Zacarías 13:1-9
13 ”Uka urunjja mä phujuw allsutäni,* ukhamat Davidat jutir wawanakapasa Jerusalenankir jaqenakasa juchat qʼomachatäpjjañapataki ukhamarak kunatï qʼañüki ukat qʼomachatäpjjañapataki.+
2 ”Ejercitonakan Jehová Diosapajj akham siwa: uka urunjja, idolonakan sutinakapjja markat chhaqtayäwa,+ uka idolonakajj janiw amtatäjjaniti, falso profetanakarusa+ kunatï Diosatak qʼañüki uk lurañar chʼamañchirinakarusa markat chhaqtayäwa.
3 Mä jaqetï kʼari profecianak arsuni ukhajja, jupar utjayir awk taykapajj akham sapjjaniwa: ‘Jehová Diosan sutipjjar kʼarinak parlatam laykojja, janiw jumajj jakjjätati’ sasa. Ukatjja jupar utjayir awk taykapajja kʼari profecianak arsutapat espadampiw juparojj passuyapjjani.+
4 ”Uka urunjja, kunapachatï falso profetanakajj profecianak arsupjjani ukhajja visionanak uñjapjjatapat phenqʼasipjjaniwa, tʼarwat lurat isipjja*+ janiw engañjañatakejj uchasipkaniti.
5 Jupanakat sapa mayniw akham sapjjani: ‘Janiw nayajj profetäkti, yapuchir jaqekïtwa, kuna laykutejj waynäskayäta ukhaw mä jaqejj esclavopat alasitu’ sasa.
6 Maynitï juparojj ‘¿cuerpoman* utjki uka heridanakajj kunarakisti?’ sasin jisktʼani ukhajja, jupajj akham saniwa: ‘Amigonakajan utapanwa uka heridanak lurapjjetu’ sasa”.
7 Ejercitonakan Jehová Diosapajj akham siwa: “Espada, awatirijar jiwayam,+amigojäki uka jaqer jiwayam,awatirir jiwayam,+ ovejanakajj* anatatatäpan,+jan yäqat jaqenak contraw amparaj aytäjja” sasa.
8 Jehová Diosajj akham siwa: “Markpachanjja,chikat jaqenakatsa jilaw jiwayatäpjjani,mä qhawqhanikiw jakapjjani.
9 Uka mä qhawqhanirojja ninampiw qʼomachäjja,kunjamtï qollqejj qʼomachaskejja ukhamwa jupanakarojj qʼomachäjja,kunjamtï qorirojj uñakipaskejja ukhamwa jupanakarojj uñakipäjja.+
Jupanakajj sutijaruw artʼasipjjani,nayasti jupanakarojj jaysäwa.
Nayajj akham säwa: ‘Jupanakajj nayan markajäpjjewa’+ sasa.
Jupanakasti akham sapjjarakiniwa: ‘Jehová Diosaw jiwasan Diosasajja’ sasa”.
