Ejercitonakan Jehová Diosapajj jachʼañchatäkäna uka qhepatjja, jumanakar saqueysusipkayätam uka markanakaruw jupajj akham sas khitanitu:+ ‘Khititï jumanakar llamktʼapktam ukajja nayan nayrajwa llamktʼaski’+ sasa.
9 ‘Jichhajja amparajwa nayajj jupanak contra aytäjja, jupanakasti pachpa esclavonakapan saqueysutäpjjaniwa’+ sasa. Ejercitonakan Jehová Diosapaw nayarojj khitanitu, ukjja cheqpachapuniw jumanakajj yatipjjäta”.
10 Jehová Diosajj akham siwa: “Sionan phuchapa,+ kusisiñat arnaqasim, kuna laykutejj nayajj jutasktwa,+ juma taypinwa jakarakëjja.+
11 Uka urunjja walja markanakaw naya Jehová Diosampejj mayachtʼasipjjani,+ nayan markajäpjjarakiniwa, juma taypinwa nayajj jakarakëjja” sasa. Ejercitonakan Jehová Diosapaw juman ukarojj khitanitu, uksti jumajj yatïtawa.
12 Sagrado oraqenjja Jehová Diosajj Judá markaruw herenciapat katusjjani, mayampiw Jerusalenarojj ajllirakini.+
13 Taqe jaqenakajja Jehová Dios nayraqatan amukïpjjpan, kuna laykutejj santo utjäwipatpachwa jupajj jutaski, ukhamat kuntï lurañ amtkäna uk lurañataki.
